ਭਾਰਤ ''ਚ ਮਹਿੰਦਰਾ ਦੀਆਂ SUVs ਦਾ ਦਬਦਬਾ, ਮਈ ਮਹੀਨੇ ''ਚ ਵਿਕਰੀ ਦੇ ਤੋੜੇ ਪੁਰਾਣੇ ਰਿਕਾਰਡ

ਆਟੋ ਡੈਸਕ- ਭਾਰਤੀ ਆਟੋਮੋਬਾਈਲ ਦਿੱਗਜ ਮਹਿੰਦਰਾ ਐਂਡ ਮਹਿੰਦਰਾ ਨੇ ਮਈ 2026 ਵਿੱਚ ਵਿਕਰੀ ਦੇ ਸਾਰੇ ਪੁਰਾਣੇ ਰਿਕਾਰਡ ਤੋੜਦਿਆਂ ਇੱਕ ਨਵੀਂ ਮਿਸਾਲ ਕਾਇਮ ਕੀਤੀ ਹੈ। ਕੰਪਨੀ ਨੇ ਬੀਤੇ ਮਹੀਨੇ ਕੁੱਲ 99,636 ਵਾਹਨ ਵੇਚੇ ਹਨ, ਜਿਸ ਵਿੱਚ ਘਰੇਲੂ ਵਿਕਰੀ ਅਤੇ ਐਕਸਪੋਰਟ ਦੋਵੇਂ ਸ਼ਾਮਲ ਹਨ। ਪਿਛਲੇ ਸਾਲ ਦੇ ਮੁਕਾਬਲੇ ਕੰਪਨੀ ਦੀ ਕੁੱਲ ਵਿਕਰੀ ਵਿੱਚ 20 ਫੀਸਦੀ ਦਾ ਸ਼ਾਨਦਾਰ ਵਾਧਾ ਦਰਜ ਕੀਤਾ ਗਿਆ ਹੈ।

SUV ਸੈਗਮੈਂਟ 'ਚ ਰਿਕਾਰਡ ਤੋੜ ਵਿਕਰੀ

ਮਹਿੰਦਰਾ ਦੀ ਸਫਲਤਾ ਵਿੱਚ ਸਭ ਤੋਂ ਵੱਡਾ ਯੋਗਦਾਨ ਉਸਦੇ SUV ਪੋਰਟਫੋਲੀਓ ਦਾ ਰਿਹਾ ਹੈ। ਕੰਪਨੀ ਨੇ ਭਾਰਤੀ ਬਾਜ਼ਾਰ ਵਿੱਚ ਕੁੱਲ 58,021 SUV ਵੇਚੀਆਂ ਹਨ, ਜੋ ਕਿ ਮਈ 2025 ਵਿੱਚ ਵਿਕੀਆਂ 52,431 ਗੱਡੀਆਂ ਦੇ ਮੁਕਾਬਲੇ 11 ਫੀਸਦੀ ਜ਼ਿਆਦਾ ਹੈ। ਸਕੋਰਪੀਓ, ਥਾਰ, XUV 7XO ਅਤੇ Bolero ਵਰਗੇ ਮਾਡਲਾਂ ਦੀ ਬਾਜ਼ਾਰ ਵਿੱਚ ਭਾਰੀ ਮੰਗ ਦੇਖਣ ਨੂੰ ਮਿਲ ਰਹੀ ਹੈ। ਜੇਕਰ ਐਕਸਪੋਰਟ ਨੂੰ ਵੀ ਸ਼ਾਮਲ ਕਰ ਲਿਆ ਜਾਵੇ, ਤਾਂ SUV ਦੀ ਕੁੱਲ ਵਿਕਰੀ 59,573 ਯੂਨਿਟ ਤੱਕ ਪਹੁੰਚ ਗਈ ਹੈ।

ਇਸ ਵਾਰ ਸਭ ਤੋਂ ਹੈਰਾਨੀਜਨਕ ਪ੍ਰਦਰਸ਼ਨ ਥ੍ਰੀ-ਵ੍ਹੀਲਰ ਸੈਗਮੈਂਟ ਦਾ ਰਿਹਾ, ਜਿੱਥੇ ਕੰਪਨੀ ਨੇ 89 ਫੀਸਦੀ ਦੀ ਭਾਰੀ ਉੱਨਤੀ ਦਰਜ ਕੀਤੀ ਹੈ। ਮਹਿੰਦਰਾ ਨੇ ਇਲੈਕਟ੍ਰਿਕ ਵੇਰੀਐਂਟਸ ਸਮੇਤ ਕੁੱਲ 12,536 ਥ੍ਰੀ-ਵ੍ਹੀਲਰ ਵੇਚੇ ਹਨ। ਇਸ ਤੋਂ ਇਲਾਵਾ, ਕਮਰਸ਼ੀਅਲ ਵਾਹਨਾਂ ਦੀ ਸ਼੍ਰੇਣੀ ਵਿੱਚ ਵੀ ਵਾਧਾ ਦੇਖਿਆ ਗਿਆ:
  
2 ਟਨ ਤੋਂ ਘੱਟ ਵਾਲੇ ਵਾਹਨ: 35% ਦਾ ਵਾਧਾ (3,490 ਯੂਨਿਟ)

2 ਤੋਂ 3.5 ਟਨ ਵਾਲੇ ਵਾਹਨ: 16% ਦਾ ਵਾਧਾ (20,589 ਯੂਨਿਟ)

ਮਹਿੰਦਰਾ ਨੇ ਖੇਤੀਬਾੜੀ ਖੇਤਰ ਵਿੱਚ ਵੀ ਆਪਣਾ ਦਬਦਬਾ ਬਰਕਰਾਰ ਰੱਖਿਆ ਹੈ। ਕੰਪਨੀ ਨੇ ਘਰੇਲੂ ਬਾਜ਼ਾਰ ਵਿੱਚ ਕੁੱਲ 47,845 ਟ੍ਰੈਕਟਰ ਵੇਚੇ ਹਨ, ਜੋ ਪਿਛਲੇ ਸਾਲ ਦੇ ਮੁਕਾਬਲੇ 23 ਫੀਸਦੀ ਦੀ ਸਾਲਾਨਾ ਗਰੋਥ ਦਿਖਾਉਂਦਾ ਹੈ। ਕੁੱਲ ਟ੍ਰੈਕਟਰ ਵਿਕਰੀ 49,695 ਯੂਨਿਟ ਰਹੀ ਹੈ।

ਵਿਦੇਸ਼ੀ ਬਾਜ਼ਾਰਾਂ ਵਿੱਚ ਵੀ ਮਹਿੰਦਰਾ ਦੀਆਂ ਗੱਡੀਆਂ ਦੀ ਮੰਗ ਵਧੀ ਹੈ, ਜਿੱਥੇ ਕੰਪਨੀ ਨੇ 5,000 ਗੱਡੀਆਂ ਐਕਸਪੋਰਟ ਕਰਕੇ 37 ਫੀਸਦੀ ਦਾ ਉਛਾਲ ਦਰਜ ਕੀਤਾ ਹੈ। ਕੰਪਨੀ ਦੇ ਆਟੋਮੋਟਿਵ ਡਿਵੀਜ਼ਨ ਦੇ CEO ਨਲਿਨੀਕਾਂਤ ਗੋਲਾਗੁੰਟਾ ਨੇ ਦੱਸਿਆ ਕਿ ਬਾਜ਼ਾਰ ਵਿੱਚ ਮੰਗ ਬਹੁਤ ਮਜ਼ਬੂਤ ਹੈ, ਹਾਲਾਂਕਿ ਕੁਝ ਸਪਲਾਇਰਾਂ ਕੋਲ ਕਰਮਚਾਰੀਆਂ ਦੀ ਕਮੀ ਕਾਰਨ ਸਪਲਾਈ ਚੇਨ ਵਿੱਚ ਮਾਮੂਲੀ ਦਿੱਕਤਾਂ ਆ ਰਹੀਆਂ ਹਨ। ਇਸ ਦੇ ਬਾਵਜੂਦ, ਕੰਪਨੀ ਨੇ ਨਵੇਂ ਵਿੱਤੀ ਵਰ੍ਹੇ ਦੀ ਸ਼ਾਨਦਾਰ ਸ਼ੁਰੂਆਤ ਕੀਤੀ ਹੈ।