ਅਮਰੀਕੀ ਉਪ-ਰਾਸ਼ਟਰਪਤੀ JD ਵੈਂਸ ਦੇ ਘਰ ਗੂੰਜੀ ਕਿਲਕਾਰੀ, ਪਤਨੀ ਉਸ਼ਾ ਵੈਂਸ ਨੇ ਚੌਥੇ ਬੱਚੇ ਨੂੰ ਦਿੱਤਾ ਜਨਮ

ਵਾਸ਼ਿੰਗਟਨ (ਆਈਏਐਨਐਸ): ਅਮਰੀਕਾ ਦੇ ਉਪ-ਰਾਸ਼ਟਰਪਤੀ ਜੇਡੀ ਵੈਂਸ ਅਤੇ ਸੈਕਿੰਡ ਲੇਡੀ ਉਸ਼ਾ ਵੈਂਸ ਦੇ ਘਰ ਚੌਥੇ ਬੱਚੇ ਦੀ ਕਿਲਕਾਰੀ ਗੂੰਜੀ ਹੈ। ਇਸ ਦੇ ਨਾਲ ਹੀ ਜੇਡੀ ਵੈਂਸ ਪਿਛਲੇ 150 ਤੋਂ ਵੱਧ ਸਾਲਾਂ ਵਿੱਚ ਅਹੁਦੇ 'ਤੇ ਰਹਿੰਦਿਆਂ ਬੱਚੇ ਦਾ ਸਵਾਗਤ ਕਰਨ ਵਾਲੇ ਪਹਿਲੇ ਮੌਜੂਦਾ ਅਮਰੀਕੀ ਉਪ-ਰਾਸ਼ਟਰਪਤੀ ਬਣ ਗਏ ਹਨ।

ਜੋੜੇ ਨੇ ਦੱਸਿਆ ਕਿ ਉਨ੍ਹਾਂ ਦੇ ਬੇਟੇ ਦਾ ਜਨਮ ਐਤਵਾਰ ਸਵੇਰੇ ਮੈਰੀਲੈਂਡ ਦੇ ਬੈਥੇਸਡਾ ਸਥਿਤ ਵਾਲਟਰ ਰੀਡ ਨੈਸ਼ਨਲ ਮਿਲਟਰੀ ਮੈਡੀਕਲ ਸੈਂਟਰ ਵਿੱਚ ਹੋਇਆ। ਉਨ੍ਹਾਂ ਨੇ ਆਪਣੇ ਨਵਜੰਮੇ ਬੇਟੇ ਦਾ ਨਾਂ ਐਲੇਕ ਨੀਲ ਵੈਂਸ ਰੱਖਿਆ ਹੈ। ਇੱਕ ਸਾਂਝੇ ਬਿਆਨ ਵਿੱਚ ਜੋੜੇ ਨੇ ਕਿਹਾ, “ਉਸ਼ਾ ਅਤੇ ਬੱਚਾ ਦੋਵੇਂ ਖੁਸ਼ ਅਤੇ ਸਿਹਤਮੰਦ ਹਨ ਅਤੇ ਸਾਡੇ ਬਾਕੀ ਬੱਚੇ ਆਪਣੇ ਛੋਟੇ ਭਰਾ ਨੂੰ ਮਿਲ ਕੇ ਬਹੁਤ ਖੁਸ਼ ਹਨ।” ਐਲੇਕ, ਵੈਂਸ ਜੋੜੇ ਦਾ ਚੌਥਾ ਬੱਚਾ ਅਤੇ ਤੀਜਾ ਬੇਟਾ ਹੈ। ਉਨ੍ਹਾਂ ਦੇ ਪਹਿਲਾਂ ਹੀ ਦੋ ਬੇਟੇ, ਇਵਾਨ (9 ਸਾਲ) ਅਤੇ ਵਿਵੇਕ (6 ਸਾਲ) ਅਤੇ ਇੱਕ ਬੇਟੀ ਮੀਰਾਬੇਲ (4 ਸਾਲ) ਹੈ। ਜੋੜੇ ਨੇ ਵਾਲਟਰ ਰੀਡ ਮੈਡੀਕਲ ਸੈਂਟਰ ਅਤੇ ਵ੍ਹਾਈਟ ਹਾਊਸ ਮੈਡੀਕਲ ਯੂਨਿਟ ਦੇ ਡਾਕਟਰਾਂ ਅਤੇ ਸਟਾਫ ਦਾ ਵੀ ਤਹਿ ਦਿਲੋਂ ਧੰਨਵਾਦ ਕੀਤਾ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ- ਅਮਰੀਕਾ 'ਚ ਨਵੀਂ ਵੀਜ਼ਾ ਸੀਮਾ 'ਤੇ ਰੋਕ ਲਗਾਉਣ ਦੀ ਮੰਗ! ਭਾਰਤੀਆਂ ਨੂੰ ਹੋਵੇਗਾ ਫ਼ਾਇਦਾ

ਅਮਰੀਕੀ ਰਾਜਨੀਤਿਕ ਇਤਿਹਾਸ ਵਿੱਚ ਇਹ ਇੱਕ ਬਹੁਤ ਹੀ ਦੁਰਲੱਭ ਘਟਨਾ ਹੈ। ਜੇਡੀ ਵੈਂਸ ਤੋਂ ਪਹਿਲਾਂ 1870 ਵਿੱਚ ਉਪ-ਰਾਸ਼ਟਰਪਤੀ ਸ਼ੁਇਲਰ ਕੋਲਫੈਕਸ ਦੇ ਘਰ ਬੱਚੇ ਦਾ ਜਨਮ ਹੋਇਆ ਸੀ। ਉਸ ਤੋਂ ਵੀ ਪਹਿਲਾਂ 1829 ਵਿੱਚ ਉਪ-ਰਾਸ਼ਟਰਪਤੀ ਜੌਨ ਸੀ. ਕੈਲਹੂਨ ਦੇ ਘਰ ਬੇਟੇ ਦਾ ਜਨਮ ਹੋਇਆ ਸੀ। 41 ਸਾਲਾ ਜੇਡੀ ਵੈਂਸ ਅਮਰੀਕਾ ਦੇ ਉਪ-ਰਾਸ਼ਟਰਪਤੀ ਵਜੋਂ ਸਹੁੰ ਚੁੱਕਣ ਵਾਲੇ ਤੀਜੇ ਸਭ ਤੋਂ ਨੌਜਵਾਨ ਵਿਅਕਤੀ ਹਨ। ਜ਼ਿਕਰਯੋਗ ਹੈ ਕਿ ਸੈਕਿੰਡ ਲੇਡੀ ਉਸ਼ਾ ਵੈਂਸ (ਪਹਿਲਾਂ ਉਸ਼ਾ ਬਾਲਾ ਚਿਲੁਕੁਰੀ) ਭਾਰਤੀ ਪ੍ਰਵਾਸੀਆਂ ਦੀ ਬੇਟੀ ਹੈ ਅਤੇ ਉਨ੍ਹਾਂ ਦਾ ਪਰਿਵਾਰ ਆਂਧਰਾ ਪ੍ਰਦੇਸ਼ ਨਾਲ ਸਬੰਧ ਰੱਖਦਾ ਹੈ। ਐਲੇਕ ਨੀਲ ਵੈਂਸ ਦੇ ਆਗਮਨ ਨਾਲ ਭਾਰਤੀ-ਅਮਰੀਕੀ ਭਾਈਚਾਰੇ ਵਿੱਚ ਖਾਸ ਉਤਸ਼ਾਹ ਦੇਖਿਆ ਜਾ ਰਿਹਾ ਹੈ। ਉਸ਼ਾ ਅਤੇ ਜੇਡੀ ਵੈਂਸ ਦੀ ਮੁਲਾਕਾਤ ਯੇਲ ਲਾਅ ਸਕੂਲ ਵਿੱਚ ਪੜ੍ਹਾਈ ਦੌਰਾਨ ਹੋਈ ਸੀ ਅਤੇ ਉਨ੍ਹਾਂ ਨੇ 2014 ਵਿੱਚ ਵਿਆਹ ਕਰਵਾਇਆ ਸੀ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।