ਵੈੱਬ ਡੈਸਕ - ਅਜੋਕੇ ਸਮੇਂ 'ਚ ਖ਼ਰਾਬ ਜੀਵਨ ਸ਼ੈਲੀ, ਪ੍ਰਦੂਸ਼ਣ, ਤਣਾਅ ਅਤੇ ਕੈਮੀਕਲ ਵਾਲੇ ਪ੍ਰੋਡਕਟਸ ਦੀ ਵਰਤੋਂ ਕਾਰਨ ਵਾਲਾਂ ਦਾ ਝੜਨਾ ਅਤੇ ਉਨ੍ਹਾਂ ਦੀ ਲੰਬਾਈ ਰੁਕ ਜਾਣਾ ਇਕ ਆਮ ਸਮੱਸਿਆ ਬਣ ਚੁੱਕੀ ਹੈ। ਹਰ ਕੋਈ ਚਾਹੁੰਦਾ ਹੈ ਕਿ ਉਸ ਦੇ ਵਾਲ ਕਾਲੇ, ਲੰਬੇ ਅਤੇ ਸੰਘਣੇ ਹੋਣ, ਜਿਸ ਲਈ ਲੋਕ ਪਾਰਲਰਾਂ 'ਚ ਹਜ਼ਾਰਾਂ ਰੁਪਏ ਦੇ ਟ੍ਰੀਟਮੈਂਟ ਕਰਵਾਉਂਦੇ ਹਨ।

ਪਰ ਸਿਹਤ ਅਤੇ ਬਿਊਟੀ ਮਾਹਿਰਾਂ ਮੁਤਾਬਕ ਜੇਕਰ ਤੁਸੀਂ ਕੁਦਰਤੀ ਤਰੀਕੇ ਨਾਲ ਵਾਲਾਂ ਦੀ ਲੰਬਾਈ ਵਧਾਉਣਾ ਚਾਹੁੰਦੇ ਹੋ, ਤਾਂ ਕੁਝ ਸੌਖੀਆਂ ਆਦਤਾਂ ਅਤੇ ਦੇਸੀ ਨੁਸਖਿਆਂ ਨੂੰ ਅਪਣਾ ਕੇ ਕਮਾਲ ਦਾ ਨਿਖਾਰ ਪਾ ਸਕਦੇ ਹੋ। ਆਓ ਜਾਣਦੇ ਹਾਂ ਵਾਲਾਂ ਨੂੰ ਤੇਜ਼ੀ ਨਾਲ ਲੰਬਾ ਕਰਨ ਦੇ ਸਭ ਤੋਂ ਅਸਰਦਾਰ ਤਰੀਕੇ:

ਵਾਲਾਂ ਨੂੰ ਲੰਬਾ ਅਤੇ ਮਜ਼ਬੂਤ ਕਰਨ ਦੇ 4 ਜਾਦੂਈ ਉਪਾਅ :-

ਪਿਆਜ਼ ਦਾ ਰਸ ਹੈ ਵਰਦਾਨ
- ਪਿਆਜ਼ ਦੇ ਰਸ 'ਚ 'ਸਲਫਰ' ਭਰਪੂਰ ਮਾਤਰਾ 'ਚ ਪਾਇਆ ਜਾਂਦਾ ਹੈ, ਜੋ ਸਿਰ ਦੀ ਚਮੜੀ 'ਚ ਖੂਨ ਦੇ ਦੌਰੇ ਨੂੰ ਵਧਾਉਂਦਾ ਹੈ ਅਤੇ ਨਵੇਂ ਵਾਲ ਉਗਾਉਣ 'ਚ ਮਦਦ ਕਰਦਾ ਹੈ। ਹਫ਼ਤੇ 'ਚ ਦੋ ਵਾਰ ਪਿਆਜ਼ ਦਾ ਰਸ ਕੱਢ ਕੇ ਵਾਲਾਂ ਦੀਆਂ ਜੜ੍ਹਾਂ 'ਚ ਲਗਾਓ ਅਤੇ 30 ਮਿੰਟ ਬਾਅਦ ਸ਼ੈਂਪੂ ਕਰ ਲਓ।

ਐਲੋਵੇਰਾ ਜੈੱਲ ਨਾਲ ਮਿਲੇਗਾ ਪੋਸ਼ਣ
- ਐਲੋਵੇਰਾ 'ਚ ਮੌਜੂਦ ਐਨਜ਼ਾਈਮਜ਼ ਵਾਲਾਂ ਦੇ ਫੋਲੀਕਲਸ ਨੂੰ ਸਾਫ਼ ਕਰਦੇ ਹਨ ਅਤੇ ਡੈਂਡਰਫ (ਸਿਕਰੀ) ਨੂੰ ਖ਼ਤਮ ਕਰਦੇ ਹਨ। ਤਾਜ਼ਾ ਐਲੋਵੇਰਾ ਜੈੱਲ ਨੂੰ ਵਾਲਾਂ ਦੀਆਂ ਜੜ੍ਹਾਂ ਤੋਂ ਲੈ ਕੇ ਸਿਰੇ ਤੱਕ ਲਗਾਉਣ ਨਾਲ ਵਾਲ ਹਾਈਡ੍ਰੇਟ ਹੁੰਦੇ ਹਨ ਅਤੇ ਟੁੱਟਣਾ ਬੰਦ ਹੋ ਕੇ ਤੇਜ਼ੀ ਨਾਲ ਲੰਬੇ ਹੁੰਦੇ ਹਨ।

ਤੇਲ ਦੀ ਮਾਲਿਸ਼ ਜ਼ਰੂਰੀ
- ਵਾਲਾਂ ਦੀ ਲੰਬਾਈ ਵਧਾਉਣ ਲਈ ਉਨ੍ਹਾਂ ਨੂੰ ਨਮੀ ਦੇਣਾ ਬਹੁਤ ਜ਼ਰੂਰੀ ਹੈ। ਨਾਰੀਅਲ, ਅਰੰਡੀ ਜਾਂ ਬਦਾਮ ਦੇ ਤੇਲ ਨੂੰ ਹਲਕਾ ਕੋਸਾ ਕਰਕੇ ਉਂਗਲਾਂ ਦੇ ਪੋਰਾਂ ਨਾਲ ਸਿਰ ਦੀ ਚਮੜੀ 'ਤੇ ਮਾਲਿਸ਼ ਕਰੋ। ਇਸ ਨਾਲ ਵਾਲਾਂ ਦੀਆਂ ਜੜ੍ਹਾਂ ਮਜ਼ਬੂਤ ਹੁੰਦੀਆਂ ਹਨ।

ਸਹੀ ਡਾਈਟ (ਖਾਣ-ਪੀਣ) 'ਤੇ ਦਿਓ ਧਿਆਨ
- ਵਾਲ ਬਾਹਰੋਂ ਉਦੋਂ ਹੀ ਚੰਗੇ ਹੋਣਗੇ ਜਦੋਂ ਉਨ੍ਹਾਂ ਨੂੰ ਅੰਦਰੋਂ ਪੂਰਾ ਪੋਸ਼ਣ ਮਿਲੇਗਾ। ਆਪਣੀ ਖੁਰਾਕ 'ਚ ਪ੍ਰੋਟੀਨ, ਆਇਰਨ ਅਤੇ ਵਿਟਾਮਿਨ-ਈ ਨਾਲ ਭਰਪੂਰ ਚੀਜ਼ਾਂ ਜਿਵੇਂ ਆਂਵਲਾ, ਹਰੀਆਂ ਸਬਜ਼ੀਆਂ, ਸੁੱਕੇ ਮੇਵੇ (ਬਦਾਮ/ਅਖਰੋਟ) ਅਤੇ ਦਾਲਾਂ ਜ਼ਰੂਰ ਸ਼ਾਮਲ ਕਰੋ।

ਇਨ੍ਹਾਂ ਗ਼ਲਤੀਆਂ ਤੋਂ ਬਚੋ :-

ਗਿੱਲੇ ਵਾਲਾਂ 'ਚ ਕੰਘੀ ਨਾ ਕਰੋ
- ਗਿੱਲੇ ਹੋਣ ਸਮੇਂ ਵਾਲਾਂ ਦੀਆਂ ਜੜ੍ਹਾਂ ਬਹੁਤ ਕਮਜ਼ੋਰ ਹੁੰਦੀਆਂ ਹਨ, ਜਿਸ ਨਾਲ ਉਹ ਜ਼ਿਆਦਾ ਟੁੱਟਦੇ ਹਨ।

ਹੀਟਿੰਗ ਟੂਲਸ ਦੀ ਘੱਟ ਵਰਤੋਂ
- ਸਟ੍ਰੇਟਨਰ ਜਾਂ ਡਰਾਇਰ ਦੀ ਜ਼ਿਆਦਾ ਵਰਤੋਂ ਵਾਲਾਂ ਨੂੰ ਬੇਜਾਨ ਕਰ ਦਿੰਦੀ ਹੈ, ਜਿਸ ਨਾਲ ਉਨ੍ਹਾਂ ਦੀ ਲੰਬਾਈ ਰੁਕ ਜਾਂਦੀ ਹੈ।

ਟ੍ਰਿਮਿੰਗ 
- ਹਰ 2-3 ਮਹੀਨੇ ਬਾਅਦ ਵਾਲਾਂ ਨੂੰ ਹੇਠਾਂ ਤੋਂ ਥੋੜ੍ਹਾ ਜਿਹਾ ਟ੍ਰਿਮ ਜ਼ਰੂਰ ਕਰਵਾਓ, ਤਾਂ ਜੋ ਦੋ-ਮੂੰਹੇ ਵਾਲ ਖ਼ਤਮ ਹੋ ਸਕਣ।