ਕਰਨ ਜੌਹਰ ਨੇ ਛੱਡ'ਤੀ ਰੋਟੀ ! ਇਸ ਚੀਜ਼ ਨਾਲ ਘਟਾਇਆ ਭਾਰ, Weight Loss ਦੇ ਸਫ਼ਰ ਬਾਰੇ ਕੀਤੇ ਵੱਡੇ ਖੁਲਾਸੇ

ਮੁੰਬਈ- ਬਾਲੀਵੁੱਡ ਦੇ ਮਸ਼ਹੂਰ ਨਿਰਦੇਸ਼ਕ ਕਰਨ ਜੌਹਰ ਅਕਸਰ ਆਪਣੀਆਂ ਫਿਲਮਾਂ ਜਾਂ ਨਿੱਜੀ ਜ਼ਿੰਦਗੀ ਕਾਰਨ ਸੁਰਖੀਆਂ ਵਿੱਚ ਰਹਿੰਦੇ ਹਨ, ਪਰ ਇਸ ਵਾਰ ਉਨ੍ਹਾਂ ਦੇ ਚਰਚਾ ਵਿੱਚ ਆਉਣ ਦਾ ਕਾਰਨ ਉਨ੍ਹਾਂ ਦੀ ਫਿਟਨੈੱਸ ਹੈ। ਲੰਬੇ ਸਮੇਂ ਤੋਂ ਕਰਨ ਜੌਹਰ ਦੇ ਵਜ਼ਨ ਘਟਾਉਣ ਨੂੰ ਲੈ ਕੇ ਕਈ ਤਰ੍ਹਾਂ ਦੀਆਂ ਅਫਵਾਹਾਂ ਉੱਡ ਰਹੀਆਂ ਸਨ, ਜਿਸ 'ਤੇ ਹੁਣ ਉਨ੍ਹਾਂ ਨੇ ਖੁਦ ਚੁੱਪੀ ਤੋੜੀ ਹੈ।
ਨਾ ਓਜੈਂਪਿਕ, ਨਾ ਕੋਈ ਜਾਦੂਈ ਦਵਾਈ
‘ਦਿ ਮਾਨਿਅਵਰ ਸ਼ਾਦੀ ਸ਼ੋਅ’ ਵਿੱਚ ਗੱਲਬਾਤ ਕਰਦਿਆਂ ਕਰਨ ਨੇ ਸਾਫ਼ ਕੀਤਾ ਕਿ ਉਨ੍ਹਾਂ ਨੇ ਵਜ਼ਨ ਘਟਾਉਣ ਲਈ ਓਜੈਂਪਿਕ (Ozempic) ਵਰਗੀ ਕਿਸੇ ਵੀ ਦਵਾਈ ਜਾਂ ਸ਼ਾਰਟਕੱਟ ਦਾ ਸਹਾਰਾ ਨਹੀਂ ਲਿਆ। ਉਨ੍ਹਾਂ ਦੱਸਿਆ ਕਿ ਇਹ ਸਭ ਸਹੀ ਜੀਵਨ ਸ਼ੈਲੀ, ਸਮਾਰਟ ਡਾਈਟ ਅਤੇ ਡਾਕਟਰੀ ਸਲਾਹ ਨਾਲ ਸੰਭਵ ਹੋਇਆ ਹੈ।
ਆਲੂ ਤੇ ਚੌਲ ਬਣੇ 'ਦੋਸਤ', ਰੋਟੀ ਤੋਂ ਬਣਾਈ ਦੂਰੀ
ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਰਹੀ ਕਿ ਕਰਨ ਦੇ ਇਸ ਸਫ਼ਰ ਵਿੱਚ ਆਲੂ ਅਤੇ ਚੌਲ ਉਨ੍ਹਾਂ ਦੇ ਸਭ ਤੋਂ ਵੱਡੇ ਮਦਦਗਾਰ ਸਾਬਤ ਹੋਏ। ਆਮ ਤੌਰ 'ਤੇ ਲੋਕ ਵਜ਼ਨ ਘਟਾਉਣ ਲਈ ਇਨ੍ਹਾਂ ਚੀਜ਼ਾਂ ਨੂੰ ਛੱਡ ਦਿੰਦੇ ਹਨ, ਪਰ ਕਰਨ ਦੇ ਮਾਮਲੇ ਵਿੱਚ ਉਲਟ ਹੋਇਆ। ਉਨ੍ਹਾਂ ਦੱਸਿਆ ਕਿ ਟੈਸਟਾਂ ਤੋਂ ਬਾਅਦ ਉਨ੍ਹਾਂ ਨੂੰ ਪਤਾ ਲੱਗਿਆ ਕਿ ਉਹ ਗਲੂਟਨ (Gluten) ਅਤੇ ਲੈਕਟੋਜ਼ (Lactose) ਇੰਟੌਲਰੈਂਟ ਹਨ। ਕਰਨ ਨੇ ਕਿਹਾ, "ਮੈਂ ਹੁਣ ਤੱਕ ਵਜ਼ਨ ਘਟਾਉਣ ਲਈ ਰੋਟੀ ਖਾ ਰਿਹਾ ਸੀ ਅਤੇ ਚੌਲਾਂ ਤੋਂ ਦੂਰੀ ਬਣਾਈ ਹੋਈ ਸੀ, ਪਰ ਸੱਚ ਤਾਂ ਇਹ ਹੈ ਕਿ ਚੌਲ ਅਤੇ ਆਲੂ ਮੇਰੇ ਦੋਸਤ ਨਿਕਲੇ"।
ਜਦੋਂ ਡਾਈਟਿੰਗ ਕਾਰਨ ਕਲਾਸ ਵਿੱਚ ਹੋ ਗਏ ਸੀ ਬੇਹੋਸ਼
ਆਪਣੇ ਪੁਰਾਣੇ ਦਿਨਾਂ ਨੂੰ ਯਾਦ ਕਰਦਿਆਂ ਕਰਨ ਨੇ ਦੱਸਿਆ ਕਿ ਕਾਲਜ ਦੇ ਦਿਨਾਂ ਵਿੱਚ ਪਤਲੇ ਹੋਣ ਦੇ ਚੱਕਰ ਵਿੱਚ ਉਨ੍ਹਾਂ ਨੇ ਕਈ ਸਖ਼ਤ ਡਾਈਟਸ ਅਪਣਾਈਆਂ ਸਨ। ਇੱਕ ਵਾਰ 'ਐਟਕਿਨਜ਼ ਡਾਈਟ' (ਹਾਈ ਪ੍ਰੋਟੀਨ ਡਾਈਟ) ਕਰਦੇ ਹੋਏ ਉਹ ਇੰਨੇ ਬਿਮਾਰ ਹੋ ਗਏ ਸਨ ਕਿ ਅਕਾਊਂਟਸ ਦੀ ਕਲਾਸ ਵਿੱਚ ਹੀ ਬੇਹੋਸ਼ ਹੋ ਗਏ ਸਨ। ਇਸ ਤੋਂ ਬਾਅਦ ਉਨ੍ਹਾਂ ਦੀ ਮਾਂ ਨੇ ਅਜਿਹੀਆਂ ਡਾਈਟਸ 'ਤੇ ਪਾਬੰਦੀ ਲਗਾ ਦਿੱਤੀ ਸੀ। ਉਨ੍ਹਾਂ ਇਹ ਵੀ ਦੱਸਿਆ ਕਿ ਉਨ੍ਹਾਂ ਦੇ ਪਿਤਾ ਨੂੰ ਲੱਗਦਾ ਸੀ ਕਿ ਉਨ੍ਹਾਂ ਦਾ ਮੋਟਾਪਾ ਸਿਰਫ਼ 'ਪੱਪੀ ਫੈਟ' ਹੈ, ਪਰ ਉਨ੍ਹਾਂ ਦੀ ਮਾਂ ਹਮੇਸ਼ਾ ਉਨ੍ਹਾਂ ਨੂੰ ਮੋਟਾ ਕਹਿੰਦੀ ਸੀ।
ਡਾਈਟ ਵਿੱਚ ਕੀਤੇ ਇਹ ਵੱਡੇ ਬਦਲਾਅ
ਸਰੋਤਾਂ ਅਨੁਸਾਰ ਕਰਨ ਨੇ ਆਪਣੀ ਡਾਈਟ ਵਿੱਚੋਂ ਗਲੂਟਨ (ਕਣਕ ਦੀ ਰੋਟੀ) ਹਟਾ ਦਿੱਤੀ, ਚੀਨੀ ਛੱਡ ਦਿੱਤੀ ਅਤੇ ਦੁੱਧ ਦੀ ਜਗ੍ਹਾ ਬਾਦਾਮ ਦੇ ਦੁੱਧ ਦੀ ਵਰਤੋਂ ਸ਼ੁਰੂ ਕੀਤੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੂੰ ਥਾਈਰੋਇਡ ਦੀ ਸਮੱਸਿਆ ਵੀ ਸੀ, ਜਿਸ ਲਈ ਉਨ੍ਹਾਂ ਨੇ ਡਾਕਟਰੀ ਇਲਾਜ ਲਿਆ।
ਗਲੂਟਨ ਇੰਟੌਲਰੈਂਸ ਕੀ ਹੈ? ਇਹ ਇੱਕ ਅਜਿਹੀ ਸਥਿਤੀ ਹੈ ਜਿੱਥੇ ਕਣਕ, ਜੌਂ ਜਾਂ ਰਾਈ ਵਿੱਚ ਮੌਜੂਦ ਪ੍ਰੋਟੀਨ (ਗਲੂਟਨ) ਸਰੀਰ ਨੂੰ ਨੁਕਸਾਨ ਪਹੁੰਚਾਉਂਦਾ ਹੈ, ਜਿਸ ਨਾਲ ਪੇਟ ਦਰਦ, ਗੈਸ ਜਾਂ ਥਕਾਵਟ ਮਹਿਸੂਸ ਹੋ ਸਕਦੀ ਹੈ। ਅਜਿਹੇ ਲੋਕਾਂ ਲਈ ਚੌਲ, ਆਲੂ, ਮੱਕੀ ਅਤੇ ਬਾਜਰਾ ਸੁਰੱਖਿਅਤ ਵਿਕਲਪ ਹਨ।