ਇਨਸਾਨੀ ਹੱਡੀਆਂ ਦਾ ਨਸ਼ਾ! ਫੜੀ ਗਈ ਹਸੀਨਾ, ਹੋਸ਼ ਉਡਾ ਦੇਵੇਗਾ ਪੂਰਾ ਮਾਮਲਾ

ਇੰਟਰਨੈਸ਼ਨਲ ਡੈਸਕ- ਸ਼੍ਰੀਲੰਕਾ ਵਿੱਚ ਤਾਇਨਾਤ ਕਸਟਮ ਅਧਿਕਾਰੀਆਂ ਨੇ ਇੱਕ ਸਨਸਨੀਖੇਜ਼ ਮਾਮਲੇ ਦਾ ਖੁਲਾਸਾ ਕੀਤਾ ਹੈ। ਕੋਲੰਬੋ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਇੱਕ 21 ਸਾਲਾ ਬ੍ਰਿਟਿਸ਼ ਔਰਤ ਨੂੰ 46 ਕਿਲੋਗ੍ਰਾਮ ਨਸ਼ੀਲੇ ਪਦਾਰਥਾਂ ਸਮੇਤ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਦੱਸਿਆ ਗਿਆ ਹੈ ਕਿ ਇਹ ਨਸ਼ੀਲਾ ਪਦਾਰਥ ਇਨਸਾਨੀ ਪਿੰਜਰਾਂ ਤੋਂ ਬਣਾਇਆ ਜਾਂਦਾ ਹੈ, ਜੋ ਕਬਰਸਤਾਨਾਂ ਤੋਂ ਚੋਰੀ ਕੀਤੇ ਜਾਂਦੇ ਹਨ।

ਗ੍ਰਿਫ਼ਤਾਰ ਕੀਤੀ ਗਈ ਔਰਤ ਦਾ ਨਾਮ ਸ਼ਾਰਲੋਟ ਮੇਅ ਲੀ ਹੈ, ਜੋ ਦੱਖਣੀ ਲੰਡਨ ਦੀ ਰਹਿਣ ਵਾਲੀ ਹੈ ਅਤੇ ਇੱਕ ਵਾਰ ਫਲਾਈਟ ਅਟੈਂਡੈਂਟ ਰਹਿ ਚੁੱਕੀ ਹੈ। ਉਸਨੂੰ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਕੋਲੰਬੋ ਦੇ ਬੰਦਰਾਨਾਇਕੇ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਫੜਿਆ ਗਿਆ ਸੀ। ਉਸਦੇ ਦੋ ਵੱਡੇ ਸੂਟਕੇਸਾਂ ਵਿੱਚੋਂ ਕੁੱਲ 46 ਕਿਲੋਗ੍ਰਾਮ ਨਸ਼ੀਲੇ ਪਦਾਰਥ ਮਿਲੇ ਸਨ, ਜਿਸਦੀ ਬਾਜ਼ਾਰ ਕੀਮਤ ਲਗਭਗ 1.5 ਮਿਲੀਅਨ ਪੌਂਡ (ਲਗਭਗ 16 ਕਰੋੜ ਰੁਪਏ) ਦੱਸੀ ਜਾਂਦੀ ਹੈ। ਇਹ ਸ਼੍ਰੀਲੰਕਾ ਦੇ ਇਤਿਹਾਸ ਵਿੱਚ ਹੁਣ ਤੱਕ ਦੀ ਸਭ ਤੋਂ ਵੱਡੀ ਜ਼ਬਤੀ ਹੈ।

ਸ਼ਾਰਲੋਟ ਦਾ ਬਿਆਨ

ਸ਼ਾਰਲੋਟ ਦੇ ਬਿਆਨ ਵਿਚ ਕਿਹਾ ਕਿ ਉਸਨੂੰ ਨਹੀਂ ਪਤਾ ਸੀ ਕਿ ਉਸਦੇ ਬੈਗ ਵਿੱਚ ਨਸ਼ੀਲੇ ਪਦਾਰਥ ਸਨ। ਉਸਨੇ ਦਾਅਵਾ ਕੀਤਾ ਹੈ ਕਿ ਮੈਂ ਜਾਣਦੀ ਹਾਂ ਕਿ ਇਸਨੂੰ ਕਿਸਨੇ ਰੱਖਿਆ, ਪਰ ਮੈਂ ਉਸਦਾ ਨਾਮ ਨਹੀਂ ਲੈਣਾ ਚਾਹੁੰਦੀ। ਉਸਨੇ ਇਹ ਵੀ ਕਿਹਾ ਕਿ ਮੈਂ ਆਪਣਾ ਸਾਮਾਨ ਵੀ ਨਹੀਂ ਖੋਲ੍ਹਿਆ, ਮੈਨੂੰ ਲੱਗਦਾ ਸੀ ਕਿ ਇਹ ਮੇਰੇ ਕੱਪੜੇ ਹੋਣਗੇ। ਇਸ ਵੇਲੇ ਸ਼ਾਰਲਟ ਨੂੰ ਕੋਲੰਬੋ ਦੇ ਉੱਤਰ ਵਿੱਚ ਨੇਗੋਂਬੋ ਜੇਲ੍ਹ ਵਿੱਚ ਰੱਖਿਆ ਗਿਆ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ-ਭਾਰਤੀ ਪਰਿਵਾਰ ਦੇ ਚਾਰ ਮੈਂਬਰਾਂ ਦੀ ਮੌਤ ਦੇ ਮਾਮਲੇ ਦੇ ਦੋਸ਼ੀ ਨੂੰ ਹੋਵੇਗੀ ਸਜ਼ਾ

ਖਤਰਨਾਕ ਨਸ਼ਾ

ਜਿਸ ਨਸ਼ੇ ਬਾਰੇ ਗੱਲ ਕੀਤੀ ਜਾ ਰਹੀ ਹੈ ਉਸਨੂੰ 'ਕੁਸ਼' ਕਿਹਾ ਜਾਂਦਾ ਹੈ। ਇਹ ਪੱਛਮੀ ਅਫਰੀਕਾ, ਖਾਸ ਕਰਕੇ ਸੀਅਰਾ ਲਿਓਨ ਦੇ ਨੌਜਵਾਨਾਂ ਵਿੱਚ ਬਹੁਤ ਮਸ਼ਹੂਰ ਹੈ। ਇਸ ਨਸ਼ੇ ਦਾ ਪ੍ਰਭਾਵ ਇੰਨਾ ਖਤਰਨਾਕ ਹੈ ਕਿ ਇਸਦਾ ਸੇਵਨ ਕਰਨ ਤੋਂ ਬਾਅਦ ਲੋਕ ਤੁਰਦੇ ਸਮੇਂ ਬੇਹੋਸ਼ ਹੋ ਜਾਂਦੇ ਹਨ ਜਾਂ ਸੜਕ 'ਤੇ ਤੁਰਦੇ ਸਮੇਂ ਵਾਹਨਾਂ ਨਾਲ ਟਕਰਾ ਜਾਂਦੇ ਹਨ। ਰਿਪੋਰਟਾਂ ਅਨੁਸਾਰ ਇਸ ਨਸ਼ੇ ਨੂੰ ਬਣਾਉਣ ਲਈ ਕਬਰਸਤਾਨਾਂ ਤੋਂ ਮਨੁੱਖੀ ਹੱਡੀਆਂ ਅਤੇ ਪਿੰਜਰ ਚੋਰੀ ਕੀਤੇ ਜਾਂਦੇ ਹਨ। ਇਸ ਕਾਰਨ ਸੀਅਰਾ ਲਿਓਨ ਸਰਕਾਰ ਨੇ 2024 ਵਿੱਚ ਐਮਰਜੈਂਸੀ ਦਾ ਐਲਾਨ ਕੀਤਾ ਅਤੇ ਕਬਰਸਤਾਨਾਂ ਦੀ ਰਾਖੀ ਲਈ ਫੌਜ ਤਾਇਨਾਤ ਕੀਤੀ ਗਈ।

ਬੈਂਕਾਕ ਬਣਿਆ ਇੱਕ ਨਵਾਂ ਟ੍ਰਾਂਜ਼ਿਟ ਪੁਆਇੰਟ 

ਸ਼੍ਰੀਲੰਕਾਈ ਕਸਟਮ ਅਧਿਕਾਰੀ ਦਾ ਕਹਿਣਾ ਹੈ ਕਿ ਹਾਲ ਹੀ ਦੇ ਸਮੇਂ ਵਿੱਚ ਬੈਂਕਾਕ ਤੋਂ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਬਹੁਤ ਵਧ ਗਈ ਹੈ। ਸ਼ਾਰਲਟ ਵੀ ਉਥੋਂ ਸ਼੍ਰੀਲੰਕਾ ਪਹੁੰਚੀ। ਉਸਨੂੰ ਪ੍ਰੋਫਾਈਲਿੰਗ ਦੇ ਆਧਾਰ 'ਤੇ ਫੜਿਆ ਗਿਆ। ਇਸ ਦੌਰਾਨ ਇੱਕ ਹੋਰ ਬ੍ਰਿਟਿਸ਼ ਕੁੜੀ ਬੇਲਾ ਕੂਲੀ (18) ਜੋ ਕਿ ਬੈਂਕਾਕ ਤੋਂ ਆਈ ਸੀ, ਨੂੰ ਜਾਰਜੀਆ ਵਿੱਚ 12 ਕਿਲੋ ਗਾਂਜਾ ਅਤੇ 2 ਕਿਲੋ ਹੈਸ਼ ਨਾਲ ਫੜਿਆ ਗਿਆ। ਉਸ ਵਿਰੁੱਧ ਵੀ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਦਾ ਮਾਮਲਾ ਦਰਜ ਕੀਤਾ ਗਿਆ ਹੈ ਅਤੇ ਉਸ ਨੂੰ 20 ਸਾਲ ਜਾਂ ਉਮਰ ਕੈਦ ਦੀ ਸਜ਼ਾ ਹੋ ਸਕਦੀ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਆਪਣੀ ਰਾਏ।