ਸ਼ੇਅਰ ਬਾਜ਼ਾਰ ''ਚ ਭੂਚਾਲ : ਸੈਂਸੈਕਸ 555 ਤੇ ਨਿਫਟੀ 166 ਅੰਕਾਂ ਦੀ ਗਿਰਾਵਟ ਲੈ ਕੇ ਹੋਏ ਬੰਦ

ਮੁੰਬਈ (ਭਾਸ਼ਾ) - ਵਿਦੇਸ਼ੀ ਪੂੰਜੀ ਦੇ ਲਗਾਤਾਰ ਬਾਹਰ ਜਾਣ ਅਤੇ ਅਮਰੀਕੀ H-1B ਵੀਜ਼ਾ ਫੀਸਾਂ ਨੂੰ ਲੈ ਕੇ ਚਿੰਤਾਵਾਂ ਵਿਚਕਾਰ ਅੱਜ ਵੀਰਵਾਰ ਨੂੰ ਸੈਂਸੈਕਸ ਅਤੇ ਨਿਫਟੀ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ। ਘਰੇਲੂ ਬਾਜ਼ਾਰਾਂ ਵਿੱਚ ਲਗਾਤਾਰ ਪੰਜਵੇਂ ਸੈਸ਼ਨ ਵਿੱਚ ਗਿਰਾਵਟ ਆਈ ਹੈ। ਭਾਰਤੀ ਸ਼ੇਅਰ ਬਾਜ਼ਾਰਾਂ ਵਿੱਚ ਭਾਰੀ ਵਿਕਰੀ ਦੇਖਣ ਨੂੰ ਮਿਲੀ। ਬਾਜ਼ਾਰ ਇੱਕ ਸੀਮਾ ਵਿੱਚ ਕਾਰੋਬਾਰ ਕਰਦੇ ਰਹੇ, ਪਰ ਫਿਰ ਦਿਨ ਦੇ ਅੰਤ ਤੱਕ ਫਿਸਲ ਗਏ। 30-ਸ਼ੇਅਰਾਂ ਵਾਲਾ BSE ਸੈਂਸੈਕਸ 555.95 ਅੰਕ ਭਾਵ 0.68% ਡਿੱਗ ਕੇ 81,159.68 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। ਸੈਂਸੈਕਸ ਦੇ ਸਿਰਫ਼ 3 ਸਟਾਕ ਵਾਧੇ ਨਾਲ ਅਤੇ 27 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ। 

ਦੂਜੇ ਪਾਸੇ  ਅੱਜ ਦੀ ਕਮਜ਼ੋਰੀ ਦੇ ਨਾਲ, ਨਿਫਟੀ ਲਗਾਤਾਰ ਪੰਜ ਦਿਨਾਂ ਲਈ ਡਿੱਗਿਆ ਹੈ। ਦਿਨ ਦੇ ਕਾਰੋਬਾਰ ਦੌਰਾਨ ਨਿਫਟੀ ਨੇ 25,000 ਸਮਰਥਨ ਪੱਧਰ ਨੂੰ ਵੀ ਤੋੜ ਦਿੱਤਾ। 50-ਸ਼ੇਅਰਾਂ ਵਾਲਾ NSE ਨਿਫਟੀ 166.05 ਅੰਕ ਭਾਵ 0.66% ਡਿੱਗ ਕੇ 24,890.85 'ਤੇ ਬੰਦ ਹੋਇਆ ਹੈ।  ਬੈਂਕ ਨਿਫਟੀ 150 ਅੰਕ ਡਿੱਗ ਕੇ 55,000 ਤੋਂ ਹੇਠਾਂ ਬੰਦ ਹੋਇਆ। ਧਾਤੂ ਅਤੇ ਚੋਣਵੇਂ ਰੱਖਿਆ ਸਟਾਕ ਅੱਜ ਤੇਜ਼ੀ ਨਾਲ ਬੰਦ ਹੋਏ। ਬਾਕੀ ਸਾਰੇ ਸੈਕਟਰਲ ਸੂਚਕਾਂਕ ਲਾਲ ਨਿਸ਼ਾਨ ਵਿੱਚ ਬੰਦ ਹੋਏ।

ਸੈਂਸੈਕਸ ਕੰਪਨੀਆਂ ਵਿੱਚ, ਟਾਟਾ ਮੋਟਰਜ਼, ਏਸ਼ੀਅਨ ਪੇਂਟਸ, ਟਾਈਟਨ, HCL ਟੈਕ, ਟਾਟਾ ਕੰਸਲਟੈਂਸੀ ਸਰਵਿਸਿਜ਼, ਮਾਰੂਤੀ ਅਤੇ ਈਟਰਨਲ ਘਾਟੇ ਵਿੱਚ ਸਨ। ਭਾਰਤ ਇਲੈਕਟ੍ਰਾਨਿਕਸ, ਭਾਰਤੀ ਏਅਰਟੈੱਲ, ICICI ਬੈਂਕ, ਲਾਰਸਨ ਐਂਡ ਟੂਬਰੋ, ਅਡਾਨੀ ਪੋਰਟਸ ਅਤੇ ਇਨਫੋਸਿਸ ਨੇ ਵੀ ਵਾਧਾ ਕੀਤਾ। 
ਪਿਛਲੇ ਚਾਰ ਸੈਸ਼ਨਾਂ ਵਿੱਚ BSE ਸੈਂਸੈਕਸ 1,298.33 ਅੰਕ ਡਿੱਗਿਆ ਹੈ ਅਤੇ NSE ਨਿਫਟੀ 366.7 ਅੰਕ ਡਿੱਗਿਆ ਹੈ। 

ਗਲੋਬਲ ਬਾਜ਼ਾਰਾਂ ਦਾ ਰੁਝਾਨ

ਏਸ਼ੀਆਈ ਬਾਜ਼ਾਰਾਂ ਵਿੱਚ, ਦੱਖਣੀ ਕੋਰੀਆ ਦਾ ਕੋਸਪੀ ਲਾਲ ਨਿਸ਼ਾਨ ਵਿੱਚ ਸੀ, ਜਦੋਂ ਕਿ ਜਾਪਾਨ ਦਾ ਨਿੱਕੇਈ, ਚੀਨ ਦਾ ਸ਼ੰਘਾਈ ਐਸਐਸਈ ਅਤੇ ਹਾਂਗ ਕਾਂਗ ਦਾ ਹੈਂਗ ਸੇਂਗ ਹਰੇ ਨਿਸ਼ਾਨ ਵਿੱਚ ਸੀ। ਬੁੱਧਵਾਰ ਨੂੰ ਅਮਰੀਕੀ ਬਾਜ਼ਾਰ ਨਕਾਰਾਤਮਕ ਰੁਝਾਨ ਨਾਲ ਬੰਦ ਹੋਏ। ਅੰਤਰਰਾਸ਼ਟਰੀ ਬੈਂਚਮਾਰਕ ਬ੍ਰੈਂਟ ਕਰੂਡ 0.43 ਪ੍ਰਤੀਸ਼ਤ ਡਿੱਗ ਕੇ $69.01 ਪ੍ਰਤੀ ਬੈਰਲ 'ਤੇ ਆ ਗਿਆ। ਸਟਾਕ ਮਾਰਕੀਟ ਦੇ ਅੰਕੜਿਆਂ ਅਨੁਸਾਰ, ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕ (FII) ਬੁੱਧਵਾਰ ਨੂੰ ਵਿਕਰੇਤਾ ਸਨ ਅਤੇ ਉਨ੍ਹਾਂ ਨੇ 2,425.75 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ।