ਵਰਲਡ ਹੈਪੀਨੈੱਸ ਰਿਪੋਰਟ ਵਿਚ ਫਿਨਲੈਂਡ ਲਗਾਤਾਰ 9ਵੀਂ ਵਾਰ ਟਾਪ ’ਤੇ

ਲੰਡਨ - ਸੰਯੁਕਤ ਰਾਸ਼ਟਰ ਨੇ ‘ਵਰਲਡ ਹੈਪੀਨੈੱਸ ਰਿਪੋਰਟ 2026’ ਜਾਰੀ ਕੀਤੀ ਹੈ। ਇਸ ਵਿਚ ਲਗਾਤਾਰ 9ਵੀਂ ਵਾਰ ਫਿਨਲੈਂਡ ਨੂੰ ਦੁਨੀਆ ਦਾ ਸਭ ਤੋਂ ਖੁਸ਼ਹਾਲ ਦੇਸ਼ ਦੱਸਿਆ ਗਿਆ ਹੈ। 147 ਦੇਸ਼ਾਂ ਦੀ ਸੂਚੀ ਵਿਚ ਪਾਕਿਸਤਾਨ 104ਵੇਂ ਨੰਬਰ ’ਤੇ ਹੈ, ਜਦਕਿ ਭਾਰਤ 116ਵੇਂ ਸਥਾਨ ’ਤੇ ਹੈ। 2025 ਵਿਚ ਭਾਰਤ ਦੀ ਰੈਂਕਿੰਗ 118ਵੀਂ ਸੀ। ਉੱਥੇ ਹੀ ਢਾਈ ਸਾਲਾਂ ਤੋਂ ਜੰਗ ਵਿਚ ਫਸਿਆ ਇਜ਼ਰਾਈਲ ਦੁਨੀਆ ਦਾ 8ਵਾਂ ਸਭ ਤੋਂ ਖੁਸ਼ਹਾਲ ਦੇਸ਼ ਦੱਸਿਆ ਗਿਆ ਹੈ।

ਲਿਸਟ ਵਿਚ ਸਭ ਤੋਂ ਹੇਠਾਂ ਸੰਘਰਸ਼ ਵਾਲੇ ਦੇਸ਼ ਹਨ। ਅਫ਼ਗਾਨਿਸਤਾਨ ਫਿਰ ਤੋਂ ਸਭ ਤੋਂ ਘੱਟ ਖੁਸ਼ਹਾਲ ਦੇਸ਼ ਰਿਹਾ, ਉਸ ਤੋਂ ਉੱਪਰ ਸੀਏਰਾ ਲਿਓਨ ਅਤੇ ਮਲਾਵੀ ਹਨ। ਇਸ ਵਾਰ ਵੀ ਕੋਈ ਵੀ ਅੰਗਰੇਜ਼ੀ ਬੋਲਣ ਵਾਲਾ ਦੇਸ਼ ਟਾਪ 10 ਵਿਚ ਨਹੀਂ ਹੈ। ਅਮਰੀਕਾ 23ਵੇਂ, ਕੈਨੇਡਾ 25ਵੇਂ ਅਤੇ ਬ੍ਰਿਟੇਨ 29ਵੇਂ ਸਥਾਨ ’ਤੇ ਹਨ। ਫਿਨਲੈਂਡ ਵਰਗੇ ਦੇਸ਼ਾਂ ਦੀ ਖੁਸ਼ੀ ਦਾ ਕਾਰਨ ਚੰਗੀ ਆਰਥਿਕ ਸਥਿਤੀ, ਸਰੋਤਾਂ ਦੀ ਬਰਾਬਰ ਵੰਡ, ਮਜ਼ਬੂਤ ਵੈੱਲਫੇਅਰ ਸਿਸਟਮ ਅਤੇ ਬਿਹਤਰ ਜੀਵਨ ਪੱਧਰ ਹੈ। ਰਿਪੋਰਟ ਮੁਤਾਬਕ ਸੋਸ਼ਲ ਮੀਡੀਆ ਦੀ ਜ਼ਿਆਦਾ ਵਰਤੋਂ ਕਾਰਨ ਕਈ ਦੇਸ਼ਾਂ ਵਿਚ ਨੌਜਵਾਨਾਂ ਦੀ ਖੁਸ਼ੀ ਅਤੇ ਮਾਨਸਿਕ ਸਥਿਤੀ ’ਤੇ ਬੁਰਾ ਅਸਰ ਪੈ ਰਿਹਾ ਹੈ।