ਖ਼ਤਮ ਹੋਵੇਗੀ ਜੰਗ ! ਮਾਰਚ ਮਹੀਨੇ ਹੋਵੇਗੀ ਰੂਸ, ਯੂਕ੍ਰੇਨ ਤੇ ਅਮਰੀਕਾ ਵਿਚਾਲੇ ਗੱਲਬਾਤ

ਇੰਟਰਨੈਸ਼ਨਲ ਡੈਸਕ- ਯੂਕ੍ਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਂਸਕੀ ਨੇ ਦੱਸਿਆ ਕਿ ਯੂਕ੍ਰੇਨ, ਅਮਰੀਕਾ ਅਤੇ ਰੂਸ ਦੇ ਪ੍ਰਤੀਨਿਧ ਮੰਡਲਾਂ ਵਿਚਾਲੇ ਅਗਲੇ ਦੌਰ ਦੀ ਗੱਲਬਾਤ ਮਾਰਚ ਦੇ ਸ਼ੁਰੂ ਵਿੱਚ ਹੋਣ ਦੀ ਸੰਭਾਵਨਾ ਹੈ। ਇਸ ਵੱਡੀ ਬੈਠਕ ਤੋਂ ਪਹਿਲਾਂ ਯੂਕ੍ਰੇਨ ਦੇ ਮੁੱਖ ਗੱਲਬਾਤਕਾਰ ਅਤੇ ਰਾਸ਼ਟਰੀ ਸੁਰੱਖਿਆ ਤੇ ਰੱਖਿਆ ਪਰਿਸ਼ਦ ਦੇ ਸਕੱਤਰ ਰੁਸਤਮ ਉਮੇਰੋਵ, ਵੀਰਵਾਰ ਨੂੰ ਜਨੇਵਾ ਵਿੱਚ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਦੂਤਾਂ ਸਟੀਵ ਵਿਟਕੋਫ ਅਤੇ ਜੇਰੇਡ ਕੁਸ਼ਨਰ ਨਾਲ ਦੁਵੱਲੀ ਮੁਲਾਕਾਤ ਕਰਨਗੇ।

ਅੱਜ ਹੋਣ ਵਾਲੀ ਯੂਕ੍ਰੇਨ-ਅਮਰੀਕਾ ਬੈਠਕ ਦਾ ਮੁੱਖ ਮਕਸਦ ਮਾਰਚ ਵਿੱਚ ਹੋਣ ਵਾਲੀ ਤਿੰਨ-ਪੱਖੀ ਗੱਲਬਾਤ ਦਾ ਆਧਾਰ ਤਿਆਰ ਕਰਨਾ ਹੈ। ਯੂਕ੍ਰੇਨ ਜੰਗ ਤੋਂ ਬਾਅਦ ਦੇਸ਼ ਦੇ ਪੁਨਰ-ਨਿਰਮਾਣ ਲਈ ਲਗਭਗ 800 ਅਰਬ ਡਾਲਰ ਦੇ ਫੰਡਾਂ ਬਾਰੇ ਅਮਰੀਕਾ ਨਾਲ ਚਰਚਾ ਕਰ ਰਿਹਾ ਹੈ, ਜਿਸ ਨੂੰ 'ਪ੍ਰੋਸਪੈਰਿਟੀ ਪੈਕੇਜ' ਕਿਹਾ ਜਾ ਰਿਹਾ ਹੈ। ਜ਼ੇਲੇਂਸਕੀ ਨੇ ਰੁਸਤਮ ਉਮੇਰੋਵ ਨੂੰ ਰੂਸ ਨਾਲ ਕੈਦੀਆਂ ਦੀ ਸੰਭਾਵਿਤ ਅਦਲਾ-ਬਦਲੀ ਦੇ ਮਾਨਵਤਾਵਾਦੀ ਮੁੱਦੇ 'ਤੇ ਵੀ ਗੱਲਬਾਤ ਕਰਨ ਦਾ ਕੰਮ ਸੌਂਪਿਆ ਹੈ।

ਯੂਕ੍ਰੇਨ ਦੀ ਕੋਸ਼ਿਸ਼ ਹੈ ਕਿ ਇਨ੍ਹਾਂ ਪ੍ਰਤੀਨਿਧ ਪੱਧਰ ਦੀਆਂ ਬੈਠਕਾਂ ਰਾਹੀਂ ਗੱਲਬਾਤ ਨੂੰ ਅੱਗੇ ਵਧਾ ਕੇ ਰਾਸ਼ਟਰਪਤੀ ਪੱਧਰ ਜ਼ੇਲੇਂਸਕੀ, ਟਰੰਪ ਅਤੇ ਪੁਤਿਨ ਦੀ ਸਿੱਧੀ ਮੁਲਾਕਾਤ ਕਰਵਾਈ ਜਾਵੇ।