ਆਸਟ੍ਰੇਲੀਆ ''ਚ ਕੋਵਿਡ-19 ਟੀਕਾਕਰਨ ਦਾ ਦੂਜਾ ਪੜਾਅ ਮਾਰਚ ''ਚ ਹੋਵੇਗਾ ਸ਼ੁਰੂ

ਸਿਡਨੀ (ਬਿਊਰੋ) ਆਸਟ੍ਰੇਲੀਆ ਵਿਚ ਕੋਰੋਨਾ ਵਾਇਰਸ ਟੀਕਾ ਮੁਹਿੰਮ ਦਾ ਦੂਜਾ ਪੜਾਅ ਮਾਰਚ ਦੇ ਅਖੀਰ ਵਿਚ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ ਕਿਉਂਕਿ ਵਿਦੇਸ਼ਾਂ ਵਿਚੋਂ ਵੈਕਸੀਨ ਸਪਲਾਈ ਵਿਚ ਦੇਰੀ ਹੋ ਰਹੀ ਹੈ। ਇਹ ਮੰਨਿਆ ਜਾਂਦਾ ਹੈ ਕਿ ਟੀਕਾਕਰਨ ਪ੍ਰੋਗਰਾਮ ਦੇ ਅਗਲੇ ਦੌਰ ਵਿਚ ਤਕਰੀਬਨ 60 ਲੱਖ ਲੋਕ ਸ਼ਾਮਲ ਹਨ, ਜਿਨ੍ਹਾਂ ਵਿਚ 70 ਤੋਂ ਵੱਧ ਉਮਰ ਦੇ ਆਸਟ੍ਰੇਲੀਆਈ ਸ਼ਾਮਲ ਹਨ।

ਆਸਟ੍ਰੇਲੀਆ ਵਿਚ ਉਪਲਬਧ ਟੀਕੇ ਦੀ ਪਹਿਲੀ ਖੁਰਾਕ ਫਾਈਜ਼ਰ ਜੈਬ ਹੋਵੇਗੀ, ਜਿਸ ਵਿਚ ਉਹਨਾਂ ਲੋਕਾਂ ਨੂੰ ਸ਼ਾਮਲ ਕੀਤਾ ਜਾਵੇਗਾ ਜੋ ਬਜ਼ੁਰਗ ਦੇਖਭਾਲ, ਹੋਟਲ ਕੁਆਰੰਟੀਨ ਜਾਂ ਫਰੰਟਲਾਈਨ ਸਿਹਤ ਵਿਚ ਰਹਿੰਦੇ ਹਨ ਜਾਂ ਕੰਮ ਕਰਦੇ ਹਨ।ਟੀਕਾਕਰਨ ਦਾ ਇਹ ਪਹਿਲਾ ਦੌਰ ਫਰਵਰੀ ਦੇ ਅਖੀਰ ਵਿਚ ਸ਼ੁਰੂ ਹੋਣ ਦੀ ਉਮੀਦ ਹੈ। ਥੈਰੇਪੀਟਿਕ ਗੁੱਡਜ਼ ਐਡਮਨਿਸਟ੍ਰੇਸ਼ਨ (ਟੀ.ਜੀ.ਏ.) ਨੇ ਫਾਈਜ਼ਰ ਟੀਕੇ ਨੂੰ ਆਰਜ਼ੀ ਮਨਜ਼ੂਰੀ ਦੇ ਦਿੱਤੀ ਹੈ ਅਤੇ ਇਸ ਮਹੀਨੇ ਦੇ ਅੰਤ ਵਿਚ 80,000 ਪ੍ਰਤੀ ਹਫ਼ਤੇ ਦੀ ਦਰ ਨਾਲ ਟੀਕੇ ਯੂਰਪ ਤੋਂ ਆਸਟ੍ਰੇਲੀਆ ਨੂੰ ਭੇਜੇ ਜਾਣਗੇ।

ਪੜ੍ਹੋ ਇਹ ਅਹਿਮ ਖਬਰ-  ਕਿਸਾਨਾਂ ਦੇ ਹੱਕ 'ਚ ਅੰਤਰਰਾਸ਼ਟਰੀ ਹਸਤੀਆਂ, ਪੌਪ ਸਟਾਰ ਰਿਹਾਨਾ ਨੇ ਵੀ ਦਿੱਤਾ ਸਮਰਥਨ

ਪਰ ਪ੍ਰਧਾਨ ਮੰਤਰੀ ਸਕੌਟ ਮੌਰੀਸਨ ਦਾ ਕਹਿਣਾ ਹੈ ਕਿ ਵੈਕਸੀਨ ਆਉਣ ਦੀ ਸਹੀ ਤਾਰੀਖ਼ ਵਿਦੇਸ਼ੀ ਸਪਲਾਈ ਅਤੇ ਸ਼ਿਪਿੰਗ ਦੇ ਮੁੱਦਿਆਂ ਉੱਤੇ ਨਿਰਭਰ ਕਰੇਗੀ। ਛੂਤ ਦੀਆਂ ਬਿਮਾਰੀਆਂ ਦੇ ਡਾਕਟਰ ਡਾ. ਪਾਲ ਗ੍ਰਿਫਿਨ ਨੇ ਕਿਹਾ ਕਿ ਆਸਟ੍ਰੇਲੀਆ ਵਿਚ ਟੀਕਾਕਰਨ ਮੁਹਿੰਮ ਦੇ ਕੁਝ ਦੇਰੀ ਨਾਲ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ। ਡਾਕਟਰ ਗ੍ਰਿਫਿਨ ਨੇ ਅੱਜ ਦੱਸਿਆ ਕਿ ਇਹੀ ਕਾਰਨ ਹੈ ਕਿ ਸਾਨੂੰ ਪਹਿਲਾਂ ਤੋਂ ਯੋਜਨਾ ਬਣਾਉਣ ਦੀ ਜ਼ਰੂਰਤ ਹੈ ਅਤੇ ਇਸੇ ਲਈ ਸਾਡੇ ਕੋਲ ਤਿੰਨ ਵੱਖ-ਵੱਖ ਟੀਕੇ ਲਗਾਉਣ ਦੀ ਲੋੜ ਹੈ।ਉਹਨਾਂ ਮੁਤਾਬਕ, ਅਸੀਂ ਜਾਣਦੇ ਹਾਂ ਕਿ ਮੰਗ ਅਵਿਸ਼ਵਾਸ਼ਯੋਗ ਰਹੀ ਹੈ ਅਤੇ ਕੁਝ ਦੇਸ਼ਾਂ ਨੂੰ ਸਪਲਾਈ ਲੈਣ ਵਿਚ ਮੁਸ਼ਕਲ ਆਈ ਸੀ। ਸਾਡੇ ਕੋਲ ਬਹੁਤ ਸਾਰੇ ਵੱਖ ਵੱਖ ਟੀਕੇ ਹਨ, ਜਿਨ੍ਹਾਂ ਵਿਚੋਂ ਇੱਕ ਆਸਟ੍ਰੇਲੀਆ ਵਿਚ ਬਣਾਇਆ ਜਾ ਸਕਦਾ ਹੈ। ਉਮੀਦ ਹੈ ਕਿ ਸਪਲਾਈ ਦੇ ਮੁੱਦਿਆਂ ਨਾਲ ਸਾਡੀ ਮੁਹਿੰਮ ਮਹੱਤਵਪੂਰਣ ਰੂਪ ਵਿਚ ਕਮਜ਼ੋਰ ਨਹੀਂ ਹੋਵੇਗੀ। 

ਟੀ.ਜੀ.ਏ. ਨੇ ਜਨਤਾ ਨੂੰ ਭਰੋਸਾ ਦਿਵਾਇਆ ਹੈ ਕਿ ਟੀਕਾ 70 ਸਾਲ ਤੋਂ ਵੱਧ ਉਮਰ ਦੇ ਲੋਕਾਂ ਲਈ ਸੁਰੱਖਿਅਤ ਹੈ ਅਤੇ ਇਸ ਉਮਰ ਵਰਗ ਦੇ ਲੋਕਾਂ ਲਈ ਟੀਕੇ ਦੀ ਵਰਤੋਂ ਨੂੰ ਪ੍ਰਵਾਨਗੀ ਦਿੱਤੀ ਗਈ ਹੈ।ਇੱਥੇ ਦੱਸ ਦਈਏ ਕਿ ਆਸਟ੍ਰੇਲੀਆ ਵਿਚ ਹੁਣ ਤੱਕ ਵਾਇਰਸ ਦੇ 28,829  ਮਾਮਲੇ ਸਾਹਮਣੇ ਆਏ ਹਨ ਜਦਕਿ 909 ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।

ਨੋਟ- ਉਕਤ ਖ਼ਬਰ ਬਾਰੇ ਕੁਮੈਂਟ ਕਰ ਦੱਸੋ ਆਪਣੀ ਰਾਏ।