ਮਹਾਫਲੌਪ ਹੋਈ ਟਰੰਪ ਦੀ ਘਰਵਾਲੀ 'ਤੇ ਬਣੀ ਫਿਲਮ, ਵਿਕੀ ਸਿਰਫ 1 ਟਿਕਟ
Sunday, Feb 01, 2026 - 03:04 PM (IST)
ਮਨੋਰੰਜਨ ਡੈਸਕ - ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟ੍ਰੰਪ ਦੀ ਪਤਨੀ ਅਤੇ ਫਸਟ ਲੇਡੀ ਮੇਲਾਨੀਆ ਟ੍ਰੰਪ ਦੀ ਡਾਕੂਮੈਂਟਰੀ ਫਿਲਮ 'ਮੇਲਾਨੀਆ' ਬ੍ਰਿਟੇਨ ਦੇ ਸਿਨੇਮਾਘਰਾਂ ’ਚ ਬੁਰੀ ਤਰ੍ਹਾਂ ਫਲਾਪ ਸਾਬਤ ਹੋਈ ਹੈ। ਭਾਰੀ ਪ੍ਰਚਾਰ ਅਤੇ ਕਰੋੜਾਂ ਰੁਪਏ ਖਰਚਣ ਦੇ ਬਾਵਜੂਦ, ਇਸ ਡਾਕੂਮੈਂਟਰੀ ਨੂੰ ਦੇਖਣ ਲਈ ਦਰਸ਼ਕ ਬਿਲਕੁਲ ਵੀ ਨਹੀਂ ਪਹੁੰਚੇ।
ਟਿਕਟਾਂ ਦੀ ਵਿਕਰੀ ਨੇ ਉਡਾਏ ਹੋਸ਼
ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਲੰਡਨ ’ਚ ਇਕ ਪ੍ਰੀਮੀਅਰ ਸ਼ੋਅ ਲਈ ਸਿਰਫ਼ 1 ਟਿਕਟ ਵਿਕੀ। ਇਸੇ ਤਰ੍ਹਾਂ ਸ਼ਾਮ ਦੇ ਇਕ ਹੋਰ ਸ਼ੋਅ ’ਚ ਕੇਵਲ 2 ਟਿਕਟਾਂ ਦੀ ਵਿਕਰੀ ਹੋਈ। ਬ੍ਰਿਟੇਨ ਦੀਆਂ ਕਈ ਥਾਵਾਂ ਜਿਵੇਂ ਬਲੈਕਬਰਨ, ਕੈਸਲਫੋਰਡ ਅਤੇ ਹੈਮਿਲਟਨ ’ਚ 28 ਸਕ੍ਰੀਨਿੰਗਜ਼ ਅਜਿਹੀਆਂ ਸਨ, ਜਿੱਥੇ ਇਕ ਵੀ ਐਡਵਾਂਸ ਬੁਕਿੰਗ ਨਹੀਂ ਹੋਈ। ਕਈ ਸਿਨੇਮਾਘਰਾਂ ’ਚ ਸੀਟਾਂ ਪੂਰੀ ਤਰ੍ਹਾਂ ਖਾਲੀ ਰਹੀਆਂ।
ਟ੍ਰੰਪ ਦੇ ਦਾਅਵੇ ਨਿਕਲੇ ਖੋਖਲੇ
ਰਾਸ਼ਟਰਪਤੀ ਡੋਨਾਲਡ ਟ੍ਰੰਪ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਟਰੁੱਥ ਸੋਸ਼ਲ' 'ਤੇ ਦਾਅਵਾ ਕੀਤਾ ਸੀ ਕਿ ਇਸ ਫਿਲਮ ਦੀਆਂ ਟਿਕਟਾਂ ਬਹੁਤ ਤੇਜ਼ੀ ਨਾਲ ਵਿਕ ਰਹੀਆਂ ਹਨ ਅਤੇ ਇਹ 'ਜ਼ਰੂਰ ਦੇਖਣ ਯੋਗ' ਹੈ ਪਰ ਬ੍ਰਿਟੇਨ ’ਚ ਅਸਲੀਅਤ ਇਸ ਦੇ ਬਿਲਕੁਲ ਉਲਟ ਨਿਕਲੀ। ਸੋਸ਼ਲ ਮੀਡੀਆ ਯੂਜ਼ਰਸ ਇਸ ਨੂੰ ਇਕ 'ਸ਼ਰਮਨਾਕ ਫਲਾਪ' ਦੱਸ ਰਹੇ ਹਨ ਅਤੇ ਟ੍ਰੰਪ ਦੇ ਦੋਸਤ ਨਾਈਜੇਲ ਫਰਾਜ ਦਾ ਨਾਂ ਲੈ ਕੇ ਮਜ਼ਾਕ ਉਡਾ ਰਹੇ ਹਨ ਕਿ ਸ਼ਾਇਦ ਉਹ ਇਕ ਟਿਕਟ ਉਨ੍ਹਾਂ ਨੇ ਹੀ ਖਰੀਦੀ ਹੋਵੇਗੀ।
600 ਕਰੋੜ ਤੋਂ ਵੱਧ ਦਾ ਨਿਵੇਸ਼
ਐਮਾਜ਼ੋਨ MGM ਸਟੂਡੀਓਜ਼ ਨੇ ਇਸ ਡਾਕੂਮੈਂਟਰੀ ਦੇ ਅਧਿਕਾਰਾਂ ਲਈ ਲਗਭਗ 340 ਕਰੋੜ ਰੁਪਏ (40 ਮਿਲੀਅਨ ਡਾਲਰ) ਚੁਕਾਏ ਸਨ ਅਤੇ ਇਸ ਦੇ ਪ੍ਰਮੋਸ਼ਨ 'ਤੇ ਵਾਧੂ 300 ਕਰੋੜ ਰੁਪਏ (35 ਮਿਲੀਅਨ ਡਾਲਰ) ਖਰਚ ਕੀਤੇ ਗਏ ਹਨ। ਇਹ ਫਿਲਮ 2025 ’ਚ ਟ੍ਰੰਪ ਦੀ ਜਿੱਤ ਤੋਂ ਬਾਅਦ ਦੇ 20 ਦਿਨਾਂ ਦੀਆਂ ਘਟਨਾਵਾਂ, ਵ੍ਹਾਈਟ ਹਾਊਸ ’ਚ ਉਨ੍ਹਾਂ ਦੀ ਵਾਪਸੀ ਅਤੇ ਉਨ੍ਹਾਂ ਦੀ ਨਿੱਜੀ ਜ਼ਿੰਦਗੀ 'ਤੇ ਕੇਂਦਰਿਤ ਹੈ।
ਜਨਤਾ ਵੱਲੋਂ ਵਿਰੋਧ
ਸਿਨੇਮਾ ਚੇਨ 'ਵਿਊ' (Vue) ਦੇ ਮੁੱਖ ਕਾਰਜਕਾਰੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਜਨਤਾ ਵੱਲੋਂ ਕਈ ਅਜਿਹੇ ਈਮੇਲ ਮਿਲੇ ਹਨ ਜਿਨ੍ਹਾਂ ’ਚ ਇਸ ਫਿਲਮ ਨੂੰ ਦਿਖਾਉਣ ਦਾ ਵਿਰੋਧ ਕੀਤਾ ਗਿਆ ਸੀ। ਬ੍ਰਿਟਿਸ਼ ਦਰਸ਼ਕਾਂ ’ਚ ਟ੍ਰੰਪ ਪਰਿਵਾਰ ਪ੍ਰਤੀ ਪਹਿਲਾਂ ਹੀ ਮਿਲੇ-ਜੁਲੇ ਵਿਚਾਰ ਸਨ ਅਤੇ ਇਸ ਡਾਕੂਮੈਂਟਰੀ ਨੇ ਉਨ੍ਹਾਂ ਨੂੰ ਬਿਲਕੁਲ ਵੀ ਪ੍ਰਭਾਵਿਤ ਨਹੀਂ ਕੀਤਾ। ਹੁਣ ਐਮਾਜ਼ੋਨ ਇਸ ਨੂੰ ਆਪਣੇ ਪ੍ਰਾਈਮ ਵੀਡੀਓ ਪਲੇਟਫਾਰਮ 'ਤੇ ਸਟ੍ਰੀਮ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ।
