ਰਾਮ ਚਰਨ ਨੇ ਫ਼ਿਲਮ ''ਪੈਡੀ'' ਨੂੰ ਲੈ ਕੇ ਦਿੱਤਾ ਵੱਡਾ ਅਪਡੇਟ, ਜਾਣੋ ਕਦੋਂ ਪੂਰੀ ਹੋਵੇਗੀ ਸ਼ੂਟਿੰਗ !
Friday, Apr 03, 2026 - 04:40 PM (IST)
ਹੈਦਰਾਬਾਦ (ਏਜੰਸੀ) : ਸਾਊਥ ਸਿਨੇਮਾ ਦੇ ਸੁਪਰਸਟਾਰ ਰਾਮ ਚਰਨ ਦੇ ਪ੍ਰਸ਼ੰਸਕਾਂ ਲਈ ਇੱਕ ਬਹੁਤ ਹੀ ਖ਼ੁਸ਼ੀ ਦੀ ਖ਼ਬਰ ਸਾਹਮਣੇ ਆਈ ਹੈ। ਨਿਰਦੇਸ਼ਕ ਬੁਚੀ ਬਾਬੂ ਸਨਾ ਦੀ ਬਹੁ-ਚਰਚਿਤ ਪੇਂਡੂ ਐਕਸ਼ਨ ਡਰਾਮਾ ਫ਼ਿਲਮ 'ਪੈਡੀ' (Peddi) ਦੀ ਸ਼ੂਟਿੰਗ ਨੂੰ ਲੈ ਕੇ ਅਦਾਕਾਰ ਨੇ ਖ਼ੁਦ ਇੱਕ ਵੱਡਾ ਖੁਲਾਸਾ ਕੀਤਾ ਹੈ। ਰਾਮ ਚਰਨ ਨੇ ਦੱਸਿਆ ਹੈ ਕਿ ਫ਼ਿਲਮ ਦਾ 'ਟਾਕੀ ਪੋਰਸ਼ਨ' (ਗੱਲਬਾਤ ਵਾਲਾ ਹਿੱਸਾ) ਪੂਰੀ ਤਰ੍ਹਾਂ ਮੁਕੰਮਲ ਹੋ ਚੁੱਕਾ ਹੈ।
ਸਿਰਫ਼ ਇੱਕ ਗੀਤ ਦੀ ਸ਼ੂਟਿੰਗ ਬਾਕੀ
ਰਾਮ ਚਰਨ ਨੇ ਇਹ ਜਾਣਕਾਰੀ 'ਰਕਾਸਾ' (Rakasa) ਦੀ ਟੀਮ ਨਾਲ ਗੱਲਬਾਤ ਦੌਰਾਨ ਸਾਂਝੀ ਕੀਤੀ, ਜੋ ਕਿ 'ਪੈਡੀ' ਦੇ ਸੈੱਟ 'ਤੇ ਉਨ੍ਹਾਂ ਨੂੰ ਮਿਲਣ ਆਈ ਸੀ। ਉਨ੍ਹਾਂ ਦੱਸਿਆ ਕਿ ਫ਼ਿਲਮ ਦੀ ਜ਼ਿਆਦਾਤਰ ਸ਼ੂਟਿੰਗ ਪੂਰੀ ਹੋ ਗਈ ਹੈ ਅਤੇ ਹੁਣ ਸਿਰਫ਼ ਇੱਕ ਗੀਤ ਫ਼ਿਲਮਾਉਣਾ ਬਾਕੀ ਹੈ। ਇਸ ਖ਼ਬਰ ਤੋਂ ਬਾਅਦ ਉਮੀਦ ਜਤਾਈ ਜਾ ਰਹੀ ਹੈ ਕਿ ਫ਼ਿਲਮ ਜਲਦੀ ਹੀ ਪੋਸਟ-ਪ੍ਰੋਡਕਸ਼ਨ ਪੜਾਅ ਵਿੱਚ ਦਾਖਲ ਹੋਵੇਗੀ।
ਹਾਲ ਹੀ ਵਿੱਚ ਰਾਮ ਚਰਨ ਦੇ ਜਨਮਦਿਨ ਮੌਕੇ ਇੱਕ ਵੀਡੀਓ ਸਾਂਝੀ ਕੀਤੀ ਸੀ। ਵੀਡੀਓ ਵਿੱਚ ਰਾਮ ਚਰਨ ਇੱਕ ਖ਼ਤਰਨਾਕ ਪਹਿਲਵਾਨ ਦੇ ਰੂਪ ਵਿੱਚ ਨਜ਼ਰ ਆ ਰਹੇ ਹਨ। ਵੀਡੀਓ ਵਿੱਚ ਕੁਸ਼ਤੀ ਨੂੰ ਲੈ ਕੇ ਇੱਕ ਦਮਦਾਰ ਵਾਇਸਓਵਰ ਹੈ — "ਕੁਸ਼ਤੀ ਕੋਈ ਬੈਟ ਫੜ ਕੇ ਗੇਂਦ ਖੇਡਣ ਵਾਲੀ ਖੇਡ ਨਹੀਂ ਹੈ, ਇਹ ਉਹ ਖੇਡ ਹੈ ਜਿੱਥੇ ਤੁਸੀਂ ਆਪਣੀ ਜ਼ਿੰਦਗੀ ਦਾ ਦਾਅ ਲਗਾ ਕੇ ਮੌਤ ਦੇ ਸਾਹਮਣੇ ਖੜ੍ਹੇ ਹੁੰਦੇ ਹੋ।" ਰਾਮ ਚਰਨ ਨੇ ਇਸ ਰੋਲ ਲਈ ਆਪਣੀ ਸਰੀਰਕ ਦਿੱਖ 'ਤੇ ਬਹੁਤ ਮਿਹਨਤ ਕੀਤੀ ਹੈ ਅਤੇ ਉਹ (ਮੁਗਦਰ) ਗਦਾ ਨਾਲ ਅਭਿਆਸ ਕਰਦੇ ਹੋਏ ਦਿਖਾਈ ਦੇ ਰਹੇ ਹਨ।
ਜਾਨ੍ਹਵੀ ਕਪੂਰ ਤੇ ਹੋਰ ਦਿੱਗਜ ਕਲਾਕਾਰ
ਇਸ ਫ਼ਿਲਮ ਵਿੱਚ ਜਾਨ੍ਹਵੀ ਕਪੂਰ ਮੁੱਖ ਅਦਾਕਾਰਾ ਵਜੋਂ ਨਜ਼ਰ ਆਵੇਗੀ। ਇਸ ਤੋਂ ਇਲਾਵਾ ਫ਼ਿਲਮ ਵਿੱਚ ਸ਼ਿਵ ਰਾਜਕੁਮਾਰ, ਜਗਪਤੀ ਬਾਬੂ, ਦਿਵਯੇਂਦੂ ਅਤੇ ਬੋਮਨ ਇਰਾਨੀ ਵਰਗੇ ਵੱਡੇ ਕਲਾਕਾਰ ਅਹਿਮ ਭੂਮਿਕਾਵਾਂ ਨਿਭਾ ਰਹੇ ਹਨ। ਦੱਸਣਯੋਗ ਹੈ ਕਿ ਕੁਝ ਸਮਾਂ ਪਹਿਲਾਂ ਭਾਰਤੀ ਕ੍ਰਿਕਟਰ ਤਿਲਕ ਵਰਮਾ ਨੇ ਵੀ ਫ਼ਿਲਮ ਦੇ ਸੈੱਟ 'ਤੇ ਰਾਮ ਚਰਨ ਨਾਲ ਮੁਲਾਕਾਤ ਕੀਤੀ ਸੀ, ਜਿਸ ਦੀਆਂ ਤਸਵੀਰਾਂ ਕਾਫੀ ਵਾਇਰਲ ਹੋਈਆਂ ਸਨ। ਹੁਣ ਪ੍ਰਸ਼ੰਸਕ ਬੇਸਬਰੀ ਨਾਲ ਇਸ ਫ਼ਿਲਮ ਦੇ ਟ੍ਰੇਲਰ ਅਤੇ ਰਿਲੀਜ਼ ਡੇਟ ਦੀ ਉਡੀਕ ਕਰ ਰਹੇ ਹਨ।
