ਆਸਟ੍ਰੇਲੀਆ ਚੋਣਾਂ : ਸਾਬਕਾ ਪੀ. ਐੱਮ. ਟੋਨੀ ਐਬਟ ਹਾਰੇ

ਸਿਡਨੀ, (ਮਨਦੀਪ ਸੈਣੀ)— ਆਸਟ੍ਰੇਲੀਆ 'ਚ ਸ਼ਨੀਵਾਰ ਨੂੰ ਹੋਈਆਂ ਆਮ ਚੋਣਾਂ ਦੇ ਨਤੀਜੇ ਆਉਣੇ ਸ਼ੁਰੂ ਹੋ ਗਏ ਹਨ। ਤਾਜਾ ਜਾਣਕਾਰੀ ਮੁਤਾਬਕ ਲਿਬਰਲ ਪਾਰਟੀ ਨਾਲ ਸਬੰਧਤ ਟੋਨੀ ਐਬਟ ਆਪਣੇ ਹਲਕੇ ਤੋਂ ਚੋਣ ਹਾਰ ਗਏ ਹਨ। ਉਹ ਆਸਟ੍ਰੇਲੀਆ ਦੇ ਸਾਬਕਾ ਪ੍ਰਧਾਨ ਮੰਤਰੀ ਰਹੇ ਹਨ। ਉਹ ਸਿਡਨੀ ਦੇ ਹਲਕੇ ਵਾੜਿੰਗਾਹ ਤੋਂ ਚੋਣ ਲੜ ਰਹੇ ਸਨ। ਆਜ਼ਾਦ ਉਮੀਦਵਾਰ ਜ਼ਾਲੀ ਸਟੇਗਾਲ ਨੇ ਉਨ੍ਹਾਂ ਨੂੰ ਹਰਾਇਆ ਹੈ। 

ਜ਼ਿਕਰਯੋਗ ਹੈ ਕਿ ਆਸਟ੍ਰੇਲੀਆ 'ਚ ਦੇਸ਼ ਦਾ ਪ੍ਰਧਾਨ ਮੰਤਰੀ (ਪੀ. ਐੱਮ.)  ਚੁਣਨ ਲਈ ਸ਼ਨੀਵਾਰ ਨੂੰ 151 ਸੀਟਾਂ 'ਤੇ ਵੋਟਿੰਗ ਹੋਈ ਅਤੇ ਇਸ ਦੇ ਬਾਅਦ ਵੋਟਾਂ ਦੀ ਗਿਣਤੀ ਸ਼ੁਰੂ ਹੋ  ਗਈ। ਪ੍ਰਧਾਨ ਮੰਤਰੀ ਸਕੌਟ ਮੌਰੀਸਨ ਦੀ ਲਿਬਰਲ-ਨੈਸ਼ਨਲ ਗਠਜੋੜ ਅਤੇ ਬਿੱਲ ਸ਼ੌਰਟਨ ਦੀ ਅਗਵਾਈ ਵਾਲੀ ਲੇਬਰ ਪਾਰਟੀ ਵਿਚਕਾਰ ਸਖਤ ਮੁਕਾਬਲਾ ਹੈ। ਤੀਜੀ ਧਿਰ ਗ੍ਰੀਨ ਪਾਰਟੀ ਵੀ ਮੈਦਾਨ 'ਚ ਹੈ। ਜਲਦ ਹੀ ਸਪੱਸ਼ਟ ਹੋ ਜਾਵੇਗਾ ਕਿ ਆਸਟ੍ਰੇਲੀਆ ਦਾ ਅਗਲਾ ਪ੍ਰਧਾਨ ਮੰਤਰੀ ਕੌਣ ਹੋਵੇਗਾ।