ਵੈੱਬ ਡੈਸਕ - ਅਕਸਰ ਅਸੀਂ ਦੇਖਦੇ ਹਾਂ ਕਿ ਘਰ 'ਚ ਜਮਾਇਆ ਹੋਇਆ ਦਹੀਂ ਜਾਂ ਤਾਂ ਪਤਲਾ ਰਹਿ ਜਾਂਦਾ ਹੈ ਜਾਂ ਫਿਰ ਉਹ ਬਾਜ਼ਾਰ ਵਰਗਾ ਸੁਆਦ ਨਹੀਂ ਦਿੰਦਾ। ਕਈ ਵਾਰ ਦਹੀਂ ਖੱਟਾ ਹੋ ਜਾਂਦਾ ਹੈ ਜਾਂ ਪਾਣੀ ਛੱਡ ਦਿੰਦਾ ਹੈ ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਦਹੀਂ ਜਮਾਉਣਾ ਵੀ ਇਕ ਕਲਾ ਹੈ? ਜੇਕਰ ਤੁਸੀਂ ਕੁਝ ਛੋਟੀਆਂ ਪਰ ਅਹਿਮ ਗੱਲਾਂ ਦਾ ਧਿਆਨ ਰੱਖੋ, ਤਾਂ ਤੁਸੀਂ ਵੀ ਘਰ 'ਚ ਬਿਲਕੁਲ ਪਨੀਰ ਵਰਗਾ ਗਾੜ੍ਹਾ ਦਹੀਂ ਤਿਆਰ ਕਰ ਸਕਦੇ ਹੋ।

ਇੱਥੇ ਦਹੀਂ ਜਮਾਉਣ ਦਾ ਸਭ ਤੋਂ ਸਹੀ ਅਤੇ ਪੇਸ਼ੇਵਰ ਤਰੀਕਾ ਦਿੱਤਾ ਗਿਆ ਹੈ :-

ਦੁੱਧ ਦੀ ਚੋਣ ਹੈ ਸਭ ਤੋਂ ਅਹਿਮ
- ਵਧੀਆ ਦਹੀਂ ਲਈ ਹਮੇਸ਼ਾ ਫੁੱਲ ਕ੍ਰੀਮ ਵਰਤੋ। ਜੇਕਰ ਦੁੱਧ ਪਹਿਲਾਂ ਹੀ ਪਤਲਾ ਹੋਵੇਗਾ ਤਾਂ ਦਹੀਂ ਕਦੇ ਵੀ ਗਾੜ੍ਹਾ ਨਹੀਂ ਜੰਮੇਗਾ। ਦੁੱਧ ਨੂੰ ਇਕ ਵਾਰ ਚੰਗੀ ਤਰ੍ਹਾਂ ਉਬਾਲੋ ਤਾਂ ਜੋ ਉਸਦਾ ਵਾਧੂ ਪਾਣੀ ਸੁੱਕ ਜਾਵੇ।

ਤਾਪਮਾਨ ਦਾ ਰੱਖੋ ਖ਼ਾਸ ਖਿਆਲ
- ਦਹੀਂ ਜਮਾਉਣ ਲਈ ਦੁੱਧ ਨਾ ਤਾਂ ਬਹੁਤ ਗਰਮ ਹੋਣਾ ਚਾਹੀਦਾ ਹੈ ਅਤੇ ਨਾ ਹੀ ਬਹੁਤ ਠੰਢਾ। ਦੁੱਧ ਨੂੰ ਇੰਨਾ ਕੁ ਕੋਸਾ ਰੱਖੋ ਕਿ ਜਦੋਂ ਤੁਸੀਂ ਉਸ 'ਚ ਉਂਗਲ ਪਾਓ, ਤਾਂ ਉਹ ਉਸਦੀ ਗਰਮੀ ਨੂੰ ਸਹਿ ਸਕੇ। ਬਹੁਤ ਗਰਮ ਦੁੱਧ 'ਚ ਜਾਗ ਲਗਾਉਣ ਨਾਲ ਦਹੀਂ ਪਾਣੀ ਛੱਡ ਦਿੰਦਾ ਹੈ।

'ਜਾਗ' ਲਗਾਉਣ ਦਾ ਸਹੀ ਢੰਗ
- ਇਕ ਲੀਟਰ ਦੁੱਧ ਲਈ ਇਕ ਵੱਡਾ ਚਮਚ ਤਾਜ਼ਾ ਦਹੀਂ ਕਾਫ਼ੀ ਹੈ। ਜਾਗ ਲਗਾਉਣ ਤੋਂ ਪਹਿਲਾਂ ਦਹੀਂ ਨੂੰ ਥੋੜਾ ਜਿਹਾ ਫੈਂਟ ਲਓ ਅਤੇ ਫਿਰ ਦੁੱਧ 'ਚ ਚੰਗੀ ਤਰ੍ਹਾਂ ਮਿਲਾਓ। ਜੇਕਰ ਹੋ ਸਕੇ ਤਾਂ ਦੁੱਧ ਨੂੰ ਇੱਕ ਭਾਂਡੇ ਤੋਂ ਦੂਜੇ ਭਾਂਡੇ 'ਚ ਉੱਪਰੋਂ ਪਾਓ ਤਾਂ ਜੋ ਝੱਗ ਬਣੇ, ਇਸ ਨਾਲ ਦਹੀਂ ਉੱਪਰ ਮਲਾਈ ਦੀ ਮੋਟੀ ਪਰਤ ਜੰਮਦੀ ਹੈ।

ਮਿੱਟੀ ਦੇ ਭਾਂਡੇ ਦਾ ਜਾਦੂ
- ਜੇਕਰ ਤੁਸੀਂ ਚਾਹੁੰਦੇ ਹੋ ਕਿ ਦਹੀਂ ਬਿਲਕੁਲ ਹਲਵਾਈ ਵਰਗਾ ਗਾੜ੍ਹਾ ਹੋਵੇ, ਤਾਂ ਮਿੱਟੀ ਦੇ ਕੁੰਡੇ ਦੀ ਵਰਤੋਂ ਕਰੋ। ਮਿੱਟੀ ਦੁੱਧ ਦੀ ਨਮੀ ਨੂੰ ਸੋਖ ਲੈਂਦੀ ਹੈ, ਜਿਸ ਨਾਲ ਦਹੀਂ ਬਹੁਤ ਸਖ਼ਤ ਅਤੇ ਸਵਾਦਿਸ਼ਟ ਬਣਦਾ ਹੈ।

ਮੌਸਮ ਅਨੁਸਾਰ ਜਮਾਉਣ ਦਾ ਸਮਾਂ

ਗਰਮੀਆਂ 'ਚ
- ਦਹੀਂ ਨੂੰ 4 ਤੋਂ 6 ਘੰਟਿਆਂ ਲਈ ਕਿਸੇ ਛਾਂਦਾਰ ਥਾਂ 'ਤੇ ਰੱਖੋ।

ਸਰਦੀਆਂ 'ਚ
- ਦੁੱਧ ਵਾਲੇ ਬਰਤਨ ਨੂੰ ਕਿਸੇ ਗਰਮ ਕੱਪੜੇ (ਸ਼ਾਲ ਜਾਂ ਤੌਲੀਏ) 'ਚ ਲਪੇਟ ਕੇ ਰੱਖੋ।