ਆਸਟ੍ਰੇਲੀਆ–ਕੈਨੇਡਾ ਵਿਚਕਾਰ $2.5 ਬਿਲੀਅਨ ਦਾ ਸਭ ਤੋਂ ਵੱਡਾ ਰੱਖਿਆ ਸਮਝੌਤਾ

ਮੈਲਬੌਰਨ (ਮਨਦੀਪ ਸਿੰਘ ਸੈਣੀ) : ਆਸਟ੍ਰੇਲੀਆ ਨੇ ਕੈਨੇਡਾ ਨਾਲ $2.5 ਬਿਲੀਅਨ ਮੁੱਲ ਦਾ ਅਧੁਨਿਕ ਰੇਡਾਰ ਸਿਸਟਮ ਵੇਚਣ ਲਈ ਇਤਿਹਾਸਕ ਸਮਝੌਤਾ ਸਾਇਨ ਕੀਤਾ ਹੈ, ਜਿਸਨੂੰ ਦੇਸ਼ ਦੇ ਰੱਖਿਆ ਨਿਰਯਾਤ ਇਤਿਹਾਸ ਦਾ ਸਭ ਤੋਂ ਵੱਡਾ ਕਰਾਰ ਮੰਨਿਆ ਜਾ ਰਿਹਾ ਹੈ। ਕੈਨੇਡਾ ਇਹ ਉੱਚ-ਤਕਨੀਕੀ ਪ੍ਰਣਾਲੀ ਆਪਣੇ ਉੱਤਰੀ ਧ੍ਰੁਵ ਖੇਤਰ ਦੀ ਲੰਬੀ ਦੂਰੀ ਨਿਗਰਾਨੀ ਲਈ ਖਰੀਦ ਰਿਹਾ ਹੈ, ਜੋ ਆਸਟ੍ਰੇਲੀਆ ਦੇ ਪ੍ਰਸਿੱਧ ਜਿੰਦਾਲੀ ਆਪਰੇਸ਼ਨਲ ਰਡਾਰ ਨੈਟਵਰਕ ਦੇ ਅਧਾਰ ’ਤੇ ਤਿਆਰ ਕੀਤੀ ਜਾਵੇਗੀ। ਇਹ ਤਕਨੀਕ ਪਿਛਲੇ ਚਾਰ ਦਹਾਕਿਆਂ ਤੋਂ ਆਸਟ੍ਰੇਲੀਆ ਦੇ ਉੱਤਰੀ ਸਮੁੰਦਰੀ ਇਲਾਕਿਆਂ ਦੀ 3,000 ਕਿਲੋਮੀਟਰ ਤੱਕ ਨਿਗਰਾਨੀ ਕਰਨ ਦੀ ਸਮਰੱਥਾ ਰੱਖਦੀ ਹੈ।

ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਮਾਰਚ ਵਿੱਚ ਇਸ ਪਰਿਯੋਜਨਾ ਲਈ ਵੱਡੇ ਨਿਵੇਸ਼ ਦਾ ਐਲਾਨ ਕੀਤਾ ਸੀ, ਅਤੇ ਹੁਣ ਪਹਿਲੇ ਪੜਾਅ ’ਤੇ ਦਸਤਖ਼ਤ ਹੋਣ ਨਾਲ ਇਹ ਪ੍ਰੋਜੈਕਟ ਅੱਗੇ ਵਧਣ ਲਈ ਤਿਆਰ ਹੈ। ਕੈਨੇਡਾ ਦੇ ਰੱਖਿਆ ਖਰੀਦ ਸਕੱਤਰ ਸਟੀਫਨ ਫੂਹਰ ਨੇ ਇਸ ਸਮਝੌਤੇ ਨੂੰ ਦੋਵੇਂ ਦੇਸ਼ਾਂ ਦੇ ਰਿਸ਼ਤਿਆਂ ਵਿੱਚ ਇੱਕ ਮਹੱਤਵਪੂਰਨ ਮੋੜ ਕਰਾਰ ਦਿੰਦਿਆਂ ਕਿਹਾ ਕਿ ਬਦਲਦੇ ਭੂ-ਰਾਜਨੀਤਿਕ ਹਾਲਾਤਾਂ ਵਿੱਚ ਆਸਟ੍ਰੇਲੀਆ ਵਰਗਾ ਭਰੋਸੇਯੋਗ ਸਾਥੀ ਬਹੁਤ ਕੀਮਤੀ ਹੈ।

ਕੈਨੇਡਾ ਨੇ ਇਸ ਪ੍ਰਣਾਲੀ ਦੇ ਵਿਸਤਾਰ ਅਤੇ ਭਵਿੱਖੀ ਵਿਕਾਸ ਲਈ ਕੁੱਲ $6.5 ਬਿਲੀਅਨ ਰਾਖਵੇਂ ਰੱਖੇ ਹਨ। ਆਸਟ੍ਰੇਲੀਆ ਦੇ ਰੱਖਿਆ ਮੰਤਰੀ ਰਿਚਰਡ ਮਾਰਲਸ ਨੇ ਕਿਹਾ ਕਿ ਇਹ ਤਕਨਾਲੋਜੀ ਬਹੁਤ ਸੰਵੇਦਨਸ਼ੀਲ ਹੈ ਅਤੇ ਇਸਨੂੰ ਸਿਰਫ਼ ਸਭ ਤੋਂ ਨੇੜਲੇ ਸਾਥੀਆਂ ਨਾਲ ਹੀ ਸਾਂਝਾ ਕੀਤਾ ਜਾ ਸਕਦਾ ਹੈ, ਹਾਲਾਂਕਿ ਭਵਿੱਖ ਵਿੱਚ ਹੋਰ ਦੇਸ਼ਾਂ  ਜਿਵੇਂ ਕਿ ਅਮਰੀਕਾ ਨਾਲ ਸੰਭਾਵਿਤ ਨਿਰਯਾਤ ਦੇ ਮੌਕਿਆਂ ਦਾ ਵਿਸ਼ਲੇਸ਼ਣ ਵੀ ਕੀਤਾ ਜਾ ਸਕਦਾ ਹੈ।

ਆਪਣੇ ਦੌਰੇ ਦੌਰਾਨ ਸਟੀਫਨ ਫੂਹਰ ਨੇ ਆਸਟ੍ਰੇਲੀਆ ਦੇ ਬਿਨਾਂ ਪਾਇਲਟ ਵਾਲੇ  ਜਹਾਜ਼ ਦੀ ਸਮਰੱਥਾ ਦੀ ਜਾਂਚ ਕਰਨ ਵਿੱਚ ਵੀ ਦਿਲਚਸਪੀ ਦਿਖਾਈ। ਇਹ ਡਰੋਨ F‑35 ਵਰਗੇ ਲੜਾਕੂ ਜਹਾਜ਼ਾਂ ਦੇ ਨਾਲ ਮਿਲ ਕੇ ਕੰਮ ਕਰਨ ਲਈ ਤਿਆਰ ਕੀਤਾ ਗਿਆ ਹੈ, ਜਿਸਦੀ ਰੇਂਜ ਲਗਭਗ 3,700 ਕਿਲੋਮੀਟਰ ਹੈ ਅਤੇ ਜੋ ਇੰਟੈਲੀਜੈਂਸ, ਨਿਗਰਾਨੀ ਅਤੇ ਲੜਾਕੂ ਮਿਸ਼ਨਾਂ ਲਈ ਵਰਤਿਆ ਜਾ ਸਕਦਾ ਹੈ। ਜਰਮਨੀ ਵੀ ਇਸ ਡਰੋਨ ਵਿੱਚ ਗਹਿਰੀ ਦਿਲਚਸਪੀ ਰੱਖਦਾ ਹੈ, ਅਤੇ ਹੁਣ ਕੈਨੇਡਾ ਵੀ ਇਸਦੀ ਤਕਨੀਕੀ ਸਮਰੱਥਾ ਦਾ ਮੁਲਾਂਕਣ ਕਰ ਰਿਹਾ ਹੈ।

ਇਹ ਸਮਝੌਤਾ ਨਾ ਸਿਰਫ਼ ਆਸਟ੍ਰੇਲੀਆ ਲਈ ਵੱਡੀ ਆਰਥਿਕ ਕਾਮਯਾਬੀ ਹੈ, ਸਗੋਂ ਦੋਵੇਂ ਦੇਸ਼ਾਂ ਵਿਚਕਾਰ ਰੱਖਿਆ ਸਹਿਯੋਗ ਨੂੰ ਇੱਕ ਨਵੀਂ ਦਿਸ਼ਾ ਵੀ ਦਿੰਦਾ ਹੈ। ਭਵਿੱਖ ਵਿੱਚ ਇਸ ਤਕਨਾਲੋਜੀ ਦੇ ਸਾਂਝੇ ਵਿਕਾਸ ਅਤੇ ਹੋਰ ਦੇਸ਼ਾਂ ਨਾਲ ਸੰਭਾਵਿਤ ਨਿਰਯਾਤ ਦੇ ਦਰਵਾਜ਼ੇ ਵੀ ਖੁੱਲ੍ਹ ਸਕਦੇ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e