ਸਾਊਦੀ ਗਠਜੋੜ ਨੇ Yemen 'ਤੇ ਮੁੜ ਕਰ'ਤੀ Air Strikes! ਫਰਾਰ ਹੋਇਆ ਵੱਖਵਾਦੀ ਆਗੂ ਅਲ-ਜ਼ੁਬੈਦੀ

ਅਦਨ/ਰਿਆਦ : ਯਮਨ 'ਚ ਜਾਰੀ ਗ੍ਰਹਿ ਯੁੱਧ ਦਰਮਿਆਨ ਸਾਊਦੀ ਅਰਬ ਦੀ ਅਗਵਾਈ ਵਾਲੇ ਗਠਜੋੜ ਨੇ ਦੱਖਣੀ ਸੂਬੇ 'ਧਾਲੇ' (Dhale) 'ਚ ਵੱਖਵਾਦੀ ਤਾਕਤਾਂ 'ਤੇ ਵੱਡੇ ਹਵਾਈ ਹਮਲੇ ਕੀਤੇ ਹਨ। ਇਹ ਕਾਰਵਾਈ ਦੱਖਣੀ ਟ੍ਰਾਂਜ਼ੀਸ਼ਨਲ ਕੌਂਸਲ (STC) ਦੇ ਮੁਖੀ ਐਦਾਰਸ ਅਲ-ਜ਼ੁਬੈਦੀ ਦੇ ਰਹੱਸਮਈ ਢੰਗ ਨਾਲ ਫਰਾਰ ਹੋਣ ਤੋਂ ਬਾਅਦ ਕੀਤੀ ਗਈ ਹੈ।

ਗੱਲਬਾਤ ਤੋਂ ਪਹਿਲਾਂ ਹੋਇਆ ਫਰਾਰ
ਸੂਤਰਾਂ ਅਨੁਸਾਰ, ਅਲ-ਜ਼ੁਬੈਦੀ ਨੇ ਮੰਗਲਵਾਰ ਰਾਤ ਨੂੰ ਅਦਨ ਸ਼ਹਿਰ ਤੋਂ ਰਿਆਦ ਵਿੱਚ ਹੋਣ ਵਾਲੀ ਸ਼ਾਂਤੀ ਵਾਰਤਾ ਲਈ ਰਵਾਨਾ ਹੋਣਾ ਸੀ, ਪਰ ਉਹ ਜਹਾਜ਼ ਵਿੱਚ ਸਵਾਰ ਹੋਣ ਦੀ ਬਜਾਏ ਕਿਸੇ ਅਣਪਛਾਤੀ ਥਾਂ 'ਤੇ ਚਲਾ ਗਿਆ। ਗਠਜੋੜ ਨੂੰ ਸੂਚਨਾ ਮਿਲੀ ਸੀ ਕਿ ਅਲ-ਜ਼ੁਬੈਦੀ ਨੇ ਬਖਤਰਬੰਦ ਗੱਡੀਆਂ, ਭਾਰੀ ਹਥਿਆਰਾਂ ਅਤੇ ਗੋਲਾ-ਬਾਰੂਦ ਸਮੇਤ ਇੱਕ ਵੱਡੀ ਫੌਜ ਤਿਆਰ ਕੀਤੀ ਹੈ। ਇਸ ਖਤਰੇ ਨੂੰ ਦੇਖਦੇ ਹੋਏ ਗਠਜੋੜ ਨੇ ਸਵੇਰੇ 4 ਵਜੇ 'ਪ੍ਰੀ-ਐਂਪਟਿਵ ਸਟ੍ਰਾਈਕਸ' (ਪਹਿਲਾਂ ਹੀ ਹਮਲਾ ਕਰਨਾ) ਕਰਕੇ ਉਨ੍ਹਾਂ ਦੀਆਂ ਤਿਆਰੀਆਂ ਨੂੰ ਨਾਕਾਮ ਕਰ ਦਿੱਤਾ।

ਦੇਸ਼ ਧ੍ਰੋਹ ਦਾ ਮਾਮਲਾ ਤੇ ਸਿਆਸੀ ਹਲਚਲ 
ਇਸ ਘਟਨਾ ਤੋਂ ਬਾਅਦ ਯਮਨ ਦੀ ਅੰਤਰਰਾਸ਼ਟਰੀ ਪੱਧਰ 'ਤੇ ਮਾਨਤਾ ਪ੍ਰਾਪਤ ਸਰਕਾਰ ਦੀ ਪ੍ਰੈਜ਼ੀਡੈਂਸ਼ੀਅਲ ਲੀਡਰਸ਼ਿਪ ਕੌਂਸਲ ਦੇ ਮੁਖੀ ਰਸ਼ਾਦ ਅਲ-ਅਲੀਮੀ ਨੇ ਅਲ-ਜ਼ੁਬੈਦੀ ਨੂੰ 'ਉੱਚ ਦੇਸ਼ ਧ੍ਰੋਹ' (High Treason) ਦੇ ਦੋਸ਼ 'ਚ ਕੌਂਸਲ ਤੋਂ ਬਰਖਾਸਤ ਕਰ ਦਿੱਤਾ ਹੈ। ਅਟਾਰਨੀ ਜਨਰਲ ਨੂੰ ਉਸ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਅਤੇ ਜਾਂਚ ਸ਼ੁਰੂ ਕਰਨ ਦੇ ਹੁਕਮ ਦਿੱਤੇ ਗਏ ਹਨ। ਦੂਜੇ ਪਾਸੇ, STC ਨੇ ਦਾਅਵਾ ਕੀਤਾ ਹੈ ਕਿ ਅਲ-ਜ਼ੁਬੈਦੀ ਅਦਨ 'ਚ ਹੀ ਹੈ ਤੇ ਸੁਰੱਖਿਆ ਕਾਰਵਾਈਆਂ ਦੀ ਨਿਗਰਾਨੀ ਕਰ ਰਿਹਾ ਹੈ।

ਕੀ ਹੈ ਵਿਵਾਦ?
STC ਪਹਿਲਾਂ ਯਮਨ ਸਰਕਾਰ ਦੇ ਨਾਲ ਮਿਲ ਕੇ ਹੂਤੀ ਬਾਗੀਆਂ ਵਿਰੁੱਧ ਲੜ ਰਹੀ ਸੀ, ਪਰ ਦਸੰਬਰ 'ਚ ਉਨ੍ਹਾਂ ਨੇ ਦੱਖਣੀ ਯਮਨ ਨੂੰ ਇੱਕ ਆਜ਼ਾਦ ਦੇਸ਼ ਬਣਾਉਣ ਲਈ ਸਰਕਾਰੀ ਫੌਜਾਂ ਵਿਰੁੱਧ ਮੋਰਚਾ ਖੋਲ੍ਹ ਦਿੱਤਾ। ਯੂਨਾਈਟਿਡ ਅਰਬ ਅਮੀਰਾਤ (UAE) ਵੱਲੋਂ ਸਮਰਥਿਤ ਇਸ ਗਰੁੱਪ ਨੇ ਹਾਲ ਹੀ ਵਿੱਚ ਹਦਰਮੌਤ ਅਤੇ ਮਹਰਾ ਵਰਗੇ ਅਹਿਮ ਇਲਾਕਿਆਂ 'ਤੇ ਕਬਜ਼ਾ ਕੀਤਾ ਸੀ, ਜਿਨ੍ਹਾਂ ਨੂੰ ਬਾਅਦ 'ਚ ਸਰਕਾਰੀ ਫੌਜਾਂ ਨੇ ਸਾਊਦੀ ਹਵਾਈ ਹਮਲਿਆਂ ਦੀ ਮਦਦ ਨਾਲ ਵਾਪਸ ਲੈ ਲਿਆ।

ਸਾਊਦੀ ਗਠਜੋੜ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਯਮਨ 'ਚ ਕਿਸੇ ਵੀ ਤਰ੍ਹਾਂ ਦੇ ਟਕਰਾਅ ਨੂੰ ਵਧਣ ਨਹੀਂ ਦੇਣਗੇ ਅਤੇ ਸ਼ਾਂਤੀ ਵਾਰਤਾ ਲਈ ਕੋਸ਼ਿਸ਼ਾਂ ਜਾਰੀ ਰੱਖਣਗੇ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e