ਓਮੀਕਰੋਨ ਦੀ ਦਹਿਸ਼ਤ, ਯੂਕੇ ਦੇ ਖੋਜੀ ਨਵੇਂ ਐਂਟੀ-ਕੋਵਿਡ-19 ਟੀਕੇ ਕਰ ਰਹੇ ਵਿਕਸਿਤ

ਲੰਡਨ (ਪੀ.ਟੀ.ਆਈ.): ਯੂਕੇ ਵਿੱਚ ਖੋਜੀ ਕੋਵਿਡ-19 ਅਤੇ ਹੋਰ ਕਈ ਬਿਮਾਰੀਆਂ ਖ਼ਿਲਾਫ਼ ਐਮਆਰਐਨਏ ਟੀਕੇ ਅਤੇ ਦਵਾਈਆਂ ਨੂੰ ਤੇਜ਼ੀ ਨਾਲ ਵਿਕਸਿਤ ਕਰਨ ਅਤੇ ਵੱਡੇ ਪੱਧਰ 'ਤੇ ਉਤਪਾਦਨ ਕਰਨ ਲਈ ਨਵੇਂ ਤਰੀਕੇ ਅਪਣਾ ਰਹੇ ਹਨ। ਇਹ ਖੋਜ ਪ੍ਰਾਜੈਕਟ ਨਾਲ ਕੋਵਿਡ-19 ਦੇ ਨਵੇਂ ਰੂਪਾਂ ਅਤੇ ਭਵਿੱਖੀ ਮਹਾਮਾਰੀਆਂ ਦਾ ਮੁਕਾਬਲਾ ਕਰਨ ਲਈ ਤੇਜ਼ੀ ਨਾਲ ਨਵੇਂ ਟੀਕੇ ਵਿਕਸਿਤ ਕਰਨ ਦੀ ਬ੍ਰਿਟੇਨ ਅਤੇ ਵਿਸ਼ਵ ਦੀ ਸਮਰੱਥਾ ਨੂੰ ਵਧਾਏਗੀ। 

ਸ਼ੈਫੀਲਡ ਯੂਨੀਵਰਸਿਟੀ ਨੇ ਐਤਵਾਰ ਨੂੰ ਇੱਕ ਬਿਆਨ ਵਿੱਚ ਕਿਹਾ ਕਿ ਨਵੀਂ ਉਤਪਾਦਨ ਤਕਨਾਲੋਜੀ ਡਰੱਗ ਨਿਰਮਾਤਾਵਾਂ ਨੂੰ ਨਵੇਂ ਟੀਕੇ ਵਿਕਸਿਤ ਕਰਨ ਅਤੇ ਕੈਂਸਰ, ਪਾਚਕ ਵਿਕਾਰ, ਦਿਲ ਸਬੰਧੀ ਬਿਮਾਰੀਆਂ ਅਤੇ ਆਟੋਇਮਿਊਨ ਬਿਮਾਰੀਆਂ ਵਰਗੀਆਂ ਵੱਡੀਆਂ ਬਿਮਾਰੀਆਂ ਦੇ ਇਲਾਜ ਲਈ ਲੋੜੀਂਦੀਆਂ ਆਧੁਨਿਕ ਪ੍ਰਕਿਰਿਆਵਾਂ ਤੱਕ ਤੇਜ਼ੀ ਨਾਲ ਪਹੁੰਚ ਕਰਨ ਦੀ ਆਗਿਆ ਦੇਵੇਗੀ। ਯੂਨੀਵਰਸਿਟੀ ਦੇ ਕੈਮੀਕਲ ਅਤੇ ਬਾਇਓਲਾਜੀਕਲ ਇੰਜਨੀਅਰਿੰਗ ਵਿਭਾਗ ਦੇ ਮੁੱਖ ਖੋਜੀ ਜੋਲਟਨ ਕਿਸ ਨੇ ਕਿਹਾ ਕਿ ਕੋਵਿਡ-19 ਲਈ ਬਣਾਏ ਗਏ ਟੀਕਿਆਂ ਨੇ ਸਾਨੂੰ ਦਿਖਾਇਆ ਕਿ ਆਰਐਨਏ ਤਕਨਾਲੋਜੀ ਦੀ ਵਰਤੋਂ ਕਰਕੇ ਕੀ ਕੀਤਾ ਜਾ ਸਕਦਾ ਹੈ। ਸਾਡੀ ਪੀੜ੍ਹੀ ਦੀਆਂ ਮਹਾਨ ਵਿਗਿਆਨਕ ਪ੍ਰਾਪਤੀਆਂ ਵਿੱਚੋਂ ਇੱਕ, ਆਰ.ਐਨ.ਏ (ਰਾਇਬੋਨਿਊਕਲਿਕ ਐਸਿਡ) ਤਕਨਾਲੋਜੀ ਨੇ ਕਿਸੇ ਟੀਕੇ ਨੂੰ ਸਾਲਾਂ ਦੀ ਬਜਾਏ ਮਹੀਨਿਆਂ ਵਿੱਚ ਬਣਾਉਣ ਦੀ ਸਮਰੱਥਾ ਦਿਖਾਈ ਹੈ। 

ਪੜ੍ਹੋ ਇਹ ਅਹਿਮ ਖਬਰ- ਕੋਵਿਡ ਅਧਿਐਨ : ਜਾਣੋ ਹਵਾ ਰਾਹੀਂ ਬਿਮਾਰੀ ਕਿਵੇਂ ਫੈਲਦੀ ਹੈ

ਉਹਨਾਂ ਨੇ ਅੱਗੇ ਕਿਹਾ ਕਿ ਇਹ ਇਕ ਬਹੁਮੁੱਖੀ ਅਤੇ ਪਰਿਵਰਤਨਕਾਰੀ ਤਕਨੀਕ ਹੈ ਜਿਸ ਦੀ ਵਰਤੋਂ ਹੋਰ ਬੀਮਾਰੀਆਂ ਲਈ ਟੀਕੇ ਅਤੇ ਇਲਾਜ ਵਿਕਸਿਤ ਕਰਨ ਲਈ ਕੀਤੀ ਜਾ ਸਕਦੀ ਹੈ। ਇਸ ਦੇ ਲਈ ਸਾਨੂੰ ਇਹ ਯਕੀਨੀ ਬਣਾਉਣ ਦੀ ਜ਼ਰੂਰਤ ਹੈ ਕਿ ਦੁਨੀਆ ਭਰ ਦੇ ਖੋਜੀਆਂ ਦੀ ਸਭ ਤੋਂ ਉੱਨਤ ਆਰਐਨਏ ਨਿਰਮਾਣ ਪ੍ਰਕਿਰਿਆ ਤੱਕ ਪਹੁੰਚ ਹੋਵੇ।