ਅੱਜ ਧਰਤੀ ''ਤੇ 24 ਘੰਟਿਆਂ ਤੋਂ ਛੋਟਾ ਦਿਨ! ਦੁਨੀਆ ਬਣੇਗੀ ਇਸ ਅਨੋਖੀ ਘਟਨਾ ਦੀ ਗਵਾਹ

ਵੈੱਬ ਡੈਸਕ : ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਅੱਜ, ਬੁੱਧਵਾਰ 9 ਜੁਲਾਈ, ਧਰਤੀ ਦੇ ਇਤਿਹਾਸ ਦਾ ਸਭ ਤੋਂ ਛੋਟਾ ਦਿਨ ਹੋ ਸਕਦਾ ਹੈ। ਇਸ ਅਨੋਖੀ ਘਟਨਾ ਦਾ ਕਾਰਨ ਧਰਤੀ ਦਾ ਆਪਣੇ ਧੁਰੇ 'ਤੇ ਪਹਿਲਾਂ ਨਾਲੋਂ ਤੇਜ਼ੀ ਨਾਲ ਘੁੰਮਣਾ ਦੱਸਿਆ ਜਾ ਰਿਹਾ ਹੈ।

ਕਿਉਂ ਹੋ ਰਿਹਾ ਅਜਿਹਾ?
ਵਿਗਿਆਨੀਆਂ ਦੇ ਅਨੁਸਾਰ, ਧਰਤੀ ਦੇ ਘੁੰਮਣ ਦੀ ਗਤੀ 'ਚ ਇਹ ਤਬਦੀਲੀ ਕਈ ਕਾਰਨਾਂ ਕਰ ਕੇ ਹੋ ਰਹੀ ਹੈ। ਇਨ੍ਹਾਂ ਵਿੱਚ ਧਰਤੀ ਦੇ ਚੁੰਬਕੀ ਖੇਤਰ ਦਾ ਕਮਜ਼ੋਰ ਹੋਣਾ, ਚੰਦਰਮਾ ਦੀ ਸਥਿਤੀ, ਗਲੇਸ਼ੀਅਰਾਂ ਦਾ ਪਿਘਲਣਾ ਅਤੇ ਧਰਤੀ ਦੇ ਅੰਦਰਲੇ ਹਿੱਸੇ 'ਚ ਹੋ ਰਹੀਆਂ ਗਤੀਵਿਧੀਆਂ ਸ਼ਾਮਲ ਹਨ।

ਲਿਵਰਪੂਲ ਯੂਨੀਵਰਸਿਟੀ ਦੇ ਭੂ-ਭੌਤਿਕ ਵਿਗਿਆਨੀ ਰਿਚਰਡ ਹੋਮ ਨੇ ਕਿਹਾ ਕਿ 2020 ਅਤੇ 2022 ਵਿੱਚ ਪਰਮਾਣੂ ਘੜੀਆਂ ਦੇ ਵਿਸ਼ਲੇਸ਼ਣ ਤੋਂ ਪਤਾ ਚੱਲਿਆ ਹੈ ਕਿ ਧਰਤੀ ਦੇ ਘੁੰਮਣ ਦੀ ਗਤੀ ਵਧੀ ਹੈ। ਇਹ ਪਰਮਾਣੂ ਘੜੀਆਂ ਸਮੇਂ ਨੂੰ ਮਾਪਣ ਲਈ ਪਰਮਾਣੂਆਂ ਦੀ ਵਾਈਬ੍ਰੇਸ਼ਨ ਦੀ ਵਰਤੋਂ ਕਰਦੀਆਂ ਹਨ। ਪਿਛਲੇ ਸਾਲ, 5 ਜੁਲਾਈ ਨੂੰ 24 ਘੰਟਿਆਂ ਤੋਂ ਘੱਟ ਦਾ ਦਿਨ ਵੀ ਦਰਜ ਕੀਤਾ ਗਿਆ ਸੀ।

ਕੀ ਇਹ ਆਮ ਜੀਵਨ ਨੂੰ ਪ੍ਰਭਾਵਤ ਕਰੇਗਾ?
ਵਿਗਿਆਨੀਆਂ ਦਾ ਕਹਿਣਾ ਹੈ ਕਿ ਦਿਨ ਦੇ ਸਮੇਂ ਵਿੱਚ ਇਹ ਤਬਦੀਲੀ ਮਿਲੀਸਕਿੰਟ ਦੀ ਹੋਵੇਗੀ, ਜਿਸਨੂੰ ਆਮ ਆਦਮੀ ਲਈ ਮਹਿਸੂਸ ਕਰਨਾ ਮੁਸ਼ਕਲ ਹੈ। ਇਸ ਲਈ, ਇਸਦਾ ਰੋਜ਼ਾਨਾ ਜੀਵਨ ਵਿੱਚ ਬਹੁਤਾ ਫ਼ਰਕ ਨਹੀਂ ਪਵੇਗਾ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਛੋਟੀ ਜਿਹੀ ਤਬਦੀਲੀ ਵੀ ਸੈਟੇਲਾਈਟ ਸਿਸਟਮ, GPS ਅਤੇ ਸਮੇਂ ਨੂੰ ਟਰੈਕ ਕਰਨ ਦੇ ਤਰੀਕਿਆਂ ਨੂੰ ਪ੍ਰਭਾਵਿਤ ਕਰ ਸਕਦੀ ਹੈ।

ਧਰਤੀ ਦਾ ਘੁੰਮਣਾ ਅਸਥਿਰ
ਇੱਕ ਸੂਰਜੀ ਦਿਨ ਬਿਲਕੁਲ 86,400 ਸਕਿੰਟ ਯਾਨੀ 24 ਘੰਟੇ ਹੋਣਾ ਚਾਹੀਦਾ ਹੈ, ਪਰ ਧਰਤੀ ਦਾ ਘੁੰਮਣਾ ਹਮੇਸ਼ਾ ਅਸਥਿਰ ਰਿਹਾ ਹੈ। ਖਾਸ ਕਰਕੇ 2020 ਤੋਂ, ਸਾਡਾ ਗ੍ਰਹਿ ਤੇਜ਼ੀ ਨਾਲ ਘੁੰਮ ਰਿਹਾ ਹੈ, ਜਿਸ ਕਾਰਨ ਦਿਨ ਦਾ ਸਮਾਂ 24 ਘੰਟਿਆਂ ਤੋਂ ਘੱਟ ਹੁੰਦਾ ਜਾ ਰਿਹਾ ਹੈ। ਆਮ ਤੌਰ 'ਤੇ, ਭੂਚਾਲ ਅਤੇ ਸਮੁੰਦਰੀ ਧਾਰਾਵਾਂ ਧਰਤੀ ਦੇ ਘੁੰਮਣ ਵਿੱਚ ਤਬਦੀਲੀ ਦਾ ਕਾਰਨ ਹਨ। ਅੱਜ ਤੋਂ ਇਲਾਵਾ, ਵਿਗਿਆਨੀਆਂ ਨੇ ਇਹ ਵੀ ਭਵਿੱਖਬਾਣੀ ਕੀਤੀ ਹੈ ਕਿ 22 ਜੁਲਾਈ ਅਤੇ 5 ਅਗਸਤ ਦੇ ਦਿਨ ਆਮ ਨਾਲੋਂ 1.3-1.51 ਮਿਲੀਸਕਿੰਟ ਛੋਟੇ ਹੋਣਗੇ, ਕਿਉਂਕਿ ਇਨ੍ਹਾਂ ਦਿਨਾਂ ਵਿੱਚ ਚੰਦਰਮਾ ਧਰਤੀ ਦੇ ਭੂਮੱਧ ਰੇਖਾ ਤੋਂ ਸਭ ਤੋਂ ਦੂਰ ਹੋਵੇਗਾ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e