ਆਸਟ੍ਰੇਲੀਆ ''ਚ ਗੈਰ ਕਾਨੂੰਨੀ ਢੰਗ ਨਾਲ ਮੈਡੀਕਲ ਸਪਲਾਈ ਦੇ ਨਿਰਯਾਤ ''ਤੇ ਭਾਰੀ ਜੁਰਮਾਨਾ

ਸਿਡਨੀ (ਬਿਊਰੋ): ਆਸਟ੍ਰੇਲੀਆਈ ਸਰਕਾਰ ਨਵੇਂ ਚਾਲੂ ਜੈਵ ਸੁਰੱਖਿਆ ਕਾਨੂੰਨਾਂ ਤਹਿਤ ਗੈਰ ਕਾਨੂੰਨੀ ਢੰਗ ਨਾਲ ਬਰਾਮਦ ਕੀਤੇ ਗਏ ਮਾਸਕ, ਹੈਂਡ ਸੈਨੀਟਾਈਜ਼ਰ ਜਾਂ ਹੋਰ ਨਿੱਜੀ ਸੁਰੱਖਿਆ ਉਪਕਰਣਾਂ ਦੇ ਦੋਸ਼ੀ ਲੋਕਾਂ ਨੂੰ ਭਾਰੀ ਜ਼ੁਰਮਾਨੇ ਨਾਲ ਸਜ਼ਾ ਦੇਵੇਗੀ। ਗ੍ਰਹਿ ਮੰਤਰੀ ਪੀਟਰ ਡੱਟਨ ਦੇ ਦਫ਼ਤਰ ਨੇ ਬੁੱਧਵਾਰ ਨੂੰ ਇਕ ਬਿਆਨ ਵਿਚ ਕਿਹਾ ਕਿ ਜੁਰਮਾਨਾ ਸਰਕਾਰ ਵੱਲੋਂ ਦੇਸ਼ ਦੇ ਅੰਦਰ ਮੈਡੀਕਲ ਸਪਲਾਈ ਨੂੰ ਬਣਾਈ ਰੱਖਣ ਲਈ ਅਪਣਾਏ ਗਏ ਕਈ ਨਵੇਂ ਐਮਰਜੈਂਸੀ ਉਪਾਆਂ ਵਿਚੋਂ ਇਕ ਸੀ।

ਅੱਜ ਤਕ, ਆਸਟ੍ਰੇਲੀਆ ਵਿਚ 5,000 ਤੋਂ ਵੱਧ ਲੋਕਾਂ, ਖੁਦ ਡੱਟਨ ਸਮੇਤ, ਵਾਇਰਸ ਨਾਲ ਸੰਕ੍ਰਮਿਤ ਹੋ ਚੁੱਕੇ ਹਨ। ਨਵੇਂ ਉਪਾਵਾਂ ਦੇ ਤਹਿਤ, ਅਧਿਕਾਰੀਆਂ ਨੇ "ਜ਼ਰੂਰੀ ਚੀਜ਼ਾਂ ਦੇ ਸ਼ੋਸ਼ਣਸ਼ੀਲ ਨਿਰਯਾਤ ਨੂੰ ਰੋਕਣ ਲਈ" ਕਸਟਮ ਨਿਯਮਾਂ ਵਿਚ ਸੋਧ ਕੀਤੀ ਹੈ। ਡੱਟਨ ਦਫਤਰ ਨੇ ਕਿਹਾ,''ਕਸਟਮ ਕਾਨੂੰਨ ਦੀ ਉਲੰਘਣਾ ਕਰਨ 'ਤੇ 210,000 ਆਸਟ੍ਰੇਲੀਆਈ ਡਾਲਰ (128,275 ਡਾਲਰ) ਤੱਕ ਦਾ ਜੁਰਮਾਨਾ ਹੋ ਸਕਦਾ ਹੈ, ਜਦੋਂ ਕਿ ਜੈਵ ਸੁਰੱਖਿਆ ਐਕਟ ਦੀ ਉਲੰਘਣਾ ਕਰਨ ਦੇ ਦੋਸ਼ੀ ਪਾਏ ਜਾਣ' ਤੇ ਪੰਜ ਸਾਲ ਦੀ ਕੈਦ ਅਤੇ 63,000 ਆਸਟ੍ਰੇਲੀਆਈ ਡਾਲਰ (38,480 ਡਾਲਰ) ਤੱਕ ਦਾ ਜੁਰਮਾਨਾ ਹੋ ਸਕਦਾ ਹੈ।''

ਬਿਆਨ ਵਿਚ ਲਿਖਿਆ ਗਿਆ ਹੈ,''ਇਹ ਉਪਾਅ ਜ਼ਰੂਰੀ ਹੋ ਗਏ ਹਨ ਕਿਉਂਕਿ ਅਸੀਂ ਸ਼ੋਸ਼ਣਸ਼ੀਲ ਨਿਰਯਾਤ ਅਤੇ ਕੀਮਤ ਦੇ ਵਾਧੇ ਤੋਂ ਮੁਨਾਫਾ ਕਮਾਉਣ ਦੇ ਇਰਾਦੇ ਨਾਲ ਬਹੁਤ ਘੱਟ ਵਿਅਕਤੀਆਂ ਨੂੰ ਆਸਟ੍ਰੇਲੀਆ ਵਿਚ ਪ੍ਰਚੂਨ ਦੁਕਾਨਾਂ ਤੋਂ ਜ਼ਰੂਰੀ ਵਸਤਾਂ ਦੀ ਥੋਕ ਖਰੀਦ ਵਿਚ ਹਿੱਸਾ ਲੈਂਦੇ ਵੇਖਿਆ ਹੈ।' ਵਪਾਰ ਮੰਤਰੀ ਸਾਈਮਨ ਬਰਮਿੰਘਮ ਨੇ ਕੱਲ੍ਹ ਆਸਟ੍ਰੇਲੀਆ ਦੀ ਏ.ਬੀ.ਸੀ. ਨਿਊਜ਼ ਨਾਲ ਇੱਕ ਇੰਟਰਵਿਊ ਦੌਰਾਨ ਕਿਹਾ, “ਅਸੀਂ ਆਸਟ੍ਰੇਲੀਆ ਦੇ ਹਿੱਤਾਂ ਦੀ ਰੱਖਿਆ ਲਈ, ਉਨ੍ਹਾਂ ਚੀਜ਼ਾਂ ਦੇ ਅਣਅਧਿਕਾਰਤ, ਅਣਉਚਿਤ ਨਿਰਯਾਤ ਨੂੰ ਰੋਕਣ ਲਈ ਕਦਮ ਚੁੱਕੇ ਹਨ ਜਿਨ੍ਹਾਂ ਉੱਤੇ ਅਸੀਂ ਆਪਣੀ ਸਿਹਤ ਸੰਭਾਲ ਲਈ ਨਿਰਭਰ ਕਰਦੇ ਹਾਂ।” 

ਟੀ.ਜੀ.ਏ. ਵਿਭਾਗ (Therapeutic Goods Administration) ਨੇ ਸਮੁੱਚੇ ਆਸਟ੍ਰੇਲੀਆ ਵਿਚਲੀਆਂ ਘੱਟੋ ਘੱਟ 5 ਕੰਪਨੀਆਂ ਅਤੇ ਇੱਕ ਵਿਅਕਤੀ ਨੂੰ ਗੈਰ ਕਾਨੂੰਨੀ ਤੌਰ ਤਰੀਕਿਆਂ ਨਾਲ ਕੋਵਿਡ-19 ਦੀਆਂ ਪਾਬੰਦੀਆਂ ਦੇ ਚਲਦਿਆਂ ਮਾਸਕ ਆਯਾਤ ਕਰਨ 'ਤੇ ਜੁਰਮਾਨੇ ਲਗਾਏ ਹਨ। ਇਨ੍ਹਾਂ ਵਿਚ ਸਮੇਂ ਸਹਿਤ ਛੋਟਾਂ, ਸਬੰਧਤ ਅਧਿਕਾਰੀਆਂ ਦੀ ਮਨਜ਼ੂਰੀ ਆਦਿ ਵਰਗੇ ਕਈ ਮੁੱਦਿਆਂ ਉਪਰ ਇਲਜ਼ਾਮ ਸ਼ਾਮਿਲ ਹਨ। ਇਸੇ ਦੇ ਤਹਿਤ ਸਿਡਨੀ ਅੰਦਰ ਵੀ (ਸਿਡਨੀ ਟੂਲਜ਼) ਨੂੰ ਦੋ ਜੁਰਮਾਨੇ (ਕੁੱਲ 26,640 ਡਾਲਰ) ਲਗਾਏ ਗਏ ਹਨ।  ਇਸ ਕੰਪਨੀ ਤੋਂ ਇਲਾਵਾ ਹੈਪਵਰਥ ਇੰਡਸਟ੍ਰੀਅਲ ਵੀਅਰ ਅਤੇ ਪ੍ਰੀਮੀਅਰ ਇਨਵੈਸਟਮੈਂਟ (ਆਸਟ੍ਰੇਲੀਆ), ਮੈਲਬੌਰਨ ਦੀ ਪਲਸ ਪੈਕ ਅਤੇ ਟੀ.ਟੀ.ਬੀ. ਇੰਟਰਨੈਸ਼ਨਲ ਨੂੰ ਵੀ 13320 ਡਾਲਰ (ਪ੍ਰਤੀ ਕੰਪਨੀ) ਦੇ ਜੁਰਮਾਨੇ ਲਗਾਏ ਗਏ ਹਨ। ਇਸੇ ਲੜੀ ਦੇ ਤਹਿਤ, ਮੈਲਬੌਰਨ ਦੀ ਇੱਕ ਬੀਬੀ 'ਤੇ ਵੀ ਵਿਅਕਤੀਗਤ ਰੂਪ ਵਿਚ 2664 ਡਾਲਰ ਦਾ ਜੁਰਮਾਨਾ ਲਗਾਇਆ ਗਿਆ ਹੈ।