ਥਾਈਲੈਂਡ ਦੇ ਰਾਜਾ ਨੇ ਆਪਣੀ ਬੌਡੀਗਾਰਡ ਨਾਲ ਰਚਾਇਆ ਵਿਆਹ, ਤਸਵੀਰਾਂ

ਬੈਂਕਾਕ (ਬਿਊਰੋ)— ਆਪਣੇ ਅਧਿਕਾਰਕ ਰਾਜਤਿਲਕ ਤੋਂ ਕੁਝ ਦਿਨ ਪਹਿਲਾਂ ਥਾਈਲੈਂਡ ਦੇ ਰਾਜਾ ਮਹਾ ਵਜੀਰਾਲੋਂਗਕੋਰਨ ਨੇ ਬੁੱਧਵਾਰ ਨੂੰ ਆਪਣੀ ਨਿੱਜੀ ਫੋਰਸ ਦੀ ਡਿਪਟੀ ਹੈੱਡ ਨਾਲ ਵਿਆਹ ਕਰ ਲਿਆ। ਉਨ੍ਹਾਂ ਨੇ ਆਪਣੀ ਪਤਨੀ ਨੂੰ ਰਾਣੀ ਸੁਥਿਦਾ ਦੀ ਉਪਾਧੀ ਦੇ ਦਿੱਤੀ। ਰੋਇਲ ਗਜਟ ਵਿਚ ਇਸ ਦਾ ਐਲਾਨ ਕਰ ਦਿੱਤਾ ਗਿਆ। ਬੁੱਧਵਾਰ ਨੂੰ ਵਿਆਹ ਸਮਾਰੋਹ ਨਾਲ ਸਬੰਧਤ ਫੁਟੇਜ ਟੀ.ਵੀ. ਚੈਨਲਾਂ 'ਤੇ ਪ੍ਰਸਾਰਿਤ ਕੀਤੀ ਗਈ। 

ਥਾਈਲੈਂਡ ਦੇ ਲੋਕ ਅਚਾਨਕ ਹੋਏ ਇਸ ਵਿਆਹ ਕਾਰਨ ਹੈਰਾਨ ਹਨ। 66 ਸਾਲਾ ਵਜੀਰਾਲੋਂਗਕੋਰਨ ਨੂੰ ਰਾਜਾ ਰਾਮ ਐਕਸ ਵੀ ਕਿਹਾ ਜਾਂਦਾ ਹੈ। ਉਹ ਆਪਣੇ ਪਿਤਾ ਰਾਜਾ ਭੂਮੀਬੋਲ ਅਦੁਲਿਯਾਦੇਜ ਦੀ ਅਕਤੂਬਰ 2016 ਵਿਚ ਮੌਤ ਦੇ ਬਾਅਦ ਸੰਵਿਧਾਨਿਕ ਸਮਰਾਟ ਬਣੇ ਸਨ। ਉਨ੍ਹਾਂ ਦੇ ਪਿਤਾ ਨੇ ਗੱਦੀ 'ਤੇ 70 ਸਾਲ ਤੱਕ ਸ਼ਾਸਨ ਕੀਤਾ। ਵਜੀਰਾਲੋਂਗਕੋਰਨ ਨੂੰ ਸ਼ਨੀਵਾਰ ਨੂੰ ਬੌਧ ਅਤੇ ਬ੍ਰਾਹਮਣ ਸਮਾਰੋਹ ਦੇ ਬਾਅਦ ਅਧਿਕਾਰਕ ਰੂਪ ਨਾਲ ਤਾਜ ਪਵਾਇਆ ਜਾਵੇਗਾ। ਇਸ ਦੇ ਅਗਲੇ ਦਿਨ ਪੂਰੇ ਬੈਂਕਾਕ ਵਿਚ ਇਕ ਜਲੂਸ ਕੱਢਿਆ ਜਾਵੇਗਾ। 

ਸਾਲ 2014 ਵਿਚ ਵਜੀਰਾਲੋਂਗਕੋਰਨ ਨੇ ਪਹਿਲਾਂ ਥਾਈ ਏਅਰਵੇਜ਼ ਵਿਚ ਫਲਾਈਟ ਅਟੈਡੈਂਟ ਰਹਿ ਚੁੱਕੀ ਸੁਥਿਦਾ ਤਿਥਜਈ ਨੂੰ ਬੌਡੀਗਾਰਡ ਯੂਨਿਟ ਦੀ ਡਿਪਟੀ ਕਮਿਸ਼ਨਰ ਨਿਯੁਕਤ ਕੀਤਾ ਸੀ। ਕੁਝ ਸ਼ਾਹੀ ਲੋਕਾਂ ਅਤੇ ਵਿਦੇਸ਼ੀ ਮੀਡੀਆ ਨੇ ਕਈ ਵਾਰ ਰਾਜਾ ਵਜੀਰਾਲੋਂਗਕੋਰਨ ਦਾ ਨਾਮ ਸੁਥਿਦਾ ਦੇ ਨਾਲ ਜੋੜਿਆ ਸੀ।

ਭਾਵੇਂਕਿ ਇਸ ਤੋਂ ਪਹਿਲਾਂ ਰਾਜਮਹਿਲ ਨੇ ਕਦੇ ਵੀ ਦੋਹਾਂ ਵਿਚਾਲੇ ਸੰਬੰਧਾਂ ਨੂੰ ਸਵੀਕਾਰ ਨਹੀਂ ਕੀਤਾ ਸੀ। ਦਸੰਬਰ 2016 ਵਿਚ ਵਜੀਰਾਲੋਂਗਕੋਰਨ ਨੇ ਸੁਥਿਦਾ ਨੂੰ ਰੋਇਲ ਥਾਈ ਆਰਮੀ ਦਾ ਫੁੱਲ ਜਨਰਲ ਬਣਾ ਦਿੱਤਾ। ਇਸ ਦੇ ਬਾਅਦ ਸੁਥਿਦਾ ਨੂੰ 2017 ਵਿਚ ਰਾਜਾ ਦੇ ਨਿੱਜੀ ਸੁਰੱਖਿਆ ਬਲ ਦਾ ਡਿਪਟੀ ਕਮਾਂਡਰ ਬਣਾਇਆ ਗਿਆ। 

ਇੱਥੇ ਦੱਸ ਦਈਏ ਕਿ ਵਜੀਰਾਲੋਂਗਕੋਰਨ ਇਸ ਤੋਂ ਪਹਿਲਾਂ ਤਿੰਨ ਵਿਆਹ ਕਰ ਚੁੱਕੇ ਹਨ। ਜਿਸ ਤੋਂ ਉਨ੍ਹਾਂ ਦੇ 7 ਬੱਚੇ ਹਨ। ਵਿਆਹ ਵਿਚ ਮੌਜੂਦ ਮਹਾਨ ਲੋਕਾਂ ਵਿਚ ਪ੍ਰਥੁਥ ਚਾਨ-ਓਖਾ ਮੌਜੂਦ ਸਨ। ਉਹ ਮਿਲਟਰੀ ਜੁੰਟਾ ਦੇ ਨੇਤਾ ਹਨ ਜੋ ਸਾਲ 2014 ਦੇ ਫੌਜ ਦੇ ਤਖਤਾ ਪਲਟ ਦੇ ਬਾਅਦ ਤੋਂ ਥਾਈਲੈਂਡ ਨੂੰ ਚਲਾ ਰਹੇ ਹਨ।

ਇਸ ਦੇ ਇਲਾਵਾ ਵਿਆਹ ਵਿਚ ਸ਼ਾਹੀ ਪਰਿਵਾਰ ਦੇ ਹੋਰ ਮੈਂਬਰ ਅਤੇ ਮਹਿਲ ਦੇ ਸਲਾਹਕਾਰ ਵੀ ਮੌਜੂਦ ਸਨ। ਰਾਜਾ ਨੇ ਆਪਣੇ ਪਿਤਾ ਦੀ ਮੌਤ ਦੇ ਬਾਅਦ ਰਾਜਗੱਦੀ ਸੰਭਾਲੀ ਸੀ। ਪਰ ਉਨ੍ਹਾਂ ਦਾ ਰਸਮੀ ਰਾਜਤਿਲਕ ਰਾਜਾ ਭੂਮੀਬੋਲ ਦੀ ਮੌਤ ਦੀ ਸੋਗ ਦੀ ਮਿਆਦ ਪੂਰੀ ਹੋਣ ਦੇ ਬਾਅਦ ਪਿਛਲੇ ਸਾਲ ਹੋਇਆ।