ਚੰਦਰਮਾ ''ਤੇ ਫੈਕਟਰੀ ਬਣਾਉਣਗੇ ਰੋਬੋਟ, ਐਲੋਨ ਮਸਕ ਨੇ ਸਾਂਝਾ ਕੀਤਾ ਨਵਾਂ ਪਲਾਨ

ਨਵੀਂ ਦਿੱਲੀ : ਦੁਨੀਆ ਦੇ ਮਸ਼ਹੂਰ ਅਰਬਪਤੀ ਅਤੇ ਸਪੇਸਐਕਸ ਦੇ ਮੁਖੀ ਐਲੋਨ ਮਸਕ ਨੇ ਚੰਦਰਮਾ 'ਤੇ ਰੋਬੋਟਾਂ ਦੀ ਮਦਦ ਨਾਲ ਇੱਕ ਫੈਕਟਰੀ ਅਤੇ ਉਦਯੋਗਿਕ ਬੁਨਿਆਦੀ ਢਾਂਚਾ ਤਿਆਰ ਕਰਨ ਦੀ ਯੋਜਨਾ ਦਾ ਐਲਾਨ ਕੀਤਾ ਹੈ। ਇਸ ਫੈਕਟਰੀ ਵਿੱਚ ਕੰਮ ਕਰਨ ਵਾਲੇ ਰੋਬੋਟ ਬਿਨਾਂ ਰਾਕਟਾਂ ਦੀ ਵਰਤੋਂ ਕੀਤੇ ਸਿੱਧੇ ਚੰਦਰਮਾ ਤੋਂ ਹੀ ਸਾਮਾਨ (ਕਾਰਗੋ) ਭੇਜਣ ਦੇ ਸਮਰੱਥ ਹੋਣਗੇ। 

ਐਲੋਨ ਮਸਕ ਨੇ ਸਪੇਸਐਕਸ ਦੀ ਅਰਨਿੰਗ ਕਾਲ ਦੌਰਾਨ ਦੱਸਿਆ ਕਿ ਚੰਦਰਮਾ 'ਤੇ ਉਦਯੋਗਿਕ ਢਾਂਚਾ ਬਣਾਉਣ ਨਾਲ ਸਪੇਸਐਕਸ ਦੀ ਆਰਥਿਕਤਾ ਧਰਤੀ ਦੀ ਮੌਜੂਦਾ ਆਰਥਿਕਤਾ ਨਾਲੋਂ 1,000 ਗੁਣਾ ਤੱਕ ਵੱਡੀ ਹੋ ਸਕਦੀ ਹੈ। ਉਨ੍ਹਾਂ ਮੰਨਿਆ ਕਿ ਇਹ ਵਿਚਾਰ ਅਜੇ ਵਿਗਿਆਨਕ ਕਲਪਨਾ ਵਰਗਾ ਲੱਗਦਾ ਹੈ, ਪਰ ਭਵਿੱਖ ਵਿੱਚ ਇਹ ਸੱਚ ਸਾਬਤ ਹੋਵੇਗਾ।

ਮਸਕ ਮੁਤਾਬਕ, ਚੰਦਰਮਾ 'ਤੇ ਮੌਜੂਦ ਰੋਬੋਟਾਂ ਦੀ ਸਹਾਇਤਾ ਨਾਲ ਇੱਕ 'ਮਾਸ ਐਕਸਲੇਟਰ' ਬਣਾਇਆ ਜਾਵੇਗਾ, ਜਿਸ ਰਾਹੀਂ ਸਪੇਸਐਕਸ ਬਿਨਾਂ ਰਾਕਟ ਦੇ ਚੰਦਰਮਾ ਤੋਂ ਹੀ ਸਾਮਾਨ ਲਾਂਚ ਕਰ ਸਕੇਗੀ। ਇਹ ਫੈਕਟਰੀਆਂ ਮੁੱਖ ਤੌਰ 'ਤੇ ਸੂਰਜੀ ਅਤੇ ਰੇਡੀਏਸ਼ਨ-ਅਧਾਰਿਤ ਊਰਜਾ 'ਤੇ ਕੰਮ ਕਰਨਗੀਆਂ। ਕੰਪਨੀ ਵੱਲੋਂ ਇੱਥੇ ਹਿਊਮਨਾਈਡ ਰੋਬੋਟਾਂ ਦੀ ਵਰਤੋਂ ਕੀਤੇ ਜਾਣ ਦੀ ਯੋਜਨਾ ਹੈ, ਹਾਲਾਂਕਿ ਇਸ ਪ੍ਰੋਜੈਕਟ ਲਈ ਅਜੇ ਤੱਕ ਕੋਈ ਸਮਾਂ-ਸੀਮਾ ਜਾਂ ਨਿਵੇਸ਼ ਰਾਸ਼ੀ ਦਾ ਐਲਾਨ ਨਹੀਂ ਕੀਤਾ ਗਿਆ ਹੈ।

ਟੈਕਸਾਸ ਏ ਐਂਡ ਐਮ ਯੂਨੀਵਰਸਿਟੀ ਦੇ ਕੰਸਟਰਕਸ਼ਨ ਸਾਇੰਸ ਦੇ ਪ੍ਰੋਫੈਸਰ ਪੈਟ੍ਰਿਕ ਸੁਏਰਮੈਨ ਨੇ ਇਸ ਯੋਜਨਾ ਬਾਰੇ ਗੱਲ ਕਰਦਿਆਂ ਕਿਹਾ ਕਿ ਚੰਦਰਮਾ 'ਤੇ ਫੈਕਟਰੀ ਬਣਾਉਣ ਦਾ ਵਿਚਾਰ ਹਾਸੋਹੀਣਾ ਨਹੀਂ ਹੈ। ਚੰਦਰਮਾ ਦੀ ਘੱਟ ਗੁਰੂਤਾ-ਆਕਰਸ਼ਣ ਸ਼ਕਤੀ ਦੇ ਕਾਰਨ ਉੱਥੋਂ ਸੈਟੇਲਾਈਟ ਲਾਂਚ ਕਰਨਾ ਧਰਤੀ ਦੇ ਮੁਕਾਬਲੇ ਕਾਫੀ ਸਸਤਾ ਪਵੇਗਾ, ਕਿਉਂਕਿ ਲਾਂਚਿੰਗ ਵਿੱਚ ਸਭ ਤੋਂ ਵੱਡਾ ਖਰਚਾ ਬਾਲਣ ਦਾ ਹੁੰਦਾ ਹੈ। 

ਮਸਕ ਚੰਦਰਮਾ 'ਤੇ ਫੈਕਟਰੀ ਲਗਾਉਣ ਤੋਂ ਇਲਾਵਾ ਸਪੇਸ ਵਿੱਚ ਏ.ਆਈ. ਡਾਟਾ ਸੈਂਟਰ ਬਣਾਉਣ 'ਤੇ ਵੀ ਕੰਮ ਕਰ ਰਹੇ ਹਨ। ਇਸ ਲਈ ਸਪੇਸਐਕਸ ਨੇ ਦਿੱਗਜ ਤਕਨਾਲੋਜੀ ਕੰਪਨੀ ਐਨਵੀਡੀਆ (Nvidia) ਨਾਲ ਹੱਥ ਮਿਲਾਇਆ ਹੈ। ਦੋਵੇਂ ਕੰਪਨੀਆਂ ਮਿਲ ਕੇ 'ਸਟਾਰਮਾਈਂਡ ਏ.ਆਈ.-1' (Starmind AI-1) ਪ੍ਰੋਜੈਕਟ ਵਿਕਸਿਤ ਕਰ ਰਹੀਆਂ ਹਨ। ਅਗਲੇ ਸਾਲ ਤੋਂ ਇਹ ਸੈਟੇਲਾਈਟ ਲਾਂਚ ਕੀਤੇ ਜਾਣਗੇ, ਜਿਨ੍ਹਾਂ ਵਿੱਚ ਐਨਵੀਡੀਆ ਦੇ ਨਵੇਂ ਰੂਬਿਨ ਜੀ.ਪੀ.ਯੂ. (Rubin GPUs) ਅਤੇ ਵੇਰਾ ਸੀ.ਪੀ.ਯੂ. (Vera CPUs) ਦੀ ਵਰਤੋਂ ਕੀਤੀ ਜਾਵੇਗੀ, ਜੋ ਸੈਟੇਲਾਈਟ ਦੀ ਕੰਪਿਊਟਿੰਗ ਸਮਰੱਥਾ ਨੂੰ 250 kW ਤੱਕ ਲੈ ਜਾਣਗੇ।