ਤੇਲ ਦੀਆਂ ਕੀਮਤਾਂ 'ਚ ਵਾਧੇ ਕਾਰਨ ਕਾਬੁਲ ਦੇ ਲੋਕ ਕਰ ਰਹੇ 'ਸਾਈਕਲਾਂ' ਦੀ ਵਰਤੋਂ

ਕਾਬੁਲ (ਏ.ਐਨ.ਆਈ.): ਅਫਗਾਨਿਸਤਾਨ ਦੀ ਰਾਜਧਾਨੀ ਕਾਬੁਲ ਦੇ ਵਸਨੀਕ ਤੇਲ ਦੀਆਂ ਕੀਮਤਾਂ ਵਧਣ ਕਾਰਨ ਸ਼ਹਿਰ ਵਿੱਚ ਆਪਣੇ ਰੋਜ਼ਾਨਾ ਆਉਣ-ਜਾਣ ਲਈ ਸਾਈਕਲਾਂ ਦੀ ਵਰਤੋਂ ਕਰ ਰਹੇ ਹਨ।ਸਥਾਨਕ ਮੀਡੀਆ ਨੇ ਇਹ ਜਾਣਕਾਰੀ ਦਿੱਤੀ। ਮੀਡੀਆ ਰਿਪੋਰਟਾਂ ਦਰਸਾਉਂਦੀਆਂ ਹਨ ਕਿ ਵਰਤਮਾਨ ਵਿੱਚ ਕਾਬੁਲ ਦੇ ਈਂਧਨ ਸਟੇਸ਼ਨਾਂ 'ਤੇ ਇੱਕ ਲੀਟਰ ਤੇਲ ਦੀ ਕੀਮਤ 76 ਅਫਗਾਨੀ ਹੈ, ਜਿੱਥੇ ਪਹਿਲਾਂ ਇਹ ਲਗਭਗ 35 ਅਫਗਾਨੀ ਸੀ। ਟੋਲੋ ਨਿਊਜ਼ ਨੇ ਦੱਸਿਆ ਕਿ ਪਿਛਲੇ ਦੋ ਤੋਂ ਤਿੰਨ ਮਹੀਨਿਆਂ ਵਿੱਚ ਕੀਮਤਾਂ ਵਿੱਚ ਵਾਧਾ ਹੋਇਆ ਹੈ।

ਕਾਬੁਲ ਨਿਵਾਸੀ ਅਬਦੁਲ ਕਾਦਿਰ ਨੇ ਕਿਹਾ,"ਮੈਂ ਟੈਕਸੀ ਦਾ ਕਿਰਾਇਆ ਨਹੀਂ ਦੇ ਸਕਦਾ। ਮੈਂ ਅਕਸਰ ਸਾਈਕਲ ਦੀ ਵਰਤੋਂ ਕਰਦਾ ਹਾਂ ਅਤੇ ਕਈ ਵਾਰ ਟੈਕਸੀ ਦੀ ਬਜਾਏ ਪੈਦਲ ਜਾਂਦਾ ਹਾਂ।" ਕਾਬੁਲ ਨਿਵਾਸੀ ਮੁਖਤਾਰ ਅਹਿਮਦ ਨੇ ਕਿਹਾ,"ਸਾਈਕਲਾਂ ਦੀ ਵਰਤੋਂ ਕਰਨਾ ਸਸਤਾ ਹੈ ਅਤੇ ਇਹ ਵਾਤਾਵਰਣ ਲਈ ਵੀ ਚੰਗਾ ਹੈ ਕਿਉਂਕਿ ਇਸ ਵਿੱਚ ਕੋਈ ਨਿਕਾਸ ਨਹੀਂ ਹੁੰਦਾ ਹੈ।" ਟੋਲੋ ਨਿਊਜ਼ ਦੀ ਰਿਪੋਰਟ ਮੁਤਾਬਕ, ਵਸਨੀਕਾਂ ਨੇ ਕਿਹਾ ਕਿ ਰਾਜਧਾਨੀ ਵਿੱਚ ਤੇਲ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋਣ ਕਾਰਨ ਟੈਕਸੀ ਦਾ ਕਿਰਾਇਆ ਵੱਧ ਰਿਹਾ ਹੈ, ਅਤੇ ਆਰਥਿਕ ਸਮੱਸਿਆਵਾਂ ਕਾਰਨ ਉਹ ਹਰ ਰੋਜ਼ ਉੱਚੇ ਟੈਕਸੀ ਕਿਰਾਏ ਦਾ ਭੁਗਤਾਨ ਕਰਨ ਵਿੱਚ ਅਸਮਰੱਥ ਹਨ।" 

ਪੜ੍ਹੋ ਇਹ ਅਹਿਮ ਖ਼ਬਰ- ਬ੍ਰਿਟੇਨ 'ਚ ਮਹਾਤਮਾ ਗਾਂਧੀ ਦੀ ਯਾਦ 'ਚ ਜਾਰੀ ਕੀਤਾ ਜਾਵੇਗਾ 'ਸਿੱਕਾ'

ਕਾਬੁਲ ਨਿਵਾਸੀ ਅਹਿਮਦ ਜ਼ਿਆ ਨੇ ਕਿਹਾ,''ਤੇਲ ਦੀਆਂ ਕੀਮਤਾਂ ਵੱਧ ਗਈਆਂ ਹਨ। ਪਹਿਲਾਂ, ਟੈਕਸੀ ਦਾ ਕਿਰਾਇਆ 20 ਅਫਗਾਨੀ ਸੀ, ਹੁਣ ਇਹ ਲਗਭਗ 30 ਤੋਂ 50 ਅਫਗਾਨੀ ਹੈ।" ਇਕ ਹੋਰ ਕਾਬੁਲ ਨਿਵਾਸੀ ਮੁਹੰਮਦ ਓਮਿਦ ਨੇ ਕਿਹਾ,"ਤੇਲ ਦੀਆਂ ਕੀਮਤਾਂ ਅਤੇ ਟੈਕਸੀ ਦਾ ਕਿਰਾਇਆ ਵੀ ਵੱਧ ਗਿਆ ਹੈ। ਅਸੀਂ ਇਹ ਸਾਰੇ ਖਰਚਿਆਂ ਦਾ ਭੁਗਤਾਨ ਨਹੀਂ ਕਰ ਸਕਦੇ ਹਾਂ ਅਤੇ ਇਸ ਲਈ ਮੈਂ ਇੱਕ ਸਾਈਕਲ ਖਰੀਦਿਆ ਹੈ।" ਪਿਛਲੇ ਮਹੀਨੇ ਦੀ ਸ਼ੁਰੂਆਤ 'ਚ ਖਬਰ ਆਈ ਸੀ ਕਿ ਅਫਗਾਨੀ ਡਾਲਰ ਦੇ ਮੁਕਾਬਲੇ ਕਮਜ਼ੋਰ ਹੋ ਗਿਆ ਹੈ ਅਤੇ ਇਸ ਨਾਲ ਬਾਜ਼ਾਰ 'ਚ ਕਾਰੋਬਾਰ ਕਾਫੀ ਘੱਟ ਗਿਆ ਹੈ।ਕਾਬੁਲ ਨਿਵਾਸੀਆਂ ਨੇ ਅਫਗਾਨਿਸਤਾਨ ਦੇ ਕੇਂਦਰੀ ਬੈਂਕ ਨੂੰ ਅਪੀਲ ਕੀਤੀ ਕਿ ਉਹ ਮੁਦਰਾ ਬਾਜ਼ਾਰਾਂ ਨੂੰ ਕੰਟਰੋਲ ਕਰਨ ਲਈ ਕਦਮ ਚੁੱਕਣ ਤਾਂ ਜੋ ਵਧੇਰੇ ਮਜ਼ਬੂਤ ਕਾਰੋਬਾਰ ਲਈ ਰਾਹ ਪੱਧਰਾ ਕੀਤਾ ਜਾ ਸਕੇ।ਇਸ ਦੌਰਾਨ ਕਾਬੁਲ ਵਿੱਚ ਕਈ ਮਨੀ ਐਕਸਚੇਂਜਰਾਂ ਨੇ ਕਿਹਾ ਕਿ ਬੈਂਕਾਂ ਵਿੱਚ ਨਕਦੀ ਦੀ ਕਮੀ ਕਾਰਨ ਅਫਗਾਨ ਮੁਦਰਾ ਵਿੱਚ ਗਿਰਾਵਟ ਆਈ ਹੈ।