ਜਪਾਨ: ਜੰਗਲ ਦੀ ਅੱਗ ਕਾਰਨ ਲਗਭਗ 1,800 ਹੈਕਟੇਅਰ ਜੰਗਲੀ ਖੇਤਰ ਸੜ ਕੇ ਸੁਆਹ

ਟੋਕੀਓ (ਏਜੰਸੀ)- ਜਾਪਾਨ ਦੇ ਇਵਾਤੇ ਸੂਬੇ ਦੇ ਓਫੁਨਾਟੋ ਸ਼ਹਿਰ ਵਿੱਚ ਜੰਗਲ ਦੀ ਅੱਗ ਤੇਜ਼ੀ ਨਾਲ ਫੈਲ ਰਹੀ ਹੈ, ਹੁਣ ਤੱਕ ਲਗਭਗ 1,800 ਹੈਕਟੇਅਰ ਜੰਗਲੀ ਖੇਤਰ ਸੜ ਚੁੱਕਾ ਹੈ। ਰਾਸ਼ਟਰੀ ਪ੍ਰਸਾਰਕ NHK ਦੇ ਅਨੁਸਾਰ, 26 ਫਰਵਰੀ ਨੂੰ ਲੱਗੀ ਅੱਗ ਨੇ ਵੱਡੇ ਖੇਤਰਾਂ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ ਹੈ। ਅੱਗ ਕੇਂਦਰੀ ਸੈਨਰੀਕੂ-ਚੋ ਰਿਓਇਰੀ ਦੇ ਉੱਤਰ ਅਤੇ ਪੱਛਮ ਵਿੱਚ ਫੈਲ ਰਹੀ ਹੈ। ਮੀਡੀਆ ਦੇ ਅਨੁਸਾਰ, ਸ਼ੋਜੀ ਜ਼ਿਲ੍ਹੇ ਦੇ ਸੈਨਰੀਕੂ-ਚੋ ਰਿਓਇਰੀ ਵਿੱਚ ਇੱਕ ਲਾਸ਼ ਮਿਲੀ ਹੈ, ਅਤੇ ਕਈ ਘਰਾਂ ਸਮੇਤ ਲਗਭਗ 84 ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ ਹੈ। ਕੁਝ ਜ਼ਿਲ੍ਹਿਆਂ ਵਿੱਚ ਲੋਕਾਂ ਨੂੰ ਕੱਢਣ ਦੇ ਹੁਕਮ ਜਾਰੀ ਕੀਤੇ ਗਏ ਹਨ।

ਰਿਪੋਰਟਾਂ ਅਨੁਸਾਰ, ਐਤਵਾਰ ਨੂੰ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 7 ਵਜੇ ਤੱਕ ਇੱਥੋਂ 1,222 ਲੋਕਾਂ ਨੂੰ ਨਿਕਾਸੀ ਕੇਂਦਰਾਂ ਅਤੇ ਭਲਾਈ ਕੇਂਦਰਾਂ ਵਿੱਚ ਭੇਜਿਆ ਗਿਆ। ਰਿਪੋਰਟਾਂ ਵਿੱਚ ਕਿਹਾ ਗਿਆ ਹੈ ਕਿ ਰਿਓਇਰੀ ਪ੍ਰਾਇਦੀਪ, ਸੈਨਰੀਕੂ-ਚੋ ਰਿਓਇਰੀ ਅਤੇ ਸੈਨਰੀਕੂ-ਚੋ ਓਕੀਰਾਈ ਦੀ ਸਰਹੱਦ ਅਤੇ ਅਕੈਸ਼ੀ-ਚੋ ਅਰਿਤਾਸ਼ੀ ਦੇ ਆਲੇ ਦੁਆਲੇ ਦੇ ਖੇਤਰਾਂ ਤੋਂ ਧੂੰਆਂ ਉੱਠਦਾ ਦੇਖਿਆ ਗਿਆ। ਇਨ੍ਹਾਂ ਇਲਾਕਿਆਂ ਵਿੱਚ ਅੱਗ 'ਤੇ ਕਾਬੂ ਪਾਉਣ ਲਈ ਹੈਲੀਕਾਪਟਰਾਂ ਨੇ ਪਾਣੀ ਦਾ ਛਿੜਕਾਅ ਕੀਤਾ।