''ਆਹ ਚੱਕੋ 6 ਮਹੀਨਿਆਂ ਦੀ ਤਨਖ਼ਾਹ ਤੇ Macbook ! ਕੱਲ ਤੋਂ ਨਾ ਆਇਓ...'' ਇਸ ਕੰਪਨੀ ਨੇ ਮੁਲਾਜ਼ਮਾਂ ਦੀ ਕੀਤੀ ਛਾਂਟੀ

ਗੈਜੇਟ ਡੈਸਕ : ਗਲੋਬਲ ਡਿਜ਼ਾਈਨਿੰਗ ਪਲੇਟਫਾਰਮ ਕੈਨਵਾ (Canva) ਨੇ ਆਪਣੇ ਅਦਾਰੇ ਵਿੱਚ ਵੱਡੇ ਪੱਧਰ 'ਤੇ ਪੁਨਰਗਠਨ ਕਰਦਿਆਂ ਆਪਣੇ 22 ਫੀਸਦੀ ਮੁਲਾਜ਼ਮਾਂ ਯਾਨੀ 1,271 ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਲਾਂਭੇ ਕਰਨ ਦਾ ਐਲਾਨ ਕੀਤਾ ਹੈ। ਮਾਈਕ੍ਰੋਸਾਫਟ ਸਮੇਤ ਹੋਰ ਵੱਡੀਆਂ ਤਕਨਾਲੋਜੀ ਕੰਪਨੀਆਂ ਦੀ ਤਰਜ਼ 'ਤੇ ਲਏ ਗਏ ਇਸ ਫੈਸਲੇ ਨਾਲ ਵਿਸ਼ਵ ਭਰ ਦੇ 37 ਦੇਸ਼ਾਂ ਵਿੱਚ ਤਾਇਨਾਤ ਅਮਲੇ 'ਤੇ ਅਸਰ ਪਿਆ ਹੈ, ਜਿਨ੍ਹਾਂ ਵਿੱਚ ਭਾਰਤ ਦੇ ਮੁਲਾਜ਼ਮ ਵੀ ਸ਼ਾਮਲ ਹਨ। ਨੌਕਰੀ ਤੋਂ ਹਟਾਏ ਜਾਣ ਦੀ ਇਸ ਅਚਾਨਕ ਕਾਰਵਾਈ ਦੇ ਬਾਵਜੂਦ, ਕੰਪਨੀ ਨੇ ਪ੍ਰਭਾਵਿਤ ਕਰਮਚਾਰੀਆਂ ਲਈ ਇੱਕ ਬਹੁਤ ਹੀ ਉਦਾਰ ਅਤੇ ਵਿਆਪਕ ਸੇਵਰੈਂਸ ਪੈਕੇਜ ਦਾ ਐਲਾਨ ਕੀਤਾ ਹੈ, ਜਿਸ ਦੀ ਸਨਅਤੀ ਖੇਤਰ ਵਿੱਚ ਸ਼ਲਾਘਾ ਕੀਤੀ ਜਾ ਰਹੀ ਹੈ।

ਕੈਨਵਾ ਦੀ ਮੁੱਖ ਕਾਰਜਕਾਰੀ ਅਧਿਕਾਰੀ (CEO) ਮੈਲਾਨੀ ਪਰਕਿੰਸ ਨੇ ਇਸ ਕਦਮ ਨੂੰ ਕੰਪਨੀ ਲਈ ਇੱਕ ਅਤਿਅੰਤ ਔਖਾ ਫੈਸਲਾ ਦੱਸਦਿਆਂ ਪ੍ਰਭਾਵਿਤ ਮੁਲਾਜ਼ਮਾਂ ਤੋਂ ਜਨਤਕ ਤੌਰ 'ਤੇ ਮਾਫੀ ਮੰਗੀ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਮੁਲਾਜ਼ਮਾਂ ਨੂੰ ਲਾਂਭੇ ਕਰਨ ਦਾ ਫੈਸਲਾ ਉਨ੍ਹਾਂ ਦੀ ਯੋਗਤਾ ਜਾਂ ਕੰਮ ਦੀ ਗੁਣਵੱਤਾ 'ਤੇ ਕੋਈ ਸਵਾਲੀਆ ਨਿਸ਼ਾਨ ਨਹੀਂ ਲਗਾਉਂਦਾ, ਸਗੋਂ ਇਹ ਕੰਪਨੀ ਦੀਆਂ ਬਦਲਦੀਆਂ ਕਾਰੋਬਾਰੀ ਲੋੜਾਂ ਅਨੁਸਾਰ ਲਿਆ ਗਿਆ ਸੰਗਠਨਾਤਮਕ ਨਿਰਣਾ ਹੈ।

 ਵਿਆਪਕ ਸੇਵਰੈਂਸ ਪੈਕੇਜ ਅਤੇ ਵਿੱਤੀ ਰਾਹਤ
ਕੈਨਵਾ ਵਿੱਚ ਦੁਨੀਆ ਭਰ ਦੇ 37 ਦੇਸ਼ਾਂ ਵਿੱਚ 5,700 ਤੋਂ ਵੱਧ ਕਰਮਚਾਰੀ ਕੰਮ ਕਰਦੇ ਹਨ। ਪ੍ਰਭਾਵਿਤ ਮੁਲਾਜ਼ਮਾਂ ਨੂੰ ਵਿੱਤੀ ਅਤੇ ਤਕਨੀਕੀ ਤੌਰ 'ਤੇ ਮਜ਼ਬੂਤ ਰੱਖਣ ਲਈ ਕੰਪਨੀ ਨੇ ਹੇਠ ਲਿਖੀਆਂ ਅਹਿਮ ਸੁਵਿਧਾਵਾਂ ਪ੍ਰਦਾਨ ਕੀਤੀਆਂ ਹਨ:
-ਛੇ ਮਹੀਨੇ ਦੀ ਤਨਖਾਹ: ਹਰੇਕ ਪ੍ਰਭਾਵਿਤ ਮੁਲਾਜ਼ਮ ਨੂੰ ਘੱਟੋ-ਘੱਟ 6 ਮਹੀਨੇ ਦੀ ਪੂਰੀ ਤਨਖਾਹ ਦਿੱਤੀ ਜਾਵੇਗੀ, ਜਿਸ ਵਿੱਚ ਸਾਰੇ ਕਾਨੂੰਨੀ ਭੁਗਤਾਨ ਸ਼ਾਮਲ ਹਨ।
-ਹਾਰਡਵੇਅਰ ਰੱਖਣ ਦੀ ਛੋਟ: ਮੁਲਾਜ਼ਮਾਂ ਨੂੰ ਕੰਪਨੀ ਵੱਲੋਂ ਦਿੱਤਾ ਗਿਆ ਮੈਕਬੁੱਕ (MacBook) ਲੈਪਟਾਪ ਆਪਣੇ ਕੋਲ ਹੀ ਰੱਖਣ ਦੀ ਇਜਾਜ਼ਤ ਦਿੱਤੀ ਗਈ ਹੈ।
-ਸਿਹਤ ਅਤੇ ਸਮਾਜਿਕ ਸੁਰੱਖਿਆ: ਕਰਮਚਾਰੀਆਂ ਨੂੰ 12 ਮਹੀਨੇ ਲਈ ਹੈਲਥਕੇਅਰ ਬੀਮਾ ਅਤੇ 1 ਸਾਲ ਲਈ 'Canva Care' ਪ੍ਰੋਗਰਾਮ ਦਾ ਲਾਭ ਮਿਲੇਗਾ।
-ਪੇਸ਼ੇਵਰ ਨੈੱਟਵਰਕਿੰਗ: ਨਵੀਂ ਨੌਕਰੀ ਦੀ ਭਾਲ ਵਿੱਚ ਮਦਦ ਲਈ 1 ਸਾਲ ਦੀ ਮੁਫ਼ਤ ਲਿੰਕਡਇਨ ਪ੍ਰੀਮੀਅਮ (LinkedIn Premium) ਸਬਸਕ੍ਰਿਪਸ਼ਨ ਦਿੱਤੀ ਜਾਵੇਗੀ।
-ਇਕੁਇਟੀ ਵੈਸਟਿੰਗ ਵਿੱਚ ਛੋਟ: ਪਿਛਲੇ ਇੱਕ ਸਾਲ ਦੌਰਾਨ ਕੰਪਨੀ ਨਾਲ ਜੁੜੇ ਮੁਲਾਜ਼ਮਾਂ ਲਈ 1 ਸਾਲ ਦੀ ਇਕੁਇਟੀ ਵੈਸਟਿੰਗ ਸ਼ਰਤ ਨੂੰ ਖਤਮ ਕਰ ਦਿੱਤਾ ਗਿਆ ਹੈ।

ਨਵੇਂ ਕਾਰੋਬਾਰ ਲਈ $10,000 ਦੀ ਗ੍ਰਾਂਟ 
ਕੈਨਵਾ ਨੇ ਨੌਕਰੀ ਤੋਂ ਲਾਂਭੇ ਕੀਤੇ ਗਏ ਕਰਮਚਾਰੀਆਂ ਨੂੰ ਆਪਣਾ ਨਵਾਂ ਕਾਰੋਬਾਰ ਜਾਂ ਕੋਈ ਸਥਾਨਕ ਪ੍ਰੋਜੈਕਟ ਸ਼ੁਰੂ ਕਰਨ ਲਈ 'ਕੈਨਵਾ ਕਲੈਕਟਿਵ ਫੰਡ'ਸ਼ੁਰੂ ਕੀਤਾ ਹੈ। ਯੋਗ ਮੁਲਾਜ਼ਮਾਂ ਨੂੰ ਆਪਣਾ ਸਟਾਰਟਅੱਪ ਜਾਂ ਪ੍ਰੋਜੈਕਟ ਸ਼ੁਰੂ ਕਰਨ ਲਈ 10,000 ਅਮਰੀਕੀ ਡਾਲਰ (ਲਗਭਗ 8.9 ਲੱਖ ਭਾਰਤੀ ਰੁਪਏ) ਤੱਕ ਦੀ ਵਿੱਤੀ ਸਹਾਇਤਾ ਗ੍ਰਾਂਟ ਵਜੋਂ ਦਿੱਤੀ ਜਾਵੇਗੀ। ਇਸ ਗ੍ਰਾਂਟ ਦੀ ਸਭ ਤੋਂ ਵੱਡੀ ਵਿਸ਼ੇਸ਼ਤਾ ਇਹ ਹੈ ਕਿ ਕੈਨਵਾ ਮੁਲਾਜ਼ਮ ਦੇ ਨਵੇਂ ਕਾਰੋਬਾਰ ਵਿੱਚ ਕੋਈ ਹਿੱਸੇਦਾਰੀ ਨਹੀਂ ਲਵੇਗੀ। ਇੱਛੁਕ ਮੁਲਾਜ਼ਮਾਂ ਲਈ ਆਪਣੀ ਕਾਰੋਬਾਰੀ ਯੋਜਨਾ ਜਮ੍ਹਾਂ ਕਰਵਾਉਣ ਦੀ ਆਖਰੀ ਮਿਤੀ 14 ਦਸੰਬਰ ਨਿਸ਼ਚਿਤ ਕੀਤੀ ਗਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e