Japan ਦੀ ਵਿਵਾਦਗ੍ਰਸਤ ਸਾਡੋ ਸੋਨੇ ਦੀ ਖਾਨ ਨੂੰ ਮਿਲਿਆ UNESCO ਦਾ ਦਰਜਾ

ਟੋਕੀਓ : ਯੂਨੈਸਕੋ ਦੀ ਵਿਸ਼ਵ ਵਿਰਾਸਤ ਕਮੇਟੀ ਨੇ ਸ਼ਨੀਵਾਰ ਨੂੰ ਜਾਪਾਨ ਵਿੱਚ ਸਥਿਤ ਵਿਵਾਦਗ੍ਰਸਤ ਸਾਡੋ ਸੋਨੇ ਦੀ ਖਾਨ ਨੂੰ ਸੱਭਿਆਚਾਰਕ ਵਿਰਾਸਤੀ ਸਥਾਨ ਵਜੋਂ ਦਰਜ ਕਰਨ ਦਾ ਫੈਸਲਾ ਕੀਤਾ ਹੈ। ਇਸ ਤੋਂ ਪਹਿਲਾਂ ਜਾਪਾਨ ਨੇ ਦੂਜੇ ਵਿਸ਼ਵ ਯੁੱਧ ਦੌਰਾਨ ਕੋਰੀਆਈ ਮਜ਼ਦੂਰਾਂ ਦੇ ਜ਼ੁਲਮ ਦੇ ਕਾਲੇ ਇਤਿਹਾਸ ਨੂੰ ਦਿਖਾਉਣ ਲਈ ਸਹਿਮਤੀ ਦਿੱਤੀ ਸੀ। ਇਹ ਫੈਸਲਾ ਜਾਪਾਨ ਅਤੇ ਦੱਖਣੀ ਕੋਰੀਆ ਦੇ ਸਬੰਧਾਂ ਵਿੱਚ ਸੁਧਾਰ ਦਾ ਸੰਕੇਤ ਹੈ। 

ਉੱਤਰੀ ਜਾਪਾਨ ਦੇ ਨੀਗਾਟਾ ਤੱਟਵਰਤੀ ਟਾਪੂ 'ਤੇ ਸਥਿਤ ਇਹ ਖਾਨ ਲਗਭਗ 400 ਸਾਲਾਂ ਤੋਂ ਸਰਗਰਮ ਸੀ ਅਤੇ 1989 ਵਿੱਚ ਬੰਦ ਹੋਣ ਤੋਂ ਪਹਿਲਾਂ ਇਹ ਦੁਨੀਆ ਦੀਆਂ ਸਭ ਤੋਂ ਵੱਡੀਆਂ ਸੋਨੇ ਦੀਆਂ ਖਾਣਾਂ ਵਿੱਚੋਂ ਇੱਕ ਸੀ।

ਇਹ ਖਾਨ ਜੰਗ ਦੌਰਾਨ ਕੋਰੀਆਈ ਕਾਮਿਆਂ 'ਤੇ ਜਾਪਾਨ ਦੇ ਜ਼ੁਲਮ ਨਾਲ ਜੁੜੀ ਹੋਈ ਹੈ। ਸ਼ਨੀਵਾਰ ਨੂੰ ਨਵੀਂ ਦਿੱਲੀ ਵਿੱਚ ਹੋਈ ਸਾਲਾਨਾ ਮੀਟਿੰਗ ਵਿੱਚ ਦੱਖਣੀ ਕੋਰੀਆ ਸਮੇਤ ਕਮੇਟੀ ਮੈਂਬਰਾਂ ਨੇ ਇਸ ਲਈ ਸਰਬਸੰਮਤੀ ਨਾਲ ਸਮਰਥਨ ਦਿੱਤਾ। ਕਮੇਟੀ ਨੇ ਕਿਹਾ ਕਿ ਜਾਪਾਨ ਨੇ ਵਾਧੂ ਜਾਣਕਾਰੀ ਪ੍ਰਦਾਨ ਕੀਤੀ ਹੈ ਅਤੇ ਯੋਜਨਾ ਵਿੱਚ ਸਾਰੀਆਂ ਲੋੜੀਂਦੀਆਂ ਸੋਧਾਂ ਕੀਤੀਆਂ ਹਨ। ਇੰਨਾ ਹੀ ਨਹੀਂ ਜਾਪਾਨ ਨੇ ਦੱਖਣੀ ਕੋਰੀਆ ਨਾਲ ਯੁੱਧ ਦੌਰਾਨ ਖਾਨ ਦੇ ਇਤਿਹਾਸ 'ਤੇ ਵੀ ਚਰਚਾ ਕੀਤੀ ਹੈ। 

ਜਾਪਾਨ ਨੇ ਮੰਨਿਆ ਕਿ ਕੋਰੀਆਈ ਕਾਮਿਆਂ ਨੂੰ ਖਾਣ ਵਿੱਚ ਖ਼ਤਰਨਾਕ ਕੰਮ ਕਰਨ ਲਈ ਲਗਾਇਆ ਜਾਂਦਾ ਸੀ, ਨਤੀਜੇ ਵਜੋਂ ਕੁਝ ਮੌਤਾਂ ਹੋਈਆਂ। ਉਨ੍ਹਾਂ ਵਿੱਚੋਂ ਕਈਆਂ ਨੂੰ ਬਹੁਤ ਘੱਟ ਭੋਜਨ ਦਿੱਤਾ ਗਿਆ ਅਤੇ ਕੋਈ ਛੁੱਟੀ ਨਹੀਂ ਮਿਲਦੀ ਸੀ। ਦੱਖਣੀ ਕੋਰੀਆਈ ਵਫ਼ਦ ਨੇ ਕਿਹਾ ਕਿ ਕੋਰੀਆਈ ਦੇਸ਼ ਜਾਪਾਨ ਤੋਂ ਉਮੀਦ ਕਰਦਾ ਹੈ ਕਿ ਉਹ ਇਤਿਹਾਸ ਦੀ ਸੱਚਾਈ ਨੂੰ ਲੋਕਾਂ ਸਾਹਮਣੇ ਉਜਾਗਰ ਕਰੇਗਾ ਅਤੇ ਲੋਕਾਂ ਨੂੰ ਸਡੋ ਖਾਨ ਦੇ ਸੁਨਹਿਰੀ ਅਤੇ ਕਾਲੇ ਇਤਿਹਾਸ ਤੋਂ ਜਾਣੂ ਕਰਵਾਏਗਾ ਤਾਂ ਜੋ ਦੋਵਾਂ ਦੇਸ਼ਾਂ ਦੇ ਸਬੰਧਾਂ ਵਿੱਚ ਸੁਧਾਰ ਹੋ ਸਕੇ।