ਨਵਾਂ ਫੈਸ਼ਨ: ਮਾਰਕੀਟ ''ਚ ਆਈ ਅਜੀਬੋ-ਗਰੀਬ ਚੱਪਲ, ਕੀਮਤ ਸੁਣ ਉੱਡ ਜਾਣਗੇ ਹੋਸ਼

ਨਵੀਂ ਦਿੱਲੀ : ਫੈਸ਼ਨ ਦੀ ਦੁਨੀਆ ਵਿੱਚ ਅਕਸਰ ਅਜੀਬੋ-ਗਰੀਬ ਰੁਝਾਨ ਦੇਖਣ ਨੂੰ ਮਿਲਦੇ ਹਨ, ਪਰ ਇਸ ਵਾਰ ਮਸ਼ਹੂਰ ਲਗਜ਼ਰੀ ਬ੍ਰਾਂਡ 'ਚੈਨਲ' (Chanel) ਨੇ ਇੱਕ ਅਜਿਹਾ ਫੁੱਟਵੀਅਰ ਲਾਂਚ ਕੀਤਾ ਹੈ ਜਿਸ ਨੇ ਸਭ ਨੂੰ ਹੈਰਾਨ ਕਰ ਦਿੱਤਾ ਹੈ। ਕੰਪਨੀ ਨੇ ਮਾਰਕੀਟ ਵਿੱਚ 'ਅੱਧੀ ਚੱਪਲ' ਉਤਾਰੀ ਹੈ, ਜੋ ਸਿਰਫ਼ ਪੈਰ ਦੇ ਪਿਛਲੇ ਹਿੱਸੇ (ਅੱਡੀ) ਨੂੰ ਹੀ ਢੱਕਦੀ ਹੈ, ਜਦੋਂ ਕਿ ਅਗਲਾ ਹਿੱਸਾ ਪੂਰੀ ਤਰ੍ਹਾਂ ਨੰਗਾ ਰਹਿੰਦਾ ਹੈ।

ਇਸ 'ਹਾਫ ਸੈਂਡਲ' ਦੀ ਕੀਮਤ ਸੁਣ ਕੇ ਕਿਸੇ ਦੇ ਵੀ ਹੋਸ਼ ਉੱਡ ਸਕਦੇ ਹਨ। ਰਿਪੋਰਟਾਂ ਅਨੁਸਾਰ, ਇਸ ਇੱਕ ਜੋੜੀ ਚੱਪਲ ਦੀ ਕੀਮਤ 800 ਤੋਂ 1500 ਅਮਰੀਕੀ ਡਾਲਰ ਯਾਨੀ ਕਰੀਬ 70,000 ਤੋਂ 1.25 ਲੱਖ ਰੁਪਏ ਤੱਕ ਹੈ। ਇੰਨੀ ਮਹਿੰਗੀ ਹੋਣ ਦੇ ਬਾਵਜੂਦ ਇਹ ਲਗਜ਼ਰੀ ਫੈਸ਼ਨ ਪ੍ਰੇਮੀਆਂ ਅਤੇ ਅਮੀਰਾਂ ਵਿੱਚ ਤੇਜ਼ੀ ਨਾਲ ਪ੍ਰਸਿੱਧ ਹੋ ਰਹੀ ਹੈ। ਕਈ ਸੈਲੀਬ੍ਰਿਟੀਜ਼ ਅਤੇ ਫੈਸ਼ਨ ਆਈਕਨਸ ਇਸ ਨੂੰ ਪਹਿਨ ਕੇ ਰੈੱਡ ਕਾਰਪੇਟ ਅਤੇ ਪਾਰਟੀਆਂ ਵਿੱਚ ਨਜ਼ਰ ਆ ਰਹੇ ਹਨ।

ਜਿੱਥੇ ਫੈਸ਼ਨ ਮਾਹਿਰ ਇਸ ਨੂੰ ਇੱਕ 'ਬੋਲਡ ਸਟੇਟਮੈਂਟ' ਅਤੇ 'ਫਿਊਚਰਿਸਟਿਕ' ਡਿਜ਼ਾਈਨ ਮੰਨ ਰਹੇ ਹਨ, ਉੱਥੇ ਹੀ ਆਮ ਲੋਕ ਸੋਸ਼ਲ ਮੀਡੀਆ 'ਤੇ ਇਸ ਦਾ ਜੰਮ ਕੇ ਮਜ਼ਾਕ ਉਡਾ ਰਹੇ ਹਨ। ਯੂਜ਼ਰਸ ਇਸ ਨੂੰ 'ਪੈਸਿਆਂ ਦੀ ਬਰਬਾਦੀ' ਦੱਸ ਰਹੇ ਹਨ। ਕੁਝ ਯੂਜ਼ਰਸ ਨੇ ਚੁਟਕੀ ਲੈਂਦਿਆਂ ਲਿਖਿਆ, "ਅੱਧੀ ਚੱਪਲ ਪਹਿਨ ਕੇ ਪੂਰਾ ਸਟਾਈਲ, ਅੱਧਾ ਪੈਰ ਨੰਗਾ ਅਤੇ ਅੱਧਾ ਦਿਮਾਗ ਖ਼ਰਾਬ"।

ਸਿਰਫ਼ ਮਜ਼ਾਕ ਹੀ ਨਹੀਂ, ਸਗੋਂ ਸਿਹਤ ਮਾਹਿਰਾਂ ਨੇ ਵੀ ਇਸ ਡਿਜ਼ਾਈਨ 'ਤੇ ਚਿੰਤਾ ਪ੍ਰਗਟਾਈ ਹੈ। ਡਾਕਟਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਲੰਬੇ ਸਮੇਂ ਤੱਕ ਅਜਿਹੀ ਚੱਪਲ ਪਹਿਨਣ ਨਾਲ ਪੈਰਾਂ ਵਿੱਚ ਦਰਦ, ਸੰਤੁਲਨ (Balance) ਵਿਗੜਨ ਅਤੇ ਸੱਟ ਲੱਗਣ ਦਾ ਖ਼ਤਰਾ ਵਧ ਸਕਦਾ ਹੈ। ਭਾਵੇਂ ਪੈਰਿਸ ਫੈਸ਼ਨ ਵੀਕ ਵਿੱਚ ਇਸ ਡਿਜ਼ਾਈਨ ਦੀ ਸ਼ਲਾਘਾ ਹੋਈ ਹੈ, ਪਰ ਆਮ ਲੋਕਾਂ ਲਈ ਇਹ ਚਰਚਾ ਅਤੇ ਹਾਸੇ ਦਾ ਵਿਸ਼ਾ ਬਣੀ ਹੋਈ ਹੈ।