ਸਾਵਧਾਨ! ਇੰਜਣ ਆਇਲ ਬਦਲਣ ''ਚ ਦੇਰੀ ਪੈ ਸਕਦੀ ਹੈ ਭਾਰੀ; ਜਾਣੋ ਕਦੋਂ ਅਤੇ ਕਿਉਂ ਜ਼ਰੂਰੀ ਹੈ ਤੇਲ ਬਦਲਣਾ

ਗੈਜੇਟ ਡੈਸਕ : ਅਕਸਰ ਕਾਰ ਮਾਲਕ ਆਪਣੀ ਗੱਡੀ ਦੀ ਸਰਵਿਸ ਲਈ ਪੂਰੀ ਤਰ੍ਹਾਂ ਸਰਵਿਸ ਸੈਂਟਰ 'ਤੇ ਨਿਰਭਰ ਹੋ ਜਾਂਦੇ ਹਨ ਤੇ ਉੱਥੇ ਦਿੱਤੀ ਗਈ ਸਲਾਹ ਮੁਤਾਬਕ ਪਾਰਟਸ ਬਦਲਵਾ ਲੈਂਦੇ ਹਨ, ਚਾਹੇ ਉਸਦੀ ਲੋੜ ਹੋਵੇ ਜਾਂ ਨਾ ਪਰ ਇੱਕ ਸਮਾਰਟ ਕਾਰ ਮਾਲਕ ਬਣਨ ਲਈ ਇਹ ਜਾਣਨਾ ਜ਼ਰੂਰੀ ਹੈ ਕਿ ਕਾਰ ਦੇ ਕਿਸ ਹਿੱਸੇ ਨੂੰ ਕਦੋਂ ਤੇ ਕਿੰਨੇ ਕਿਲੋਮੀਟਰ ਬਾਅਦ ਬਦਲਣ ਦੀ ਲੋੜ ਹੁੰਦੀ ਹੈ। ਸਹੀ ਸਮੇਂ 'ਤੇ ਮੇਨਟੇਨੈਂਸ ਕਰਨ ਨਾਲ ਨਾ ਸਿਰਫ਼ ਕਾਰ ਦੀ ਪਰਫਾਰਮੈਂਸ ਬਿਹਤਰ ਹੁੰਦੀ ਹੈ, ਸਗੋਂ ਬੇਵਜ੍ਹਾ ਦੇ ਖਰਚੇ ਤੋਂ ਵੀ ਬਚਿਆ ਜਾ ਸਕਦਾ ਹੈ।

ਇੰਜਣ ਆਇਲ ਹੈ ਕਾਰ ਦੀ ਲਾਈਫ ਲਾਈਨ
ਇੰਜਣ ਆਇਲ ਕਾਰ ਦੇ ਇੰਜਣ ਲਈ ਸਭ ਤੋਂ ਅਹਿਮ ਹੁੰਦਾ ਹੈ। ਜੇਕਰ ਤੁਸੀਂ ਆਪਣੀ ਕਾਰ ਵਿੱਚ ਮਿਨਰਲ ਆਇਲ (Mineral Oil) ਦੀ ਵਰਤੋਂ ਕਰਦੇ ਹੋ, ਤਾਂ ਇਸਨੂੰ ਹਰ 5,000 ਤੋਂ 10,000 ਕਿਲੋਮੀਟਰ ਜਾਂ ਲਗਭਗ 6 ਮਹੀਨਿਆਂ ਵਿੱਚ ਬਦਲ ਦੇਣਾ ਚਾਹੀਦਾ ਹੈ। ਦੂਜੇ ਪਾਸੇ ਸਿੰਥੈਟਿਕ ਆਇਲ (Synthetic Oil) ਜ਼ਿਆਦਾ ਟਿਕਾਊ ਹੁੰਦਾ ਹੈ, ਜਿਸਨੂੰ ਤੁਸੀਂ 10,000 ਕਿਲੋਮੀਟਰ ਜਾਂ ਇੱਕ ਸਾਲ ਤੱਕ ਚਲਾ ਸਕਦੇ ਹੋ। ਤੇਲ ਬਦਲਦੇ ਸਮੇਂ ਹਮੇਸ਼ਾ ਪੁਰਾਣਾ ਤੇਲ ਪੂਰੀ ਤਰ੍ਹਾਂ ਕੱਢਣਾ ਯਕੀਨੀ ਬਣਾਓ।

ਏਅਰ ਫਿਲਟਰ ਤੇ ਟਾਇਰ ਰੋਟੇਸ਼ਨ
 ਏਅਰ ਫਿਲਟਰ ਇੰਜਣ ਤੱਕ ਸਾਫ਼ ਹਵਾ ਪਹੁੰਚਾਉਣ ਦਾ ਕੰਮ ਕਰਦਾ ਹੈ। ਜੇਕਰ ਤੁਸੀਂ ਧੂੜ ਤੇ ਪ੍ਰਦੂਸ਼ਣ ਵਾਲੇ ਇਲਾਕਿਆਂ ਵਿੱਚ ਗੱਡੀ ਚਲਾਉਂਦੇ ਹੋ, ਤਾਂ ਇਸਨੂੰ ਹਰ 6 ਮਹੀਨਿਆਂ 'ਚ ਬਦਲਣਾ ਸਹੀ ਰਹਿੰਦਾ ਹੈ, ਨਹੀਂ ਤਾਂ ਸਾਲ 'ਚ ਇੱਕ ਵਾਰ ਬਦਲਣਾ ਵੀ ਕਾਫ਼ੀ ਹੈ। ਇਸ ਦੇ ਨਾਲ ਹੀ ਟਾਇਰਾਂ ਦੀ ਲੰਬੀ ਉਮਰ ਲਈ ਹਰ 8,000 ਤੋਂ 10,000 ਕਿਲੋਮੀਟਰ 'ਤੇ ਟਾਇਰ ਰੋਟੇਸ਼ਨ ਕਰਵਾਉਣਾ ਜ਼ਰੂਰੀ ਹੈ ਤਾਂ ਜੋ ਚਾਰੇ ਟਾਇਰ ਬਰਾਬਰ ਘਿਸਣ ਅਤੇ ਡਰਾਈਵਿੰਗ ਸੰਤੁਲਿਤ ਰਹੇ।

ਗੇਅਰ ਆਇਲ ਤੇ ਬ੍ਰੇਕ ਪੈਡਸ 
ਗੇਅਰ ਆਇਲ ਨੂੰ ਜਲਦੀ ਬਦਲਣ ਦੀ ਲੋੜ ਨਹੀਂ ਹੁੰਦੀ। ਆਮ ਤੌਰ 'ਤੇ ਇਸਨੂੰ 50,000 ਤੋਂ 60,000 ਕਿਲੋਮੀਟਰ ਜਾਂ 4-5 ਸਾਲਾਂ ਬਾਅਦ ਬਦਲਣਾ ਠੀਕ ਰਹਿੰਦਾ ਹੈ। ਸ਼ਹਿਰਾਂ 'ਚ ਜ਼ਿਆਦਾ ਡਰਾਈਵਿੰਗ ਕਰਨ ਕਾਰਨ ਬ੍ਰੇਕ ਪੈਡਸ ਜਲਦੀ ਘਿਸ ਸਕਦੇ ਹਨ, ਇਸ ਲਈ ਇਨ੍ਹਾਂ ਨੂੰ 10,000 ਤੋਂ 20,000 ਕਿਲੋਮੀਟਰ ਦੇ ਵਿਚਕਾਰ ਜ਼ਰੂਰ ਚੈੱਕ ਕਰਵਾਓ।

ਹੋਰ ਅਹਿਮ ਗੱਲਾਂ 
ਕਾਰ ਦੇ ਕੂਲੈਂਟ ਤੇ ਸਪਾਰਕ ਪਲੱਗ ਵਰਗੇ ਹਿੱਸਿਆਂ ਨੂੰ ਲਗਭਗ 30,000 ਤੋਂ 40,000 ਕਿਲੋਮੀਟਰ ਤੋਂ ਬਾਅਦ ਬਦਲਣਾ ਉਚਿਤ ਹੁੰਦਾ ਹੈ। ਮਾਹਿਰਾਂ ਅਨੁਸਾਰ ਸਭ ਤੋਂ ਜ਼ਰੂਰੀ ਹੈ ਕਿ ਆਪਣੀ ਕਾਰ ਦੀ ਕੰਡੀਸ਼ਨ 'ਤੇ ਧਿਆਨ ਦਿਓ ਅਤੇ ਹਮੇਸ਼ਾ ਕਾਰ ਦੇ ਮੈਨੂਅਲ ਅਨੁਸਾਰ ਹੀ ਮੇਨਟੇਨੈਂਸ ਕਰਵਾਓ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e