ਸਪੋਰਟੀ ਲੁੱਕ ਤੇ ਦਮਦਾਰ ਫੀਚਰਜ਼ ਨਾਲ ਭਾਰਤ ''ਚ ਲਾਂਚ ਹੋਈ 2026 Kawasaki Ninja 500, ਜਾਣੋ ਕੀਮਤ

ਆਟੋ ਡੈਸਕ- 2026 Kawasaki Ninja 500 ਨੂੰ ਭਾਰਤ 'ਚ ਅਧਿਕਾਰਤ ਤੌਰ 'ਤੇ ਲਾਂਚ ਕਰ ਦਿੱਤਾ ਗਿਆ ਹੈ। ਇਸ ਨਵੇਂ ਮਾਡਲ ਦੀ ਐਕਸ-ਸ਼ੋਰੂਮ ਕੀਮਤ 5.76 ਲੱਖ ਰੁਪਏ ਰੱਖੀ ਗਈ ਹੈ, ਜੋ ਕਿ ਪੁਰਾਣੇ ਮਾਡਲ ਦੇ ਮੁਕਾਬਲੇ 10,000 ਰੁਪਏ ਜ਼ਿਆਦਾ ਹੈ। ਇਸ ਲਾਂਚ ਦੇ ਨਾਲ ਹੀ ਕੰਪਨੀ ਨੇ ਉਨ੍ਹਾਂ ਸਾਰੀਆਂ ਅਟਕਲਾਂ ਨੂੰ ਖਤਮ ਕਰ ਦਿੱਤਾ ਹੈ, ਜਿਨ੍ਹਾਂ 'ਚ ਇਸ ਬਾਈਕ ਦੇ ਭਾਰਤ 'ਚ ਬੰਦ ਹੋਣ ਦੀ ਚਰਚਾ ਸੀ।

ਬਾਈਕ 'ਚ ਇਸ ਵਾਰ ਸਭ ਤੋਂ ਮਹੱਤਵਪੂਰਨ ਬਦਲਾਅ ਇਸ ਦਾ E20-ਕੰਪੈਟੀਬਲ ਇੰਜਣ ਹੈ। ਇਸ ਦਾ ਮਤਲਬ ਹੈ ਕਿ ਇਹ ਮੋਟਰਸਾਈਕਲ ਹੁਣ 20 ਫੀਸਦੀ ਇਥਾਨੋਲ ਮਿਸ਼ਰਤ ਪੈਟਰੋਲ 'ਤੇ ਚੱਲ ਸਕਦਾ ਹੈ, ਜੋ ਕਿ ਨਵੇਂ ਈਂਧਨ ਨਿਯਮਾਂ ਦੇ ਅਨੁਕੂਲ ਹੈ। ਇਸ ਤੋਂ ਇਲਾਵਾ, ਕੰਪਨੀ ਨੇ ਇਸ ਨੂੰ ਆਪਣਾ ਆਈਕੋਨਿਕ 'ਲਾਈਮ ਗ੍ਰੀਨ' ਰੰਗ ਦਿੱਤਾ ਹੈ, ਜੋ ਇਸ ਦੀ ਸਪੋਰਟੀ ਪਛਾਣ ਨੂੰ ਹੋਰ ਨਿਖਾਰਦਾ ਹੈ।

ਬਾਈਕ ਦੇ ਫੀਚਰਜ਼

ਬਾਈਕ 'ਚ 451cc ਦਾ ਲਿਕੁਇਡ-ਕੂਲਡ ਪੈਰਲਲ-ਟਵਿਨ ਇੰਜਣ ਲੱਗਾ ਹੈ, ਜੋ 45 ਹਾਰਸਪਾਵਰ ਅਤੇ 42.6 ਐਨਐਮ ਦਾ ਪੀਕ ਟਾਰਕ ਜਨਰੇਟ ਕਰਦਾ ਹੈ। ਇਸ ਨੂੰ 6-ਸਪੀਡ ਗੀਅਰਬਾਕਸ ਅਤੇ ਅਸਿਸਟ ਐਂਡ ਸਲਿਪਰ ਕਲਚ ਨਾਲ ਜੋੜਿਆ ਗਿਆ ਹੈ। ਬਾਈਕ 'ਚ ਡਿਜੀਟਲ LCD ਇੰਸਟਰੂਮੈਂਟ ਕਲੱਸਟਰ ਹੈ, ਜੋ ਕਾਵਾਸਾਕੀ ਦੇ ਰਾਈਡੋਲੋਜੀ ਐਪ ਰਾਹੀਂ ਸਮਾਰਟਫੋਨ ਕਨੈਕਟੀਵਿਟੀ ਨੂੰ ਸਪੋਰਟ ਕਰਦਾ ਹੈ। ਬਾਈਕ 'ਚ ਐਲਈਡੀ ਲਾਈਟਿੰਗ, ਡਿਊਲ-ਚੈਨਲ ਏਬੀਐਸ ਅਤੇ ਦੋਵਾਂ ਪਹੀਆਂ 'ਤੇ ਡਿਸਕ ਬ੍ਰੇਕ ਦਿੱਤੇ ਗਏ ਹਨ।

ਭਾਰਤੀ ਬਾਜ਼ਾਰ 'ਚ ਇਸ ਦਾ ਸਿੱਧਾ ਮੁਕਾਬਲਾ Aprilia RS 457 ਨਾਲ ਹੋਵੇਗਾ। ਇਸ ਦਾ ਸੰਤੁਲਿਤ ਰਾਈਡਿੰਗ ਅਨੁਭਵ ਇਸ ਨੂੰ ਸ਼ਹਿਰ ਦੇ ਟ੍ਰੈਫਿਕ ਅਤੇ ਹਾਈਵੇਅ ਦੋਵਾਂ ਲਈ ਇੱਕ ਬਿਹਤਰ ਵਿਕਲਪ ਬਣਾਉਂਦਾ ਹੈ।