ਹੈਲਥ ਡੈਸਕ - ਸਾਡੇ ਘਰਾਂ 'ਚ ਅਕਸਰ ਰਾਤ ਦੀ ਬਚੀ ਹੋਈ ਰੋਟੀ ਨੂੰ ਬੇਕਾਰ ਸਮਝ ਕੇ ਸੁੱਟ ਦਿੱਤਾ ਜਾਂਦਾ ਹੈ ਜਾਂ ਜਾਨਵਰਾਂ ਨੂੰ ਪਾ ਦਿੱਤਾ ਜਾਂਦਾ ਹੈ ਪਰ ਸਿਹਤ ਮਾਹਿਰਾਂ ਅਤੇ ਆਯੁਰਵੇਦ ਅਨੁਸਾਰ, ਬਾਸੀ ਰੋਟੀ (ਖ਼ਾਸ ਕਰਕੇ ਕਣਕ ਦੀ) ਸਿਹਤ ਲਈ ਕਿਸੇ ਵਰਦਾਨ ਤੋਂ ਘੱਟ ਨਹੀਂ ਹੈ। ਜੇਕਰ ਤੁਸੀਂ ਇਸ ਦੇ ਫਾਇਦੇ ਜਾਣ ਲਵੋਗੇ, ਤਾਂ ਤੁਸੀਂ ਕਦੇ ਵੀ ਇਸ ਨੂੰ ਸੁੱਟਣ ਬਾਰੇ ਨਹੀਂ ਸੋਚੋਗੇ।

ਬਾਸੀ ਰੋਟੀ ਦੇ 5 ਬੇਮਿਸਾਲ ਫਾਇਦੇ :- 

ਬਲੱਡ ਪ੍ਰੈਸ਼ਰ ਕਰੇ ਕੰਟਰੋਲ
- ਜਿਨ੍ਹਾਂ ਲੋਕਾਂ ਨੂੰ ਹਾਈ ਬਲੱਡ ਪ੍ਰੈਸ਼ਰ ਦੀ ਸਮੱਸਿਆ ਹੈ, ਉਨ੍ਹਾਂ ਲਈ ਸਵੇਰੇ ਠੰਡੇ ਦੁੱਧ ਨਾਲ ਬਾਸੀ ਰੋਟੀ ਖਾਣਾ ਬਹੁਤ ਲਾਭਕਾਰੀ ਹੈ। ਇਹ ਸਰੀਰ 'ਚ ਸੋਡੀਅਮ ਦੀ ਮਾਤਰਾ ਨੂੰ ਸੰਤੁਲਿਤ ਕਰਕੇ ਬੀ.ਪੀ. ਨੂੰ ਕੰਟਰੋਲ 'ਚ ਰੱਖਦੀ ਹੈ।

ਸ਼ੂਗਰ 'ਚ ਰਾਹਤ
- ਸ਼ੂਗਰ ਦੇ ਮਰੀਜ਼ਾਂ ਲਈ ਬਾਸੀ ਰੋਟੀ ਇਕ ਦਵਾਈ ਵਾਂਗ ਕੰਮ ਕਰਦੀ ਹੈ। ਰਾਤ ਦੀ ਬਚੀ ਹੋਈ ਰੋਟੀ ਨੂੰ ਸਵੇਰੇ ਫਿੱਕੇ ਦੁੱਧ ਨਾਲ ਖਾਣ ਨਾਲ ਬਲੱਡ ਸ਼ੂਗਰ ਦਾ ਪੱਧਰ ਸਥਿਰ ਰਹਿੰਦਾ ਹੈ।

ਪੇਟ ਦੀਆਂ ਸਮੱਸਿਆਵਾਂ ਦਾ ਹੱਲ
- ਬਾਸੀ ਰੋਟੀ 'ਚ ਫਾਈਬਰ ਦੀ ਮਾਤਰਾ ਤਾਜ਼ੀ ਰੋਟੀ ਨਾਲੋਂ ਵੱਧ ਹੁੰਦੀ ਹੈ। ਇਹ ਪਾਚਨ ਤੰਤਰ ਨੂੰ ਦਰੁਸਤ ਕਰਦੀ ਹੈ ਅਤੇ ਗੈਸ, ਕਬਜ਼ ਤੇ ਐਸੀਡਿਟੀ ਵਰਗੀਆਂ ਪੇਟ ਦੀਆਂ ਬੀਮਾਰੀਆਂ ਤੋਂ ਛੁਟਕਾਰਾ ਦਿਵਾਉਂਦੀ ਹੈ।

ਸਰੀਰ ਦਾ ਤਾਪਮਾਨ ਰੱਖੇ ਸਹੀ
- ਗਰਮੀਆਂ ਦੇ ਮੌਸਮ 'ਚ ਬਾਸੀ ਰੋਟੀ ਖਾਣਾ ਬਹੁਤ ਫਾਇਦੇਮੰਦ ਹੁੰਦਾ ਹੈ। ਇਹ ਸਰੀਰ ਦੇ ਤਾਪਮਾਨ ਨੂੰ ਵਧਣ ਨਹੀਂ ਦਿੰਦੀ ਅਤੇ 'ਹੀਟ ਸਟ੍ਰੋਕ' (ਲੂ ਲੱਗਣ) ਦੇ ਖ਼ਤਰੇ ਨੂੰ ਘੱਟ ਕਰਦੀ ਹੈ।

ਕਮਜ਼ੋਰੀ ਕਰੇ ਦੂਰ
- ਦੁੱਧ ਅਤੇ ਬਾਸੀ ਰੋਟੀ ਦਾ ਸੁਮੇਲ ਸਰੀਰ ਨੂੰ ਭਰਪੂਰ ਪ੍ਰੋਟੀਨ ਅਤੇ ਊਰਜਾ ਦਿੰਦਾ ਹੈ। ਇਹ ਮਾਸਪੇਸ਼ੀਆਂ ਨੂੰ ਮਜ਼ਬੂਤ ਬਣਾਉਣ ਅਤੇ ਸਰੀਰਕ ਕਮਜ਼ੋਰੀ ਦੂਰ ਕਰਨ 'ਚ ਮਦਦਗਾਰ ਹੈ।

ਜ਼ਰੂਰੀ ਗੱਲ:-
ਧਿਆਨ ਰੱਖੋ ਕਿ ਰੋਟੀ 12 ਤੋਂ 15 ਘੰਟੇ ਤੋਂ ਜ਼ਿਆਦਾ ਪੁਰਾਣੀ ਨਹੀਂ ਹੋਣੀ ਚਾਹੀਦੀ ਅਤੇ ਉਹ ਸਿਰਫ਼ ਕਣਕ ਦੀ ਹੀ ਹੋਵੇ। ਖ਼ਰਾਬ ਜਾਂ ਉੱਲੀ ਲੱਗੀ ਰੋਟੀ ਦਾ ਸੇਵਨ ਬਿਲਕੁਲ ਨਾ ਕਰੋ।