ਇਟਲੀ ਪੁਲਸ ਦੀ ਵੱਡੀ ਕਾਰਵਾਈ, ਟੀਕਾਕਰਨ ਨਾ ਕਰਾਉਣ ਵਾਲੇ 308 ਸਿਹਤ ਕਰਮਚਾਰੀ ਕੀਤੇ ਮੁਅੱਤਲ

ਰੋਮ (ਦਲਵੀਰ ਕੈਂਥ): ਕੋਵਿਡ-19 ਇੱਕ ਤਾਂ ਉਂਝ ਹੀ ਕੁਦਰਤੀ ਤੌਰ 'ਤੇ ਇਨਸਾਨੀ ਜਨ-ਜੀਵਨ ਨੂੰ ਤਹਿਸ-ਨਹਿਸ ਕਰ ਰਿਹਾ ਹੈ ਅਤੇ ਦੂਜਾ ਇਸ ਭਿਆਨਕ ਮਹਾਮਾਰੀ ਨੂੰ ਕੁਝ ਲੋਕ ਜਾਣ-ਬੁਝ ਕੇ ਮੌਤ ਨੂੰ ਮਾਸੀ ਕਹਿਣ ਵਾਲੇ ਕੰਮ ਕਰ ਰਹੇ ਹਨ। ਵੱਡੀ ਹੈਰਾਨੀ ਉਂਦੋਂ ਹੁੰਦੀ ਹੈ ਜਦੋ ਅਜਿਹਾ ਕੰਮ ਉਹ ਲੋਕ ਕਰਨ ਜਿਹੜੇ ਕਿ ਸਿਹਤ ਸੁਰੱਖਿਆ ਵਿਭਾਗ ਦੇ ਜ਼ਿੰਮੇਵਾਰ ਕਰਮਚਾਰੀ ਹੋਣ।ਅਜਿਹਾ ਵਰਤਾਰਾ ਇਟਲੀ ਭਰ ਵਿੱਚ ਵਿਸ਼ੇਸ਼ ਜਾਂਚ ਪੁਲਸ ਵਿਭਾਗ ਐਨ.ਏ.ਐਸ. ਕਾਰਬਿਨੇਰੀ ਨੇ ਉਸ ਸਮੇਂ ਜਾਂਚਿਆ, ਜਦੋਂ ਉਸ ਨੇ ਸਿਹਤ ਵਿਭਾਗ ਦੇ 6600 ਕਰਮਚਾਰੀਆਂ ਦੀ ਸ਼ੱਕ ਦੇ ਆਧਾਰ 'ਤੇ ਵਿਸ਼ੇਸ਼ ਨਿਗਰਾਨੀ ਕੀਤੀ ਜਿਹੜੀ ਕਿ ਨਵੰਬਰ 2021 ਦੌਰਾਨ ਹੋਈ। ਪੁਲਸ ਦੀ ਹੈਰਾਨੀ ਦੀ ਉਸ ਵੇਲੇ ਕੋਈ ਹੱਦ ਨਾ ਰਹੀ ਜਦੋਂ ਪੁਲਸ ਨੇ ਸਿਹਤ ਵਿਭਾਗ ਦੇ 308 ਕਰਮਚਾਰੀਆਂ ਨੂੰ ਐਂਟੀ ਕੋਵਿਡ-19 ਵੈਕਸੀਨ ਨਾ ਲੁਆਉਣ ਦਾ ਦੋਸ਼ੀ ਪਾਇਆ ਤੇ ਇਹਨਾਂ ਕਰਮਚਾਰੀਆਂ ਨੇ ਸਰਕਾਰੀ ਨਿਯਮਾਂ ਦੀਆਂ ਧੱਜੀਆਂ ਉਡਾਉਂਦਿਆ ਕੋਵਿਡ ਕਾਲ ਵਿੱਚ ਆਪਣਾ ਕੰਮ ਕੀਤਾ।

ਪੁਲਸ ਜਾਂਚ ਟੀਮ ਨੇ ਜਿਹਨਾਂ ਸਿਹਤ ਕਰਚਮਾਰੀਆਂ ਨੂੰ ਸਰਕਾਰੀ ਹੁਕਮਾਂ ਦੀ ਉਲੰਘਣਾ ਕਰਨ ਦਾ ਦੋਸ਼ੀ ਪਾਇਆ ਹੈ ਉਹਨਾਂ ਵਿੱਚੋਂ 135 ਉਹ ਸਿਹਤ ਕਰਮਚਾਰੀ ਹਨ ਜਿਹਨਾਂ ਵਿਚ ਮੈਡੀਕਲ ਅਫਸਰ, ਦੰਦਾਂ ਦੇ ਡਾਕਟਰ, ਫਾਰਮਾਸਿਸਟ, ਨਰਸਾਂ ਆਦਿ ਸ਼ਾਮਿਲ ਹਨ। ਇਹਨਾਂ ਸਾਰਿਆਂ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ ਅਤੇ ਇਹਨਾਂ ਨਾਲ ਸੰਬਧਤ 6 ਮੈਡੀਕਲ ਦਫ਼ਤਰ, ਡੈਂਟਲ ਦਫ਼ਤਰ ਤੇ 2 ਫਾਰਮੇਸੀਆਂ ਨੂੰ ਵੀ ਬੰਦ ਕੀਤਾ ਗਿਆ ਹੈ।ਇਹ ਘਟਨਾ ਸੀਚੀਲੀਆ ਸੂਬੇ ਨਾਲ ਸਬੰਧਤ ਹੈ ਪਰ ਇਸ ਦੇ ਬਾਵਜੂਦ ਵੀ ਪੁਲਸ ਨੇ ਤਰੇਂਨਤੋ, ਪਾਰਮਾ ਵਿਰੋਨਾ ਤੇ ਕਸ਼ੇਰਤਾ ਵਿੱਚ ਵੀ ਅਜਿਹੇ ਡਾਕਟਰਾਂ 'ਤੇ ਕਾਰਵਾਈ ਕੀਤੀ ਹੈ ਜਿਹਨਾਂ ਕਿ ਕੋਵਿਡ-19 ਦੇ ਨਿਯਮਾਂ ਵਿੱਚ ਕੁਤਾਹੀ ਵਰਤੀ, ਜਿਸ ਦੇ ਮੱਦੇਨਜ਼ਰ ਉਹਨਾਂ ਦੀਆਂ ਸਿਹਤ ਸੇਵਾਵਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ।

ਪੜ੍ਹੋ ਇਹ ਅਹਿਮ ਖ਼ਬਰ- ਆਸਟ੍ਰੇਲੀਆ 'ਚ ਤੇਜ਼ੀ ਨਾਲ ਵੱਧ ਰਹੇ ਕੋਰੋਨਾ ਮਾਮਲੇ, PM ਮੌਰੀਸਨ ਨੇ ਲਿਆ ਅਹਿਮ ਫ਼ੈਸਲਾ 

ਪੁਲਸ ਜਾਂਚ ਅਨੁਸਾਰ ਦੋਸ਼ੀ ਪਾਏ ਗਏ ਸਿਹਤ ਕਰਮਚਾਰੀ ਉਹ ਗੈਰ-ਜ਼ਿੰਮੇਵਾਰ ਲੋਕ ਹਨ ਜਿਹਨਾਂ ਕਿ ਦੇਸ਼ ਵਿੱਚ ਵਿਆਪਕ ਤੇ ਲੋਕ ਮਾਰੂ ਮਹਾਮਾਰੀ ਦੇ ਪ੍ਰਭਾਵ ਤੋਂ ਲੋਕਾਂ ਨੂੰ ਬਚਾਉਣ ਲਈ ਕੀਤੇ ਜਾ ਰਹੇ ਆਪਣੇ ਕੰਮ ਨਾਲ ਇਮਾਨਦਾਰੀ ਨਹੀਂ ਵਰਤੀ।ਇਹਨਾਂ ਨੇ ਸਰਕਾਰ ਦੇ ਹੁਕਮਾਂ ਦੀ ਉਲੰਘਣਾ ਕਰਦਿਆਂ ਐਂਟੀ-ਕੋਵਿਡ-19 ਦਾ ਟੀਕਾਕਰਣ ਕਰਵਾਉਣ ਤੋਂ ਇਨਕਾਰ ਕੀਤਾ।ਇੱਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਬੀਤੇ ਦਿਨ ਜਿੱਥੇ ਇੱਕ ਡਾਕਟਰ ਨੇ 80 ਦੇ ਕਰੀਬ ਕਰਮਚਾਰੀਆਂ ਨੂੰ ਫਰਜ਼ੀ ਗਰੀਨ ਪਾਸ ਜਾਰੀ ਕਰਕੇ ਦੂਜਾ ਰੱਬ ਸਮਝੇ ਜਾਣ ਵਾਲੇ ਡਾਕਟਰਾਂ ਦੀ ਕਾਰਗੁਜਾਰੀ 'ਤੇ ਕਈ ਤਰ੍ਹਾਂ ਦੇ ਸਵਾਲ ਖੜ੍ਹੇ ਕਰ ਦਿੱਤੇ ਸਨ ਉੱਥੇ ਹੁਣ ਇਸ ਘਟਨਾ ਨੇ ਲੋਕਾਂ ਦੇ ਯਕੀਨ ਨੂੰ ਹੋਰ ਪੱਕਾ ਕਰ ਦਿੱਤਾ ਹੈ ਕਿ ਹੋਰ ਏਸ਼ੀਅਨ ਦੇਸ਼ਾਂ ਵਾਂਗਰ ਇਟਲੀ ਵਿੱਚ ਵੀ ਸਿਹਤ ਵਿਭਾਗ ਵਿੱਚ ਲੋਕਾਂ ਦੀ ਸਿਹਤ ਨਾਲ ਖਿਲਵਾੜ ਹੁੰਦਾ ਹੈ ਤੇ ਇਹ ਖਿਲਵਾੜ ਕਰਨ ਵਾਲੇ ਕੋਈ ਹੋਰ ਨਹੀਂ ਸਗੋਂ ਡਾਕਟਰ ਹੀ ਹਨ ਜਿਹਨਾਂ ਦੀ ਨਿੱਕੀ ਜਿਹੀ ਗਲਤੀ ਕਿਸੇ ਦੀ ਜ਼ਿੰਦਗੀ ਦਾ ਦੀਵਾ ਹਮੇਸ਼ਾ ਲਈ ਗੁੱਲ ਕਰ ਸਕਦੀ ਹੈ।

ਇਟਲੀ ਸਰਕਾਰ ਨੇ ਸਭ ਤੋਂ ਪਹਿਲਾਂ ਸਿਹਤ ਵਿਭਾਗ ਦੇ ਕਰਮਚਾਰੀਆਂ ਨੂੰ ਐਂਟੀ ਕੋਵਿਡ-19 ਦਾ ਟੀਕਾਕਰਣ ਕਰਨਾ ਇਸ ਲਈ ਹੀ ਸੁਰੂ ਕੀਤਾ ਸੀ ਕਿਉਂਕਿ ਇਹਨਾਂ ਲੋਕਾਂ ਦਾ ਵਾਹ ਸਭ ਤੋਂ ਵੱਧ ਕੋਵਿਡ ਮਰੀਜ਼ਾਂ ਨਾਲ ਪੈਣਾ ਹੈ ਤੇ ਇਹਨਾਂ ਲੋਕਾਂ ਨੂੰ ਸੁਰੱਖਿਅਤ ਕਰਨਾ ਸਰਕਾਰ ਦੀ ਸਭ ਤੋਂ ਵੱਡੀ ਜ਼ਿੰਮੇਵਾਰੀ ਹੈ।ਹੁਣ ਤੱਕ ਜਿੰਨੀ ਵੀ ਲੜਾਈ ਕੋਵਿਡ-19 ਨਾਲ ਇਟਲੀ ਲੜਿਆ ਹੈ ਉਸ ਵਿੱਚ ਸਿਹਤ ਵਿਭਾਗ ਦਾ ਅਹਿਮ ਯੋਗਦਾਨ ਹੈ ਪਰ ਅਫਸੋਸ ਦੇਸ਼ ਵਿੱਚ 136,000 ਤੋਂ ਵੱਧ ਮੌਤਾਂ ਹੋ ਚੁੱਕੀਆਂ ਹਨ ਜਿਹੜਾ ਕਿ ਸਮੁੱਚੇ ਦੇਸ਼ ਲਈ ਅਸਹਿ ਸਦਮਾ ਹੈ।