ਚੀਨ ਵਿਚ ਲੋਕਤੰਤਰ ਪੱਖੀ ਅੰਦੋਲਨ 'ਚ ਹਿੱਸਾ ਲੈਣ ਵਾਲੇ ਕਾਨੂੰਨੀ ਵਿਦਵਾਨ ਦੀ ਅਮਰੀਕਾ ਵਿੱਚ ਹੱਤਿਆ

ਨਿਊਯਾਰਕ : ਚੀਨ ਵਿੱਚ 1989 ਦੇ ਤਿਆਨਮੇਨ ਸਕੁਏਅਰ ਲੋਕਤੰਤਰ ਪੱਖੀ ਅੰਦੋਲਨ ਵਿੱਚ ਹਿੱਸਾ ਲੈਣ ਤੋਂ ਬਾਅਦ ਦੋ ਸਾਲ ਦੀ ਜੇਲ੍ਹ ਕੱਟਣ ਵਾਲੇ ਅਸੰਤੁਸ਼ਟ ਕਾਨੂੰਨੀ ਵਿਦਵਾਨ ਲੀ ਜਿਨਜਿਨ(66) ਦੀ ਨਿਊਯਾਰਕ ਵਿੱਚ ਉਸਦੀ ਲਾਅ ਫਰਮ ਦੇ ਦਫਤਰ ਵਿੱਚ ਹੱਤਿਆ ਕਰ ਦਿੱਤੀ ਗਈ। ਪੁਲਿਸ ਨੇ ਇਹ ਜਾਣਕਾਰੀ ਦਿੱਤੀ। ਲੀ ਜਿਨਜਿਨ ਨੇ ਅਮਰੀਕਾ ਤੋਂ ਸ਼ਰਣ ਮੰਗੀ ਸੀ ਅਤੇ ਇਜਾਜ਼ਤ ਮਿਲਣ ਤੋਂ ਬਾਅਦ ਉਹ ਇੱਥੇ ਹੀ ਵੱਸ ਗਏ ਸਨ। ਪੁਲਿਸ ਨੇ ਦੱਸਿਆ ਕਿ ਲੀ ਜਿਨਜਿਨ ਦੀ ਸ਼ਹਿਰ ਵਿੱਚ ਚਾਕੂ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ।

ਉਹ ਲੰਬੇ ਸਮੇਂ ਤੋਂ ਸ਼ਹਿਰ ਵਿੱਚ ਇਮੀਗ੍ਰੇਸ਼ਨ ਵਕੀਲ ਵਜੋਂ ਕੰਮ ਕਰ ਰਿਹਾ ਸੀ। ਤਿਆਨਮਨ ਸਕੁਏਅਰ ਲੋਕਤੰਤਰ ਪੱਖੀ ਅੰਦੋਲਨ ਦੇ ਦੌਰਾਨ, ਉਸਨੇ ਚੀਨੀ ਅਧਿਕਾਰੀਆਂ ਦੁਆਰਾ ਲੋਕਾਂ ਨੂੰ ਜੇਲ੍ਹਾਂ ਵਿੱਚ ਸੁੱਟੇ ਜਾਂ ਮਾਰੇ ਜਾਣ ਦੇ ਕਈ ਮਾਮਲੇ ਉਠਾਏ। ਪੁਲਿਸ ਨੇ ਦੱਸਿਆ ਕਿ ਲੀ ਜਿਨਜਿਨ ਦੀ ਹੱਤਿਆ ਦੇ ਸਬੰਧ ਵਿੱਚ 25 ਸਾਲਾ ਜ਼ਿਆਓਨਿੰਗ ਝਾਂਗ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ ਹੈ ਅਤੇ ਉਸ ਉੱਤੇ ਕਤਲ ਦਾ ਦੋਸ਼ ਲਗਾਇਆ ਗਿਆ ਹੈ।

ਅਜੇ ਇਹ ਸਪੱਸ਼ਟ ਨਹੀਂ ਹੈ ਕਿ ਉਸ ਨੂੰ ਅਦਾਲਤ ਵਿਚ ਕਦੋਂ ਪੇਸ਼ ਕੀਤਾ ਜਾਵੇਗਾ ਅਤੇ ਕੀ ਉਸ ਦਾ ਕੋਈ ਵਕੀਲ ਹੈ। ਲੀ ਦੇ ਦੋਸਤ ਚੁਆਂਗ ਚੁਆਂਗ ਚੇਨ, ਚਾਈਨਾ ਡੈਮੋਕਰੇਸੀ ਪਾਰਟੀ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਅਤੇ ਵਕੀਲ ਵੇਈ ਝੂ ਨੇ ਨਿਊਯਾਰਕ ਡੇਲੀ ਨਿਊਜ਼ ਨੂੰ ਦੱਸਿਆ ਕਿ ਝਾਂਗ ਨੇ ਆਪਣਾ ਕੇਸ ਲੜਨ ਤੋਂ ਇਨਕਾਰ ਕਰਨ 'ਤੇ ਲੀ ਦੀ ਹੱਤਿਆ ਕੀਤੀ ਹੋ ਸਕਦੀ ਹੈ। ਚੇਨ ਨੇ ਕਿਹਾ ਕਿ ਝਾਂਗ ਅਗਸਤ ਵਿੱਚ ਲਾਸ ਏਂਜਲਸ ਦੇ ਇੱਕ ਸਕੂਲ ਵਿੱਚ ਪੜ੍ਹਨ ਲਈ ਐਫ-1 ਵਿਦਿਆਰਥੀ ਵੀਜ਼ੇ ਉੱਤੇ ਅਮਰੀਕਾ ਆਈ ਸੀ।