ਫਰਾਂਸ: ਤਿੰਨ ਲੋਕਾਂ ਦੀ ਹੱਤਿਆ ਦੇ ਦੋਸ਼ ਵਿੱਚ ਟਿਊਨੀਸ਼ੀਆ ਦੇ ਕੱਟੜਪੰਥੀ ਨੂੰ ਉਮਰ ਕੈਦ ਦੀ ਸਜ਼ਾ

ਲਿਓਨ (ਏਪੀ) : ਫਰਾਂਸ ਦੇ ਨਾਇਸ ਸ਼ਹਿਰ 'ਚ 2020 'ਚ ਤਿੰਨ ਲੋਕਾਂ ਦੇ ਕਤਲ ਦੇ ਦੋਸ਼ 'ਚ ਬੁੱਧਵਾਰ ਨੂੰ ਇੱਕ ਟਿਊਨੀਸ਼ੀਅਨ ਨਾਗਰਿਕ ਨੂੰ ਉਮਰ ਕੈਦ ਦੀ ਸਜ਼ਾ ਸੁਣਾਈ ਗਈ। ਇਹ ਸਜ਼ਾ ਪੈਰੋਲ ਤੋਂ ਬਿਨਾਂ ਹੈ ਤੇ ਸ਼ਾਇਦ ਫਰਾਂਸ 'ਚ ਹੁਣ ਤੱਕ ਦੀ ਸਭ ਤੋਂ ਸਖ਼ਤ ਸਜ਼ਾ ਹੈ।

ਅੱਤਵਾਦੀ ਹਮਲੇ ਵਿੱਚ ਬ੍ਰਾਹਮ ਔਇਸਾਉਈ (25) 'ਤੇ ਕਤਲ ਤੇ ਕਤਲ ਦੀ ਕੋਸ਼ਿਸ਼ ਦੇ ਦੋਸ਼ ਲਗਾਏ ਗਏ ਸਨ। ਪੈਰਿਸ 'ਚ ਆਪਣੇ ਮੁਕੱਦਮੇ ਦੌਰਾਨ ਉਸਨੇ ਆਪਣਾ ਦੋਸ਼ ਕਬੂਲ ਕਰ ਲਿਆ। ਪੁਲਸ ਵੱਲੋਂ ਪੁੱਛਗਿੱਛ ਦੌਰਾਨ, ਉਸਨੇ ਦੱਸਿਆ ਸੀ ਕਿ ਉਹ ਪੱਛਮੀ ਦੇਸ਼ਾਂ ਵੱਲੋਂ ਦੁਨੀਆ ਭਰ 'ਚ ਮੁਸਲਮਾਨਾਂ ਦੇ ਕਤਲੇਆਮ ਦਾ ਬਦਲਾ ਲੈਣਾ ਚਾਹੁੰਦਾ ਸੀ। ਨਾਇਸ 'ਚ ਇੱਕ ਬੇਸਿਲਿਕਾ 'ਚ ਤਿੰਨ ਲੋਕਾਂ ਦੀ ਹੱਤਿਆ ਉਸ ਸਾਲ ਇਸਲਾਮੀ ਕੱਟੜਪੰਥੀ ਨਾਲ ਜੁੜੇ ਕਈ ਹਮਲਿਆਂ 'ਚੋਂ ਇੱਕ ਸੀ। ਦੋਸ਼ੀ ਔਇਸਾਉਈ ਨੇ 29 ਅਕਤੂਬਰ 2020 ਨੂੰ 60 ਸਾਲਾ ਨਦੀਨ ਵਿਨਸੈਂਟ, 44 ਸਾਲਾ ਫ੍ਰੈਂਚ-ਬ੍ਰਾਜ਼ੀਲੀ ਔਰਤ ਸਿਮੋਨ ਬੈਰੇਟੋ ਅਤੇ ਚਰਚ ਵਰਕਰ ਵਿਨਸੈਂਟ ਲੋਸੇਸ (55) ਦੀ ਹੱਤਿਆ ਕਰ ਦਿੱਤੀ।

ਹਮਲੇ ਦੌਰਾਨ, ਉਸਨੇ "ਅੱਲ੍ਹਾਹੂ ਅਕਬਰ" ਦਾ ਨਾਅਰਾ ਮਾਰਿਆ ਅਤੇ ਚਾਕੂ ਲਹਿਰਾਇਆ, ਜਦੋਂ ਪੁਲਸ ਅਧਿਕਾਰੀਆਂ ਨੇ ਉਸ 'ਤੇ ਗੋਲੀਬਾਰੀ ਕਰ ਦਿੱਤੀ, ਜਿਸ ਨਾਲ ਉਹ ਗੰਭੀਰ ਜ਼ਖਮੀ ਹੋ ਗਿਆ। ਇਹ ਹਮਲਾ ਦੋ ਮਹੀਨਿਆਂ ਤੋਂ ਵੀ ਘੱਟ ਸਮੇਂ ਵਿੱਚ ਤੀਜਾ ਸੀ ਜਿਸਦਾ ਦੋਸ਼ ਫਰਾਂਸੀਸੀ ਅਧਿਕਾਰੀਆਂ ਨੇ ਇਸਲਾਮੀ ਕੱਟੜਪੰਥੀਆਂ 'ਤੇ ਲਗਾਇਆ ਸੀ। ਇਸ ਘਟਨਾ ਨੇ ਫਰਾਂਸੀਸੀ ਸਰਕਾਰ ਨੂੰ ਆਪਣੀ ਸੁਰੱਖਿਆ ਅਲਰਟ ਨੂੰ ਵੱਧ ਤੋਂ ਵੱਧ ਪੱਧਰ ਤੱਕ ਵਧਾਉਣ ਲਈ ਪ੍ਰੇਰਿਤ ਕੀਤਾ। ਇਹ ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਫਰਾਂਸ 'ਚ 2015 'ਚ ਵਿਅੰਗ ਅਖ਼ਬਾਰ 'ਚਾਰਲੀ ਹੇਬਦੋ' ਦੇ ਦਫ਼ਤਰ 'ਤੇ ਹੋਏ ਹਮਲਿਆਂ ਦੇ ਸਬੰਧ 'ਚ ਮੁਕੱਦਮਾ ਚੱਲ ਰਿਹਾ ਸੀ। ਅਖ਼ਬਾਰ ਨੇ ਪੈਗੰਬਰ ਦੇ ਕਾਰਟੂਨ ਪ੍ਰਕਾਸ਼ਿਤ ਕੀਤੇ ਸਨ।