ਅਮਰੀਕੀ ਪਾਬੰਦੀਆਂ ਦਾ ਅਸਰ, 1 ਡਾਲਰ=1,12,000 ਰਿਆਲ

ਤੇਹਰਾਨ - ਬਹੁ ਗਿਣਤੀ ਸ਼ੀਆ ਭਾਈਚਾਰੇ ਵਾਲੇ ਈਰਾਨ ਨੂੰ ਵੱਖ ਕਰਨ ਦੇ ਨਾਲ ਹੀ ਉਸ ਦੀ ਅਰਥਵਿਵਸਥਾ 'ਤੇ ਸੱਟ ਮਾਰਨ ਲਈ ਅਮਰੀਕਾ ਵੱਲੋਂ ਲਾਈਆਂ ਗਈਆਂ ਭਾਰੀਆਂ ਤੇ ਵੱਡੀਆਂ ਪਾਬੰਦੀਆਂ ਦਾ ਅਸਰ ਦਿਸਣ ਲੱਗਾ ਹੈ। ਆਰਥਕ ਸੰਕਟ ਨਾਲ ਜੂਝ ਰਹੇ ਈਰਾਨ ਦੀ ਕਰੰਸੀ ਲਗਾਤਾਰ ਹੇਠਾਂ ਜਾ ਰਹੀ ਹੈ। ਡਾਲਰ ਦੇ ਮੁਕਾਬਲੇ ਈਰਾਨੀ ਰਿਆਲ ਦੀ ਕੀਮਤ ਸ਼ਨੀਵਾਰ ਨੂੰ 1,12,000 ਤੱਕ ਪਹੁੰਚ ਗਈ। ਸ਼ਨੀਵਾਰ ਨੂੰ 1 ਡਾਲਰ ਦੀ ਕੀਮਤ 98,000 ਰਿਆਲ ਸੀ। ਸਰਕਾਰ ਵੱਲੋਂ ਨਿਰਧਾਰਤ ਵਟਾਂਦਰਾ ਦਰ ਡਾਲਰ ਦੇ ਮੁਕਾਬਲੇ 44,070 ਸੀ। 1 ਜਨਵਰੀ ਨੂੰ ਇਸ ਦੀ ਕੀਮਤ 35,186 ਸੀ। 
ਡਾਲਰ ਦੇ ਮੁਕਾਬਲੇ ਰਿਆਲ ਦੀ ਵੈਲਿਊ 'ਚ ਅੱਧੀ ਗਿਰਾਵਟ ਸਿਰਫ 4 ਮਹੀਨਿਆਂ 'ਚ ਆਈ ਹੈ। ਇਹ ਪਹਿਲੀ ਵਾਰ ਮਾਰਚ 'ਚ 50,000 ਦੇ ਪੱਧਰ ਤੋਂ ਹੇਠਾਂ ਗਿਆ ਸੀ। ਸਰਕਾਰ ਨੇ ਅਪ੍ਰੈਲ 'ਚ ਦਰ ਨੂੰ 42,000 'ਤੇ ਸਥਿਰ ਕਰਨ ਦੀ ਕੋਸ਼ਿਸ਼ ਕੀਤੀ ਅਤੇ ਕਾਲਾਬਾਜ਼ਾਰੀ ਕਰਨ ਵਾਲਿਆਂ 'ਤੇ ਸਖਤ ਕਾਰਵਾਈ ਦੀ ਚਿਤਾਵਨੀ ਦਿੱਤੀ ਸੀ। ਹਾਲਾਂਕਿ ਇਹ ਅਜੇ ਵੀ ਜਾਰੀ ਹੈ। 
ਲੋਕ ਅਰਥਵਿਵਸਥਾ 'ਚ ਗਿਰਾਵਟ ਨੂੰ ਲੈ ਕੇ ਚਿੰਤਾ 'ਚ
ਈਰਾਨ ਦੇ ਲੋਕ ਅਰਥਵਿਵਸਥਾ 'ਚ ਗਿਰਾਵਟ ਨੂੰ ਲੈ ਕੇ ਚਿੰਤਾ 'ਚ ਹਨ ਅਤੇ ਆਪਣੀ ਬੱਚਤ ਜਾਂ ਨਿਵੇਸ਼ ਨੂੰ ਡਾਲਰ ਦੇ ਰੂਪ 'ਚ ਸੁਰੱਖਿਅਤ ਰੱਖਣਾ ਚਾਹੁੰਦੇ ਹਨ ਕਿਉਂਕਿ ਰਿਆਲ ਦੀ ਕੀਮਤ 'ਚ ਕਮੀ ਦਾ ਦੌਰ ਅਜੇ ਜਾਰੀ ਰਹਿ ਸਕਦਾ ਹੈ। ਬੈਂਕ ਆਮ ਤੌਰ 'ਤੇ ਡਾਲਰ ਆਰਟੀਫੀਸ਼ੀਅਲ ਲੋਅ ਰੇਟ 'ਤੇ ਵੇਚਣ ਤੋਂ ਇਨਕਾਰ ਕਰਦੇ ਹਨ, ਸਰਕਾਰ ਨੂੰ ਜੂਨ 'ਚ ਆਪਣੇ ਰੁਖ਼ 'ਚ ਨਰਮੀ ਲਿਆਉਂਦਿਆਂ ਦਰਾਮਦ 'ਤੇ ਕੁਝ ਸਮੂਹਾਂ ਨੂੰ ਛੋਟ ਦੇਣੀ ਪਈ। ਪਿਛਲੇ ਹਫ਼ਤੇ ਰਾਸ਼ਟਰਪਤੀ ਹਸਨ ਰੂਹਾਨੀ ਨੇ ਸੈਂਟਰਲ ਬੈਂਕ ਦੇ ਮੁਖੀ ਨੂੰ ਬਦਲ ਦਿੱਤਾ ਸੀ। ਇਸ ਦੇ ਪਿੱਛੇ ਇਕ ਵੱਡੀ ਵਜ੍ਹਾ ਸੰਕਟ ਨਾਲ ਨਜਿੱਠਣ 'ਚ ਅਸਫਲਤਾ ਨੂੰ ਦੱਸਿਆ ਜਾ ਰਿਹਾ ਹੈ। ਮਈ 'ਚ ਅਮਰੀਕਾ 2015 ਪ੍ਰਮਾਣੂ ਸੌਦੇ ਤੋਂ ਬਾਹਰ ਹੋ ਗਿਆ ਸੀ ਤੇ ਇਸ ਤੋਂ ਬਾਅਦ ਈਰਾਨ ਨੂੰ ਇਕ ਵਾਰ ਫਿਰ ਪਾਬੰਦੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਅਮਰੀਕਾ ਨੇ 6 ਅਗਸਤ ਤੇ 4 ਨਵੰਬਰ ਨੂੰ ਈਰਾਨ 'ਤੇ ਪੂਰਨ ਰੂਪ ਨਾਲ ਰੋਕ ਲਾ ਦਿੱਤੀ।