ਪਰਾਵੈਂਗਣੀ ਕਿਰਨਾਂ ਅਤੇ ਵਿਟਾਮਿਨ ਨਾਲ ਖ਼ਤਮ ਕੀਤਾ ਵਾਇਰਸ

ਕੋਲੋਰਾਡੋ –ਇਨਸਾਨੀ ਸਰੀਰ ’ਚ ਕੋਰੋਨਾ ਵਾਇਰਸ ਨੂੰ ਘੱਟ ਕਰਨ ਨੂੰ ਲੈ ਕੇ ਅਮਰੀਕੀ ਵਿਗਿਆਨੀਆਂ ਨੂੰ ਇਕ ਵੱਡੀ ਪ੍ਰਾਪਤੀ ਮਿਲੀ ਹੈ। ਇਸ ਨਵੀਂ ਪ੍ਰਾਪਤੀ ਦੇ ਸਹਾਰੇ ਉਹ ਕੋਰੋਨਾ ਇਨਫੈਕਟਡ ਮਰੀਜ ਦੇ ਸਰੀਰ ’ਚੋਂ ਕੋਰੋਨਾ ਵਾਇਰਸ ਦੀ ਗਿਣਤੀ ’ਚ ਕਮੀ ਲਿਆ ਸਕਦੇ ਹਨ। ਇਸ ਵਾਰ ਇਲਾਜ ਲਈ ਵਿਗਿਆਨੀਆਂ ਨੇ ਸੂਰਜ ਦੀਆਂ ਪਰਾਬੈਂਗਣੀ ਕਿਰਨਾਂ ਅਤੇ ਇਕ ਵਿਟਾਮਿਨ ਦੀ ਮਦਦ ਲਈ ਹੈ।

ਅਮਰੀਕਾ ਦੀ ਕੋਲੋਰਾਡੋ ਸਟੇਟ ਯੂਨੀਵਰਸਿਟੀ ਦੇ ਵਿਗਿਆਨੀਆਂ ਨੇ ਪਲਾਜ਼ਮਾ ਅਤੇ ਖੂਨ ਉਤਪਾਦਾਂ ’ਚ ਕੋਰੋਨਾ ਦੀ ਮਾਤਰਾ ਘਟਾਉਣ ਦਾ ਤਰੀਕਾ ਲੱਭ ਲਿਆ ਹੈ। ਇਨ੍ਹਾਂ ਦਾ ਕਹਿਣਾ ਹੈ ਕਿ ਕੋਰੋਨਾ ਨੂੰ ਵਿਟਾਮਿਨ ਰਾਈਬੋਫਲੇਵਿਨ ਅਤੇ ਪਰਾਬੈਂਗਣੀ ਕਿਰਨਾਂ ਦੇ ਸੰਪਰਕ ’ਚ ਲਿਆਉਣ ਨਾਲ ਇਹ ਘੱਟ ਹੋ ਜਾਂਦਾ ਹੈ। ਵਿਗਿਆਨੀ ਵਿਟਾਮਿਨ ਰਾਈਬੋਫਲੇਵਿਨ ਅਤੇ ਪਰਾਬੈਂਗਣੀ ਕਿਰਨਾਂ ਮਿਲ ਕੇ ਮਨੁੱਖੀ ਪਲਾਜ਼ਮਾ ਅਤੇ ਖੂਨ ਉਤਪਾਦਾਂ ਜਿਵੇਂ ਰੈੱਡ ਬਲੱਡ ਸੈੱਲ, ਪਲੇਟਲੈਟਸ, ਪਲਾਜ਼ਮਾ ਆਦਿ ਨਾਲ ਕੋਰੋਨਾ ਵਾਇਰਸ ਦੀ ਮਾਤਰਾ ਨੂੰ ਘੱਟ ਕਰ ਦਿੰਦੇ ਹਨ।

ਇਹ ਇਕ ਅਜਿਹੀ ਪ੍ਰਾਪਤੀ ਹੈ ਜੋ ਖੂਨ ਚੜ੍ਹਾਉਣ ਦੌਰਾਨ ਵਾਇਰਸ ਦੇ ਪ੍ਰਸਾਰ ਦੇ ਖਦਸ਼ੇ ਨੂੰ ਘਟਾਉਣ ’ਚ ਮਦਦਗਾਰ ਸਾਬਤ ਹੋ ਸਕਦੀ ਹੈ। ਵਿਗਿਆਨੀਆਂ ਨੇ ਕਿਹਾ ਕਿ ਇਹ ਹੁਣ ਵੀ ਪਤਾ ਨਹੀਂ ਚੱਲ ਸਕਿਆ ਹੈ ਕਿ ਕੋਰੋਨਾ ਜਾਂ ਸਾਰਸ ਸੀ. ਓ. ਵੀ.-2 ਖੂਨ ਚੜਾਉਣ ਨਾਲ ਫੈਲਦਾ ਹੈ ਜਾਂ ਨਹੀਂ। ਵਿਗਿਆਨੀਆਂ ਨੇ ਪਲਾਜਮਾ ਦੇ 9 ਅਤੇ 3 ਖੂਨ ਉਤਪਾਦਾਂ ਦੇ ਇਲਾਜ ਲਈ ਮਿਰਾਸੋਲ ਪੈਥੋਜਨ ਰਿਡਕਸ਼ਨ ਟੈਕਨਾਲੌਜੀ ਸਿਸਟਮ ਨਾਂ ਦੇ ਯੰਤਰ ਨੂੰ ਵਿਕਸਿਤ ਕੀਤਾ।

ਅਧਿਐਨ ਦੀ ਸਹਿਤ ਲੇਖਿਕਾ ਇਜਾਬੇਲਾ ਰਗਾਨ ਨੇ ਕਿਹਾ ਕਿ ਉਨ੍ਹਾਂ ਨੇ ਵਾਇਰਸ ਦੀ ਵੱਡੀ ਮਾਤਰਾ ਨੂੰ ਘਟਾਇਆ ਹੈ। ਵਿਟਾਮਿਨ ਰਾਈਬੋਫਲੇਵਿਨ ਅਤੇ ਪਰਾਬੈਂਗਣੀ ਕਿਰਣਾਂ ਕਾਰਣ ਵਾਇਰਸ ਖਤਮ ਹੋ ਗਿਆ ਸੀ। ਸਾਨੂੰ ਪਲਾਜ਼ਮਾ ’ਚ ਉਹ ਦੋਬਾਰਾ ਨਹੀਂ ਮਿਲਿਆ। ਅਧਿਐਨ ਦੇ ਸੀਨੀਅਰ ਲੇਖਕ ਰੇ ਗੁਡਰਿਚ ਵਲੋਂ ਬਣਾਇਆ ਗਿਆ ਇਹ ਯੰਤਰ ਖੂਨ ਉਤਪਾਦ ਜਾਂ ਪਲਾਜ਼ਮਾ ਨੂੰ ਪਰਾਬੈਂਗਣੀ ਕਿਰਣਾਂ ਦੇ ਸੰਪਰਕ ’ਚ ਲਿਆ ਕੇ ਕੰਮ ਕਰਦਾ ਹੈ। ਇਹ ਯੰਤਰ 1980 ਦੇ ਦਹਾਕੇ ’ਚ ਐੱਚ. ਆਈ. ਵੀ. ਮਾਮਲਿਆਂ ਦੇ ਇਲਾਜ ’ਚ ਕੰਮ ਆਇਆ ਸੀ।