ਪਾਕਿਸਤਾਨ ਸਰਕਾਰ ਨੇ ਨਸਲੀ ਪਸ਼ਤੂਨ ਸਿਆਸੀ ਪਾਰਟੀ ''ਤੇ ਲਾਈ ਪਾਬੰਦੀ

ਇਸਲਾਮਾਬਾਦ : ਪਾਕਿਸਤਾਨ ਸਰਕਾਰ ਨੇ ਐਤਵਾਰ ਨੂੰ ਇਕ ਨਸਲੀ ਪਸ਼ਤੂਨ ਸਿਆਸੀ ਪਾਰਟੀ ਨੂੰ ਰਾਸ਼ਟਰੀ ਸੁਰੱਖਿਆ ਲਈ ਖ਼ਤਰਾ ਦੱਸਦੇ ਹੋਏ ਪਾਬੰਦੀ ਲਗਾ ਦਿੱਤੀ ਹੈ। ਪਸ਼ਤੂਨ ਤਹਾਫੁਜ਼ ਮੂਵਮੈਂਟ (ਪੀਟੀਐੱਮ) ਅਸ਼ਾਂਤ ਖੈਬਰ ਪਖਤੂਨਖਵਾ ਸੂਬੇ ਦੇ ਕਬਾਇਲੀ ਖੇਤਰ ਵਿੱਚ ਸਰਗਰਮ ਹੈ ਅਤੇ ਅਕਸਰ ਪਾਕਿਸਤਾਨੀ ਫੌਜ ਦੀ ਆਲੋਚਨਾ ਕਰਦਾ ਰਿਹਾ ਹੈ। 

ਗ੍ਰਹਿ ਮੰਤਰਾਲੇ ਨੇ ਅੱਤਵਾਦ ਵਿਰੋਧੀ ਐਕਟ, 1997 ਦੀ ਧਾਰਾ 11ਬੀ ਦੇ ਤਹਿਤ ਪਾਰਟੀ ਨੂੰ 'ਗੈਰਕਾਨੂੰਨੀ' ਐਲਾਨ ਕਰਦੇ ਹੋਏ ਇੱਕ ਨੋਟੀਫਿਕੇਸ਼ਨ ਜਾਰੀ ਕੀਤਾ ਹੈ। ਨੋਟੀਫਿਕੇਸ਼ਨ ਦੇ ਅਨੁਸਾਰ, ਪੇਟੀਐੱਮ ਦੇਸ਼ ਵਿੱਚ ਜਨਤਕ ਵਿਵਸਥਾ ਅਤੇ ਸੁਰੱਖਿਆ ਲਈ ਇੱਕ 'ਵੱਡਾ ਖ਼ਤਰਾ' ਹੈ। ਇਹ ਸਮੂਹ ਮੰਜ਼ੂਰ ਪਸ਼ਤੀਨ ਦੀ ਅਗਵਾਈ ਹੇਠ ਕੁਝ ਸਾਲਾਂ ਤੋਂ ਸਰਗਰਮ ਸੀ, ਜਿਸ ਦੀ ਅਗਵਾਈ ਅਫਗਾਨ ਸਰਹੱਦ ਨਾਲ ਲੱਗਦੇ ਕਬਾਇਲੀ ਖੇਤਰ ਵਿੱਚ ਸਮੱਸਿਆਵਾਂ ਲਈ ਪਾਕਿਸਤਾਨੀ ਫੌਜ ਨੂੰ ਜ਼ਿੰਮੇਵਾਰ ਠਹਿਰਾਉਂਦੀ ਹੈ। ਪੀਟੀਐੱਮ ਮਈ 2014 ਵਿੱਚ ਮਹਿਸੂਦ ਤਹਾਫੁਜ਼ ਅੰਦੋਲਨ ਵਜੋਂ ਸ਼ੁਰੂ ਹੋਈ, ਜਦੋਂ ਵਿਦਿਆਰਥੀਆਂ ਦੇ ਇੱਕ ਸਮੂਹ ਨੇ ਵਜ਼ੀਰਸਤਾਨ ਅਤੇ ਕਬਾਇਲੀ ਖੇਤਰ ਦੇ ਹੋਰ ਹਿੱਸਿਆਂ ਤੋਂ ਬਾਰੂਦੀ ਸੁਰੰਗਾਂ ਨੂੰ ਹਟਾਉਣ ਦੀ ਪਹਿਲਕਦਮੀ ਵਜੋਂ ਇਸਨੂੰ ਬਣਾਇਆ। ਪਾਕਿਸਤਾਨੀ ਅਧਿਕਾਰੀਆਂ ਦਾ ਦਾਅਵਾ ਹੈ ਕਿ ਇਹ ਸਮੂਹ ਦੇਸ਼ ਦੇ ਅੰਦਰ ਤੇ ਬਾਹਰ ਖਾਸ ਕਰ ਕੇ ਅਫਗਾਨਿਸਤਾਨ 'ਚ ਕੰਮ ਕਰ ਰਹੇ ਰਾਸ਼ਟਰ ਵਿਰੋਧੀ ਤੱਤਾਂ ਦਾ ਇੱਕ ਮੋਹਰਾ ਬਣ ਗਿਆ ਹੈ। ਹਾਲਾਂਕਿ, ਪੀਟੀਐੱਮ ਨੇ ਹਮੇਸ਼ਾ ਇਨ੍ਹਾਂ ਦੋਸ਼ਾਂ ਨੂੰ ਰੱਦ ਕੀਤਾ ਹੈ।