ਕੋਰੋਨਾ ਵੈਕਸੀਨ ਬਣਾਉਣ ਲਈ ਅਮਰੀਕਾ ਨੇ ਦਿੱਤੇ 1.6 ਅਰਬ ਡਾਲਰ

ਵਾਸ਼ਿੰਗਟਨ (ਬਿਊਰੋ): ਕੋਰੋਨਾਵਾਇਰਸ ਦੇ ਕਹਿਰ ਨਾਲ ਜੂਝ ਰਹੀ ਦੁਨੀਆ ਲਈ ਚੰਗੀ ਖਬਰ ਹੈ। ਅਮਰੀਕਾ ਨੇ ਕੋਰੋਨਾਵਾਇਰਸ ਵੈਕਸੀਨ ਬਣਾਉਣ ਲਈ 1.6 ਅਰਬ ਡਾਲਰ ਦਾ ਫੰਡ ਮੁਹੱਈਆ ਕਰਾਉਣ ਦਾ ਐਲਾਨ ਕੀਤਾ ਹੈ। ਇਹ ਰਾਸ਼ੀ ਨੋਵਾਵੈਕਸ (Novavax) ਕੰਪਨੀ ਨੂੰ ਦਿੱਤੀ ਜਾਵੇਗੀ। ਅਮਰੀਕਾ ਨੇ ਆਪਣੀ ਰੈਪ ਸਪੀਡ ਮੁਹਿੰਮ ਦੇ ਤਹਿਤ ਹੁਣ ਤੱਕ ਇੰਨੀ ਵੱਡੀ ਰਾਸ਼ੀ ਕਿਸੇ ਕੰਪਨੀ ਨੂੰ ਵੈਕਸੀਨ ਬਣਾਉਣ ਲਈ ਦਿੱਤੀ ਹੈ। ਇਸ ਦੇ ਇਲਾਵਾ ਅਮਰੀਕਾ ਰੇਗੇਨੇਰੋਨ ਕੰਪਨੀ ਨੂੰ ਵੀ 45 ਕਰੋੜ ਡਾਲਰ ਦੀ ਮਦਦ ਦੇ ਰਿਹਾ ਹੈ।

ਇਹ ਕੰਪਨੀ ਕੋਰੋਨਾਵਾਇਰਸ ਇਨਫੈਕਸਨ ਨੂੰ ਰੋਕਣ ਲਈ ਨਵੇਂ ਤਰੀਕੇ ਲੱਭਣ 'ਤੇ ਕੰਮ ਕਰ ਰਹੀ ਹੈ। ਸਮਝੌਤੇ ਦੀਆਂ ਸ਼ਰਤਾਂ ਮੁਤਾਬਕ ਨੋਵਾਵੈਕਸ ਕੰਪਨੀ ਇਸ ਸਾਲ ਦੇ ਅਖੀਰ ਤੱਕ ਅਮਰੀਕਾ ਦੇ ਸਿਹਤ ਅਤੇ ਰੱਖਿਆ ਵਿਭਾਗ ਨੂੰ ਕੋਰੋਨਾਵਾਇਰਸ ਦੀ 10 ਕਰੋੜ ਡੋਜ਼ ਦੇਵੇਗੀ। ਕੰਪਨੀ ਦੇ ਸੀ.ਈ.ਓ. ਸਟੈਨਲੀ ਇਰੈਕ ਨੇ ਕਿਹਾ,''ਅਸੀਂ ਆਪਰੇਸ਼ਨ ਰੈਪ ਸਪੀਡ ਦਾ ਹਿੱਸਾ ਬਣ ਕੇ ਬਹੁਤ ਮਾਣ ਮਹਿਸੂਸ ਕਰ ਰਹੇ ਹਾਂ। ਅਸੀਂ ਜਲਦੀ ਤੋਂ ਜਲਦੀ ਆਪਣੇ ਦੇਸ਼ ਦੀ ਜਨਤਾ ਦੀ ਰੱਖਿਆ ਦੇ ਲਈ ਵੈਕਸੀਨ ਮੁਹੱਈਆ ਕਰਾਵਾਂਗੇ।''

ਪੜ੍ਹੋ ਇਹ ਅਹਿਮ ਖਬਰ- ਵਿਕਟੋਰੀਆ 'ਚ ਕੋਰੋਨਾਵਾਇਰਸ ਦਾ ਕਹਿਰ ਜਾਰੀ, 134 ਨਵੇ ਮਾਮਲੇ ਦਰਜ

ਵੈਕਸੀਨ ਦਾ ਆਖਰੀ ਟ੍ਰਾਈਲ ਜਲਦ
ਨੋਵਾਵੈਕਸ ਕੰਪਨੀ ਦੀ ਵੈਕਸੀਨ ਦੇ ਦੋ ਟ੍ਰਾਇਲ ਪੂਰੇ ਹੋ ਚੁੱਕੇ ਹਨ ਅਤੇ ਆਖਰੀ ਟ੍ਰਾਇਲ ਜਲਦੀ ਹੀ ਹੋਣ ਵਾਲਾ ਹੈ। ਇਸ ਵੈਕਸੀਨ ਦਾ ਨਾਮ NVX-CoV2373 ਹੈ। ਕੰਪਨੀ ਨੇ ਕੀੜਿਆਂ ਦੇ ਸੈੱਲਾਂ ਦੀ ਵਰਤੋਂ ਕਰ ਕੇ ਬਣਾਉਟੀ ਤਰੀਕੇ ਨਾਲ ਕੋਰੋਨਾਵਾਇਰਸ ਦੇ ਹਿੱਸੇ 'ਸਪਾਈਕ ਪ੍ਰੋਟੀਨ' ਨੂੰ ਤਿਆਰ ਕੀਤਾ ਹੈ। ਇਸੇ ਪ੍ਰੋਟੀਨ ਦੀ ਮਦਦ ਨਾਲ ਕੋਰੋਨਾਵਾਇਰਸ ਇਨਸਾਨ ਦੀ ਰੋਗ ਪ੍ਰਤੀਰੋਧਕ ਸਮਰੱਥਾ ਨੂੰ ਉਤੇਜਿਤ ਕਰਨ ਲਈ ਸੈੱਲਾਂ ਵਿਚ ਘੁਸਪੈਠ ਕਰਦਾ ਹੈ।

ਕੰਪਨੀ ਨੇ ਕਿਹਾ ਕਿ ਉਸ ਨੇ ਮੌਸਮੀ ਫਲੂ ਨੂੰ ਠੀਕ ਕਰਨ ਲਈ ਇਸੇ ਤਰ੍ਹਾਂ ਦੀ ਤਕਨੀਕ ਦੀ ਵਰਤੋਂ ਕਰ ਕੇ ਵੈਕਸੀਨ ਤਿਆਰ ਕੀਤੀ ਹੈ ਜੋ ਕਾਫੀ ਅਸਰਦਾਰ ਹੈ। ਅਮਰੀਕਾ ਨੇ ਨੋਵਾਵੈਕਸ ਨੂੰ ਆਕਸਫੋਰਡ ਯੂਨੀਵਰਸਿਟੀ ਨਾਲੋਂ ਵੀ ਜ਼ਿਆਦਾ ਰਾਸ਼ੀ ਦਿੱਤੀ ਹੈ। ਆਕਸਫੋਰਡ ਯੂਨੀਵਰਸਿਟੀ ਨੂੰ 1.2 ਅਰਬ ਡਾਲਰ ਦਿੱਤਾ ਗਿਆ ਸੀ। ਆਪਰੇਸ਼ਨ ਰੈਪ ਸਪੀਡ ਦੇ ਤਹਿਤ ਅਮਰੀਕਾ ਨੂੰ ਆਸ ਹੈ ਕਿ ਵੈਕਸੀਨ ਦੀਆਂ ਕਰੋੜਾਂ ਖੁਰਾਕਾਂ ਸਾਲ 2021 ਤੱਕ ਮੁਹੱਈਆ ਕਰਾਈਆਂ ਜਾ ਸਕਣਗੀਆਂ। ਇੱਥੇ ਦੱਸ ਦਈਏ ਕਿ ਕੋਰੋਨਾਵਾਇਰਸ ਨਾਲ ਦੁਨੀਆ ਭਰ ਵਿਚ ਹੁਣ ਤੱਕ 5.46 ਲੱਖ ਤੋਂ ਵਧੇਰੇ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।