ਇੰਗਲੈਂਡ ’ਚ ਫੌਜ ਦੁਆਰਾ ਕੀਤੀ ਜਾ ਰਹੀ ਹੈ ਐਂਬੂਲੈਂਸ ਸੇਵਾਵਾਂ ਦੀ ਸਹਾਇਤਾ

ਗਲਾਸਗੋ/ਲੰਡਨ, (ਮਨਦੀਪ ਖੁਰਮੀ ਹਿੰਮਤਪੁਰਾ)– ਇੰਗਲੈਂਡ ’ਚ ਐਂਬੂਲੈਂਸ ਸੇਵਾਵਾਂ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣ ਅਤੇ ਜ਼ਿਆਦਾ ਲੋਕਾਂ ਲਈ ਪਹੁੰਚਯੋਗ ਬਨਾਉਣ ਲਈ ਫੌਜ ਦੀ ਸਹਾਇਤਾ ਲਈ ਜਾ ਰਹੀ ਹੈ। ਇਸ ਲਈ ਇੰਗਲੈਂਡ ’ਚ ਚਾਰ ਐਂਬੂਲੈਂਸ ਟਰੱਸਟਾਂ ’ਚ ਮਰੀਜ਼ਾਂ ਦੀ ਦੇਖਭਾਲ ’ਚ ਸਹਾਇਤਾ ਲਈ ਫੌਜ ਦੇ ਲਗਭਗ 100 ਮੈਂਬਰਾਂ ਨੂੰ ਲਿਆਂਦਾ ਗਿਆ ਹੈ। ਐਂਬੂਲੈਂਸ ਦੀ ਜ਼ਿਆਦਾ ਮੰਗ ਅਤੇ ਸਟਾਫ ਦੀ ਘਾਟ ਕਾਰਨ ਸੈਨਿਕਾਂ ਦੀ ਵਰਤੋਂ ਐੱਨ. ਐੱਚ. ਐੱਸ. ਐੱਸ. ਸਟਾਫ ਦੇ ਨਾਲ ਕੰਮ ਕਰਨ ਲਈ ਕੀਤੀ ਜਾ ਰਹੀ ਹੈ। ਇੰਗਲੈਂਡ ਦੇ ਸਾਊਥ ਸੈਂਟਰਲ, ਸਾਊਥ ਵੈਸਟ, ਨਾਰਥ ਈਸਟ ਅਤੇ ਈਸਟ ਖੇਤਰਾਂ ’ਚ ਐਂਬੂਲੈਂਸ ਸੇਵਾਵਾਂ ਨੂੰ ਫੌਜ ਦੁਆਰਾ ਸਹਾਇਤਾ ਦਿੱਤੀ ਜਾ ਰਹੀ ਹੈ। 

ਇੰਗਲੈਂਡ ’ਚ ਐਂਬੂਲੈਂਸ ਸੇਵਾ 'ਤੇ ਦਬਾਅ ਸਿਰਫ ਮਹਾਂਮਾਰੀ ਤਕ ਹੀ ਸੀਮਤ ਨਹੀਂ ਸੀ। ਇਸ ਵੇਲੇ ਵੀ ਵੱਡੀ ਗਿਣਤੀ ’ਚ 999 ਕਾਲਾਂ ਆ ਰਹੀਆਂ ਹਨ, ਕਿਉਂਕਿ ਬੀਮਾਰੀਆਂ ਦੇ ਨਾਲ ਐਂਬੂਲੈਂਸਾਂ ਦੀ ਮੰਗ ਵਧ ਰਹੀ ਹੈ। ਫੌਜ ਤੋਂ ਸਹਾਇਤਾ ਪ੍ਰਾਪਤ ਕਰਨ ਲਈ ਯੂਕੇ ਦੇ ਰੱਖਿਆ ਮੰਤਰਾਲਾ ਨੂੰ ਸਮਾਜਿਕ ਦੇਖਭਾਲ ਵਿਭਾਗ ਕੋਲੋਂ ਇੰਗਲੈਂਡ ’ਚ ਬਹੁਤ ਸਾਰੀਆਂ ਐਂਬੂਲੈਂਸ ਸੇਵਾਵਾਂ ਨੂੰ ਸਹਾਇਤਾ ਪ੍ਰਦਾਨ ਕਰਨ ਦੀ ਬੇਨਤੀ ਪ੍ਰਾਪਤ ਹੋਈ ਹੈ। ਇਸ ਲਈ ਕੁੱਲ ਮਿਲਾ ਕੇ 97 ਫੌਜੀ ਕਰਮਚਾਰੀ ਤਾਇਨਾਤ ਕੀਤੇ ਗਏ ਹਨ। ਇਹ ਫੌਜੀ ਮਰੀਜ਼ਾਂ ਨੂੰ ਅਪੌਇੰਟਮੈਂਟਾਂ ’ਚ ਆਉਣ ਅਤੇ ਲਿਜਾਣ ਵਿਚ ਸਹਾਇਤਾ, ਐਂਬੂਲੈਂਸਾਂ ਦੀ ਸਾਂਭ-ਸੰਭਾਲ, ਹਸਪਤਾਲ ਤੋਂ ਛੁੱਟੀ ਆਦਿ ਦਿਵਾਉਣ ਦੇ ਨਾਲ ਪੈਰਾ ਮੈਡੀਕਲ ਨਾਲ ਵੀ ਮਿਲ ਕੇ ਕੰਮ ਕਰ ਰਹੇ ਹਨ।