Apple ਦੀ ਵੱਡੀ ਕਾਰਵਾਈ, ਐਪ ਸਟੋਰ ਤੋਂ ਹਟਾਏ 1,35,000 ਐਪਸ

ਗੈਜੇਟ ਡੈਸਕ- ਐਪਲ ਨੇ ਯੂਰਪੀਅਨ ਯੂਨੀਅਨ 'ਚ ਆਪਣੇ ਐਪ ਸਟੋਰ ਤੋਂ 1,35,000 ਤੋਂ ਵੱਧ ਐਪਸ ਨੂੰ ਹਟਾ ਦਿੱਤਾ ਹੈ। ਇਹ ਐਪਸ ਉਨ੍ਹਾਂ ਡਿਵੈਲਪਰਾਂ ਵੱਲੋਂ ਬਣਾਏ ਗਏ ਸਨ ਜਿਨ੍ਹਾਂ ਨੇ ਆਪਣੇ ਕਾਨਟੈਕਟ ਡਿਟੇਲਸ, ਜਿਵੇਂ ਕਿ ਪਤਾ, ਫ਼ੋਨ ਨੰਬਰ ਅਤੇ ਈਮੇਲ, ਖਪਤਕਾਰਾਂ ਨਾਲ ਸਾਂਝੇ ਨਹੀਂ ਕੀਤੇ ਸਨ। ਇਹ ਜਾਣਕਾਰੀ EU ਡਿਜੀਟਲ ਸੇਵਾਵਾਂ ਐਕਟ (DSA) ਦੇ ਤਹਿਤ ਲੋੜੀਂਦੀ ਸੀ। ਡਿਵੈਲਪਰਾਂ ਵੱਲੋਂ 17 ਫਰਵਰੀ ਨੂੰ ਅਪਡੇਟ ਨਾ ਕਰਨ ਕਾਰਨ ਇਹਨਾਂ ਨੂੰ ਸਟੋਰ ਤੋਂ ਹਟਾ ਦਿੱਤਾ ਗਿਆ ਸੀ।

ਇਹ ਕਦਮ ਐਪਲ ਦੀ ਹੁਣ ਤਕ ਦੀ ਸਭ ਤੋਂ ਵੱਡੀ ਕਾਰਵਾਈ ਹੈ, ਜਿਸ ਤਹਿਤ ਉਨ੍ਹਾਂ ਐਪਸ ਨੂੰ ਹਟਾ ਦਿੱਤਾ ਗਿਆ ਹੈ ਜਿਨ੍ਹਾਂ ਦੇ ਡਿਵੈਲਪਰ ਆਪਣੇ ਵਪਾਰ ਦੀ ਜਾਣਕਾਰੀ ਐਪਲ ਨੂੰ ਪ੍ਰਦਾਨ ਕਰਨ 'ਚ ਫੇਲ੍ਹ ਰਹੇ ਸਨ। ਇਸ ਨਵੇਂ ਨਿਯਮ ਮੁਤਾਬਕ, ਡਿਵੈਲਪਰਾਂ ਨੂੰ ਆਪਣੇ 'ਵਪਾਰ ਸਥਿਤੀ' ਨੂੰ ਪ੍ਰਮਾਣਿਤ ਕਰਨਾ ਜ਼ਰੂਰੀ ਹੈ, ਜੋ ਹੁਣ ਐਪ ਸਟੋਰ 'ਤੇ ਐਪ ਲਈ ਜ਼ਰੂਰੀ ਹੋ ਗਿਆ ਹੈ। 

ਐਪਲ ਨੇ ਸਮਝਾਇਆ ਕਿ ਜੇਕਰ ਐਪਸ ਦੀ "ਵਪਾਰ ਸਥਿਤੀ" ਦੀ ਪੁਸ਼ਟੀ ਨਹੀਂ ਕੀਤੀ ਜਾ ਸਕਦੀ ਤਾਂ ਉਹਨਾਂ ਨੂੰ EU ਦੇ ਐਪ ਸਟੋਰ ਤੋਂ ਹਟਾ ਦਿੱਤਾ ਜਾਵੇਗਾ। DSA ਦੇ ਤਹਿਤ ਵਪਾਰੀਆਂ ਨੂੰ ਆਪਣੇ ਕਾਰੋਬਾਰਾਂ ਲਈ ਸੰਪਰਕ ਵੇਰਵੇ ਪ੍ਰਦਾਨ ਕਰਨੇ ਚਾਹੀਦੇ ਹਨ, ਭਾਵੇਂ ਉਹ EU ਵਿੱਚ ਆਪਣੇ ਐਪਸ ਵੰਡਦੇ ਹਨ ਜਾਂ ਨਹੀਂ। ਜੇਕਰ ਵਪਾਰੀ ਇਹ ਜਾਣਕਾਰੀ ਪ੍ਰਦਾਨ ਕਰਨ ਵਿੱਚ ਅਸਫਲ ਰਹਿੰਦੇ ਹਨ, ਤਾਂ ਉਨ੍ਹਾਂ ਦੀ ਐਪ EU ਵਿੱਚ ਉਪਲੱਬਧ ਨਹੀਂ ਹੋਵੇਗੀ।