TVS ਦੀ ਨਵੀਂ ਬਾਈਕ ''ਡਾਕਟਰ ਡੂਮ'' ਐਡੀਸ਼ਨ ਲਾਂਚ, ਜਾਣੋ ਕੀਮਤ ਤੇ ਸ਼ਾਨਦਾਰ ਫੀਚਰਸ

ਨਵੀਂ ਦਿੱਲੀ : ਟੀਵੀਐਸ (TVS) ਮੋਟਰ ਕੰਪਨੀ ਨੇ ਆਪਣੀ ਪ੍ਰਸਿੱਧ ਬਾਈਕ ਰੇਡਰ 125 (TVS Raider 125) ਦੇ 'ਸੁਪਰ ਸਕੁਐਡ ਐਡੀਸ਼ਨ' (Super Squad Edition) ਲਾਈਨਅੱਪ ਦਾ ਵਿਸਥਾਰ ਕਰਦੇ ਹੋਏ ਨਵਾਂ 'ਡਾਕਟਰ ਡੂਮ' (Doctor Doom) ਵੇਰੀਐਂਟ ਲਾਂਚ ਕੀਤਾ ਹੈ। ਮਾਰਵਲ (Marvel) ਦੇ ਪ੍ਰਸਿੱਧ ਕਿਰਦਾਰ ਤੋਂ ਪ੍ਰੇਰਿਤ ਇਹ ਵਿਸ਼ੇਸ਼ ਐਡੀਸ਼ਨ ਬਾਈਕ ਦੀ ਖ਼ੂਬਸੂਰਤੀ ਨੂੰ ਹੋਰ ਵੀ ਵਧਾਉਂਦਾ ਹੈ।

TVS ਰੇਡਰ 125 ਡਾਕਟਰ ਡੂਮ ਐਡੀਸ਼ਨ ਦੀ ਕੀਮਤ 95,320 ਰੁਪਏ (ਐਕਸ-ਸ਼ੋਰੂਮ, ਨਵੀਂ ਦਿੱਲੀ) ਰੱਖੀ ਗਈ ਹੈ। ਇਸ ਨਵੇਂ ਐਡੀਸ਼ਨ ਵਿੱਚ 'ਗ੍ਰੀਨ ਪੇਂਟ ਸਕੀਮ' ਦਿੱਤੀ ਗਈ ਹੈ, ਜੋ ਕਿ ਮਲਟੀ-ਟੋਨ ਇਫੈਕਟ ਦੇ ਨਾਲ ਆਉਂਦੀ ਹੈ। ਇਸ ਦੀ ਖ਼ਾਸੀਅਤ ਇਹ ਹੈ ਕਿ ਰੌਸ਼ਨੀ ਪੈਣ 'ਤੇ ਇਹ ਰੰਗ ਹਰੇ ਤੋਂ ਭੂਰੇ (Green to Brown) ਵਿੱਚ ਬਦਲਦਾ ਦਿਖਾਈ ਦਿੰਦਾ ਹੈ। ਬਾਈਕ ਦੇ ਫਿਊਲ ਟੈਂਕ ਅਤੇ ਸਾਈਡ ਪੈਨਲ 'ਤੇ 'ਡਾਕਟਰ ਡੂਮ' ਤੋਂ ਪ੍ਰੇਰਿਤ ਗ੍ਰਾਫਿਕਸ ਦਾ ਇਸਤੇਮਾਲ ਕੀਤਾ ਗਿਆ ਹੈ।

ਬਾਈਕ ਦੇ ਇੰਜਣ ਅਤੇ ਮਕੈਨੀਕਲ ਪੈਕੇਜ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਗਿਆ ਹੈ। ਇਸ ਵਿੱਚ ਉਹੀ 124.8 ਸੀਸੀ ਦਾ ਏਅਰ ਅਤੇ ਲਿਕਵਿਡ ਕੂਲਡ ਸਿੰਗਲ ਸਿਲੰਡਰ ਇੰਜਣ ਮਿਲਦਾ ਹੈ, ਜੋ 11.4 HP ਦੀ ਪਾਵਰ ਅਤੇ 11.7 Nm ਦਾ ਟਾਰਕ ਪੈਦਾ ਕਰਦਾ ਹੈ। ਇਸ ਦੇ ਨਾਲ ਹੀ ਬਾਈਕ ਵਿੱਚ ਇੱਕ ਕਨੈਕਟਡ ਐਲਸੀਡੀ (LCD) ਡਿਸਪਲੇਅ ਦਿੱਤਾ ਗਿਆ ਹੈ, ਜੋ 85 ਤੋਂ ਵੱਧ ਕਨੈਕਟਡ ਫੰਕਸ਼ਨਾਂ ਅਤੇ 'ਆਈ-ਗੋ ਅਸਿਸਟ' (iGO Assist) ਟੈਕਨਾਲੋਜੀ ਨਾਲ ਲੈਸ ਹੈ।

ਕੰਪਨੀ ਨੇ ਦੱਸਿਆ ਕਿ ਇਹ ਬਾਈਕ ਮਾਰਵਲ ਦੇ ਨਾਲ ਵਿਸ਼ੇਸ਼ ਸਹਿਯੋਗ ਤਹਿਤ ਲਾਂਚ ਕੀਤੀ ਗਈ ਹੈ। ਜ਼ਿਕਰਯੋਗ ਹੈ ਕਿ TVS ਦੀ ਇਸ ਸੁਪਰ ਸਕੁਐਡ ਲਾਈਨਅੱਪ ਵਿੱਚ ਪਹਿਲਾਂ ਹੀ ਆਇਰਨ ਮੈਨ, ਬਲੈਕ ਪੈਂਥਰ, ਡੇਡਪੂਲ ਅਤੇ ਵੁਲਵਰੀਨ ਥੀਮ ਵਾਲੀਆਂ ਬਾਈਕਸ ਸ਼ਾਮਲ ਹਨ। ਹੁਣ ਤੱਕ ਇਸ ਸੁਪਰ ਸਕੁਐਡ ਲਾਈਨਅੱਪ ਦੀ ਵਿਕਰੀ 5 ਲੱਖ ਦੇ ਅੰਕੜੇ ਨੂੰ ਪਾਰ ਕਰ ਚੁੱਕੀ ਹੈ। ਕੰਪਨੀ ਅਨੁਸਾਰ ਆਉਣ ਵਾਲੇ ਦਿਨਾਂ ਵਿੱਚ ਇਹ ਬਾਈਕ ਅਧਿਕਾਰਤ ਡੀਲਰਸ਼ਿਪਾਂ 'ਤੇ ਉਪਲਬਧ ਹੋਵੇਗੀ।