ਚਮਤਕਾਰ ਜਾਂ ਵਿਗਿਆਨ : ਸਬਮਰਸੀਬਲ ''ਚੋਂ ਨਿਕਲਿਆ ਖੋਲ੍ਹਦਾ ਪਾਣੀ! ਪੂਰੇ ਇਲਾਕੇ ''ਚ ਦਹਿਸ਼ਤ

ਵੈੱਬ ਡੈਸਕ - ਸਰਦੀਆਂ ’ਚ ਹੈਂਡ ਪੰਪ ਜਾਂ ਟਿਊਬਵੈੱਲ ਤੋਂ ਕੋਸਾ ਪਾਣੀ ਮਿਲਣਾ ਆਮ ਗੱਲ ਹੈ ਪਰ ਜੇਕਰ ਅਚਾਨਕ ਉਬਲਦਾ ਪਾਣੀ ਨਿਕਲਣਾ ਸ਼ੁਰੂ ਹੋ ਜਾਵੇ ਤਾਂ ਇਹ ਕਿਸੇ ਹੈਰਾਨੀ ਤੋਂ ਘੱਟ ਨਹੀਂ ਹੈ। ਉੱਤਰ ਪ੍ਰਦੇਸ਼ ਦੇ ਨਾਰਾਇਣਪੁਰ ਪਿੰਡ ’ਚ ਇਕ ਅਜਿਹਾ ਹੀ ਅਨੋਖਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇਕ ਘਰ ’ਚ ਲੱਗੇ ਸਬਮਰਸੀਬਲ ’ਚੋਂ ਉਬਲਦਾ ਪਾਣੀ ਨਿਕਲ ਰਿਹਾ ਹੈ। ਇਸ ਘਟਨਾ ਨਾਲ ਪੂਰੇ ਪਿੰਡ ’ਚ ਹੜਕੰਪ ਮਚ ਗਿਆ ਅਤੇ ਇਸਨੂੰ ਦੇਖਣ ਲਈ ਪਿੰਡ ਵਾਸੀਆਂ ਦੀ ਭੀੜ ਇਕੱਠੀ ਹੋ ਗਈ।

ਗਰਮ ਪਾਣੀ ਨਾਲ ਔਰਤ ਦਾ ਸੜਿਆ ਹੱਥ

ਪਿੰਡ ਵਾਸੀ ਬੇਗਾਰਾਮ ਸਿੰਘ ਨੇ ਦੋ ਸਾਲ ਪਹਿਲਾਂ ਆਪਣੇ ਘਰ ’ਚ ਇਕ ਸਬਮਰਸੀਬਲ ਪੰਪ ਲਗਾਇਆ ਸੀ। ਹਰ ਰੋਜ਼ ਵਾਂਗ, ਸ਼ਨੀਵਾਰ ਸਵੇਰੇ ਲਗਭਗ 7 ਵਜੇ, ਜਿਵੇਂ ਹੀ ਉਸਦੀ ਪਤਨੀ ਰਾਣੀ ਦੇਵੀ ਨੇ ਸਬਮਰਸੀਬਲ ਚਾਲੂ ਕੀਤਾ, ਅਚਾਨਕ ਉਬਲਦਾ ਪਾਣੀ ਨਿਕਲਣਾ ਸ਼ੁਰੂ ਹੋ ਗਿਆ। ਅਣਜਾਣੇ ’ਚ, ਰਾਣੀ ਦੇਵੀ ਨੇ ਇਕ ਬਾਲਟੀ ਪਾਣੀ ਨਾਲ ਭਰੀ ਅਤੇ ਉਸ ’ਚ ਆਪਣਾ ਹੱਥ ਪਾ ਦਿੱਤਾ ਪਰ ਗਰਮ ਪਾਣੀ ਕਾਰਨ ਉਸਦਾ ਹੱਥ ਸੜ ਗਿਆ। ਇਹ ਦੇਖ ਕੇ ਪਰਿਵਾਰਕ ਮੈਂਬਰ ਹੈਰਾਨ ਰਹਿ ਗਏ ਅਤੇ ਤੁਰੰਤ ਪਿੰਡ ਵਾਸੀਆਂ ਨੂੰ ਸੂਚਿਤ ਕੀਤਾ।

ਪਿੰਡ ਵਾਸੀਆਂ ਦੀ ਉਤਸੁਕਤਾ ਨਾਲ ਵਧੀ ਭੀੜ

ਜਦੋਂ ਇਹ ਖ਼ਬਰ ਆਲੇ-ਦੁਆਲੇ ਫੈਲ ਗਈ ਤਾਂ ਪਿੰਡ ਵਾਸੀ ਅਤੇ ਮੀਡੀਆ ਕਰਮਚਾਰੀ ਮੌਕੇ 'ਤੇ ਪਹੁੰਚ ਗਏ। ਲੋਕ ਹੈਰਾਨ ਸਨ ਕਿ ਸਬਮਰਸੀਬਲ ’ਚੋਂ ਉਬਲਦਾ ਪਾਣੀ ਕਿਵੇਂ ਨਿਕਲ ਸਕਦਾ ਹੈ। ਕੁਝ ਲੋਕ ਕਹਿੰਦੇ ਹਨ ਕਿ ਇਹ ਇਕ ਚਮਤਕਾਰ ਹੋ ਸਕਦਾ ਹੈ, ਜਦੋਂ ਕਿ ਕੁਝ ਇਸਨੂੰ ਭੂ-ਵਿਗਿਆਨਕ ਗਤੀਵਿਧੀਆਂ ਦਾ ਨਤੀਜਾ ਮੰਨ ਰਹੇ ਹਨ।

ਕੀ ਹੈ ਕਾਰਨ?

ਮਾਹਿਰਾਂ ਅਨੁਸਾਰ, ਜੇਕਰ ਜ਼ਮੀਨ ਦੇ ਅੰਦਰ ਗੰਧਕ ਦੀਆਂ ਚੱਟਾਨਾਂ ਜਾਂ ਕੋਈ ਹੋਰ ਗਰਮ ਖਣਿਜ ਭਰਪੂਰ ਮਾਤਰਾ ’ਚ ਹਨ, ਤਾਂ ਇਸ ਨਾਲ ਪਾਣੀ ਬਹੁਤ ਜ਼ਿਆਦਾ ਗਰਮ ਹੋ ਸਕਦਾ ਹੈ। ਹਾਲਾਂਕਿ, ਅਸਲ ਕਾਰਨ ਵਿਗਿਆਨਕ ਜਾਂਚ ਤੋਂ ਬਾਅਦ ਹੀ ਪਤਾ ਲੱਗ ਸਕਣਗੇ। ਇਸ ਵੇਲੇ ਇਹ ਮਾਮਲਾ ਪਿੰਡ ’ਚ ਚਰਚਾ ਦਾ ਵਿਸ਼ਾ ਬਣ ਗਿਆ ਹੈ ਅਤੇ ਲੋਕ ਇਹ ਜਾਣਨ ਲਈ ਉਤਸੁਕਤਾ ਨਾਲ ਉਡੀਕ ਕਰ ਰਹੇ ਹਨ ਕਿ ਸਬਮਰਸੀਬਲ ’ਚੋਂ ਉਬਲਦਾ ਪਾਣੀ ਕਿਉਂ ਨਿਕਲ ਰਿਹਾ ਹੈ?