ਸ਼ਰਧਾ ਦੇ ਰੰਗ ''ਚ ਰੰਗੀ ਨਯਨਤਾਰਾ: ਪਤੀ ਨਾਲ ਤਿਰੂਮਾਲਾ ਮੰਦਰ ''ਚ ਟੇਕਿਆ ਮੱਥਾ, ਤਸਵੀਰਾਂ ਵਾਇਰਲ

ਤਿਰੂਪਤੀ (ਏਜੰਸੀ) : ਸਾਊਥ ਫਿਲਮ ਇੰਡਸਟਰੀ ਦੀ ਸੁਪਰਸਟਾਰ ਅਤੇ 'ਲੇਡੀ ਸੁਪਰਸਟਾਰ' ਵਜੋਂ ਜਾਣੀ ਜਾਂਦੀ ਅਦਾਕਾਰਾ ਨਯਨਤਾਰਾ ਵੀਰਵਾਰ ਨੂੰ ਆਪਣੇ ਪਤੀ ਅਤੇ ਫਿਲਮ ਨਿਰਮਾਤਾ ਵਿਗਨੇਸ਼ ਸ਼ਿਵਾਨ ਨਾਲ ਆਂਧਰਾ ਪ੍ਰਦੇਸ਼ ਦੇ ਪ੍ਰਸਿੱਧ ਤਿਰੂਮਾਲਾ ਵੇਂਕਟੇਸ਼ਵਰ ਮੰਦਰ ਪਹੁੰਚੀ। ਇਸ ਦੌਰਾਨ ਜੋੜੇ ਨੇ ਭਗਵਾਨ ਵੇਂਕਟੇਸ਼ਵਰ ਦੇ ਦਰਸ਼ਨ ਕੀਤੇ ਅਤੇ ਆਸ਼ੀਰਵਾਦ ਲਿਆ।

ਸਾਦਗੀ ਭਰੇ ਅੰਦਾਜ਼ ਨੇ ਜਿੱਤਿਆ ਪ੍ਰਸ਼ੰਸਕਾਂ ਦਾ ਦਿਲ

ਮੰਦਰ ਦਰਸ਼ਨਾਂ ਦੌਰਾਨ ਨਯਨਤਾਰਾ ਬੇਹੱਦ ਸਾਦੇ ਅਤੇ ਰਵਾਇਤੀ ਪਹਿਰਾਵੇ ਵਿੱਚ ਨਜ਼ਰ ਆਈ। ਉਸਨੇ ਚਿੱਟੇ ਰੰਗ ਦਾ ਸੂਟ ਪਹਿਨਿਆ ਸੀ, ਜਿਸ ਨਾਲ ਗੂੜ੍ਹੇ ਹਰੇ ਰੰਗ ਦਾ ਦੁਪੱਟਾ ਲਿਆ ਹੋਇਆ ਸੀ। ਸਧਾਰਨ ਬਿੰਦੀ ਅਤੇ ਸਿਲਵਰ ਝੁਮਕਿਆਂ ਵਿੱਚ ਨਯਨਤਾਰਾ ਦੀ ਸਾਦਗੀ ਦੀ ਕਾਫੀ ਚਰਚਾ ਹੋ ਰਹੀ ਹੈ। ਦੂਜੇ ਪਾਸੇ ਵਿਗਨੇਸ਼ ਸ਼ਿਵਾਨ ਨੇ ਸੰਤਰੀ ਰੰਗ ਦਾ ਕੁੜਤਾ-ਪਜਾਮਾ ਪਹਿਨਿਆ ਹੋਇਆ ਸੀ। ਮੰਦਰ ਦੇ ਬਾਹਰ ਦੋਵਾਂ ਨੇ ਆਪਣੇ ਪ੍ਰਸ਼ੰਸਕਾਂ ਨਾਲ ਮੁਲਾਕਾਤ ਕੀਤੀ ਅਤੇ ਫੋਟੋਆਂ ਵੀ ਖਿਚਵਾਈਆਂ।

ਸਲਮਾਨ ਖਾਨ ਨਾਲ ਨਜ਼ਰ ਆਵੇਗੀ ਨਯਨਤਾਰਾ

ਨਯਨਤਾਰਾ ਲਈ ਇਹ ਸਮਾਂ ਪੇਸ਼ੇਵਰ ਤੌਰ 'ਤੇ ਵੀ ਬਹੁਤ ਖਾਸ ਹੈ। ਸ਼ਾਹਰੁਖ ਖਾਨ ਦੀ ਫਿਲਮ 'ਜਵਾਨ' (2023) ਨਾਲ ਬਾਲੀਵੁੱਡ ਵਿੱਚ ਧਮਾਕੇਦਾਰ ਐਂਟਰੀ ਕਰਨ ਤੋਂ ਬਾਅਦ, ਹੁਣ ਉਹ ਆਪਣੀ ਦੂਜੀ ਹਿੰਦੀ ਫਿਲਮ ਲਈ ਤਿਆਰ ਹੈ। ਹਾਲ ਹੀ ਵਿੱਚ ਅਧਿਕਾਰਤ ਤੌਰ 'ਤੇ ਐਲਾਨ ਕੀਤਾ ਗਿਆ ਹੈ ਕਿ ਨਯਨਤਾਰਾ ਬਾਲੀਵੁੱਡ ਦੇ 'ਭਾਈਜਾਨ' ਸਲਮਾਨ ਖਾਨ ਦੀ ਅਗਲੀ ਐਕਸ਼ਨ ਫਿਲਮ ਦਾ ਹਿੱਸਾ ਬਣੇਗੀ। ਇਸ ਫਿਲਮ ਦਾ ਨਿਰਦੇਸ਼ਨ ਵਾਮਸ਼ੀ ਪੈਡੀਪੱਲੀ ਕਰਨਗੇ ਅਤੇ ਇਸਦੇ ਨਿਰਮਾਤਾ ਦਿਲ ਰਾਜੂ (ਸ੍ਰੀ ਵੇਂਕਟੇਸ਼ਵਰ ਕ੍ਰਿਏਸ਼ਨਜ਼) ਹਨ। ਫਿਲਮ ਦੀ ਸ਼ੂਟਿੰਗ ਅਗਲੇ ਮਹੀਨੇ ਤੋਂ ਸ਼ੁਰੂ ਹੋਣ ਦੀ ਉਮੀਦ ਹੈ।