ਅਮਰੀਕੀ ਅਦਾਕਾਰ-ਨਿਰਦੇਸ਼ਕ ਰੌਬ ਰੇਨਰ ਦੇ ਪੁੱਤਰ ਨਿੱਕ ''ਤੇ ਲਗਾਏ ਗਏ ਆਪਣੇ ਮਾਪਿਆਂ ਦੇ ਕਤਲ ਦੇ ਦੋਸ਼

ਲਾਸ ਏਂਜਲਸ (ਏਜੰਸੀ) - ਅਮਰੀਕੀ ਅਦਾਕਾਰ ਅਤੇ ਨਿਰਦੇਸ਼ਕ ਰੌਬ ਰੇਨਰ ਦੇ ਪੁੱਤਰ ਨਿੱਕ ਰੇਨਰ 'ਤੇ ਆਪਣੇ ਮਾਪਿਆਂ ਦੇ ਕਤਲ ਦੇ ਦੋਸ਼ ਲਗਾਏ ਗਏ ਹਨ। ਲਾਸ ਏਂਜਲਸ ਕਾਉਂਟੀ ਦੇ ਵਕੀਲਾਂ ਨੇ ਮੰਗਲਵਾਰ ਨੂੰ ਇਹ ਜਾਣਕਾਰੀ ਦਿੱਤੀ। ਲਾਸ ਏਂਜਲਸ ਪੁਲਸ ਮੁਖੀ ਜਿਮ ਮੈਕਡੋਨਲ ਨਾਲ ਇੱਕ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦੇ ਹੋਏ, ਜ਼ਿਲ੍ਹਾ ਅਟਾਰਨੀ ਨਾਥਨ ਹੋਚਮੈਨ ਨੇ ਕਿਹਾ ਕਿ 32 ਸਾਲਾ ਨਿੱਕ ਰੇਨਰ 'ਤੇ ਆਪਣੇ 78 ਸਾਲਾ ਪਿਤਾ ਰੌਬ ਰੇਨਰ ਅਤੇ ਮਾਂ ਮਿਸ਼ੇਲ ਸਿੰਗਰ ਰੇਨਰ ਦੇ ਕਤਲ ਦੇ ਸਬੰਧ ਵਿੱਚ ਫਸਟ ਡਿਗਰੀ ਕਤਲ ਦੇ 2 ਦੋਸ਼ ਦਾਇਰ ਕੀਤੇ ਗਏ ਹਨ। ਨਾਥਨ ਹੋਚਮੈਨ ਨੇ ਕਿਹਾ ਕਿ ਦੋਸ਼ਾਂ ਵਿੱਚ ਪੈਰੋਲ ਤੋਂ ਬਿਨਾਂ ਵੱਧ ਤੋਂ ਵੱਧ ਉਮਰ ਕੈਦ ਜਾਂ ਮੌਤ ਦੀ ਸਜ਼ਾ ਵੀ ਹੋ ਸਕਦੀ ਹੈ। ਇਸ ਵਿੱਚ ਇਹ ਵੀ ਦਾਅਵਾ ਕੀਤਾ ਗਿਆ ਹੈ ਕਿ ਕਤਲ ਕਰਨ ਲਈ ਇੱਕ ਚਾਕੂ ਦੀ ਵਰਤੋਂ ਕੀਤੀ ਗਈ ਸੀ। 

ਦੱਸ ਦੇਈਏ ਕਿ ਰੌਬ ਰੇਨਰ ਅਤੇ ਉਨ੍ਹਾਂ ਦੀ ਪਤਨੀ 2 ਦਿਨ ਪਹਿਲਾਂ ਲਾਸ ਏਂਜਲਸ ਦੇ ਪਾਸ਼ ਬ੍ਰੈਂਟਵੁੱਡ ਇਲਾਕੇ ਵਿੱਚ ਆਪਣੇ ਘਰ ਵਿੱਚ ਮ੍ਰਿਤਕ ਪਾਏ ਗਏ ਸਨ, ਜਿਨ੍ਹਾਂ ਦੇ ਸਰੀਰ 'ਤੇ ਚਾਕੂ ਦੇ ਜ਼ਖ਼ਮ ਸਨ। ਪੁਲਸ ਨੇ ਕਿਹਾ ਕਿ ਘਟਨਾ ਤੋਂ ਕੁਝ ਘੰਟਿਆਂ ਬਾਅਦ ਨਿੱਕ ਰੇਨਰ ਨੂੰ ਕਤਲ ਦੇ ਸ਼ੱਕ ਵਿੱਚ ਗ੍ਰਿਫ਼ਤਾਰ ਕਰਕੇ ਜੇਲ੍ਹ ਭੇਜ ਦਿੱਤਾ ਗਿਆ ਸੀ। ਨਿੱਕ ਰੇਨਰ ਨੇ ਦੋਸ਼ ਨਹੀਂ ਮੰਨਿਆ ਹੈ। ਅਧਿਕਾਰੀਆਂ ਨੇ ਕਤਲ ਦੇ ਕਾਰਨਾਂ ਦਾ ਖੁਲਾਸਾ ਨਹੀਂ ਕੀਤਾ ਹੈ। ਰੌਬ ਰੇਨਰ ਹਾਲੀਵੁੱਡ ਦੇ ਸਭ ਤੋਂ ਸਫਲ ਨਿਰਦੇਸ਼ਕਾਂ ਵਿੱਚੋਂ ਇੱਕ ਸਨ ਅਤੇ 1980 ਅਤੇ 90 ਦੇ ਦਹਾਕੇ ਵਿੱਚ ਦਰਸ਼ਕਾਂ ਨੂੰ ਕਈ ਯਾਦਗਾਰੀ ਫਿਲਮਾਂ ਦਿੱਤੀਆਂ, ਜਿਨ੍ਹਾਂ ਵਿੱਚ "ਦਿਸ ਇਜ਼ ਸਪਾਈਨਲ ਟੈਪ," "ਏ ਫਿਊ ਗੁੱਡ ਮੈਨ," "ਵੈੱਨ ਹੈਰੀ ਮੈੱਟ ਸੈਲੀ," ਅਤੇ "ਦਿ ਪ੍ਰਿੰਸੈਸ ਬ੍ਰਾਈਡ" ਸ਼ਾਮਲ ਹਨ।