ਕਾਰਾਂ ਵਾਂਗ ਟਰੱਕਾਂ ਤੇ ਈ-ਰਿਕਸ਼ਾ ਨੂੰ ਵੀ ਮਿਲੇਗੀ ਸੇਫਟੀ ਰੇਟਿੰਗ : ਗਡਕਰੀ

ਆਟੋ ਡੈਸਕ- ਹੁਣ ਤੱਕ ਤੁਸੀਂ ਕਾਰਾਂ ਦੇ ਕਰੈਸ਼ ਟੈਸਟਾਂ ਅਤੇ ਸੇਫਟੀ ਰੇਟਿੰਗਾਂ ਬਾਰੇ ਸੁਣਿਆ ਹੋਵੇਗਾ ਪਰ ਜਲਦੀ ਹੀ ਸਰਕਾਰ ਦੇਸ਼ ਵਿੱਚ ਚੱਲਣ ਵਾਲੇ ਟਰੱਕਾਂ ਅਤੇ ਇਲੈਕਟ੍ਰਿਕ ਰਿਕਸ਼ਿਆਂ (ਈ-ਰਿਕਸ਼ਾ) ਲਈ ਸੇਫਟੀ ਰੇਟਿੰਗ ਨਿਯਮ ਲਿਆਉਣ ਵਾਲੀ ਹੈ। ਹੁਣ ਇਨ੍ਹਾਂ ਵਾਹਨਾਂ ਨੂੰ ਭਾਰਤ ਨਿਊ ਕਾਰ ਅਸੈਸਮੈਂਟ ਪ੍ਰੋਗਰਾਮ (BNCAP) ਦੁਆਰਾ ਕਾਰਾਂ ਲਈ ਦਿੱਤੀ ਗਈ ਸੇਫਟੀ ਰੇਟਿੰਗ ਦੀ ਤਰਜ਼ 'ਤੇ ਸੇਫਟੀ ਰੇਟਿੰਗ ਵੀ ਮਿਲੇਗੀ। ਇਹ ਐਲਾਨ ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ ਨੇ ਕੀਤਾ ਹੈ।

ਨਿਊ ਕਾਰ ਅਸੈਸਮੈਂਟ ਪ੍ਰੋਗਰਾਮ (GNCAP) ਅਤੇ ਇੰਸਟੀਚਿਊਟ ਆਫ਼ ਰੋਡ ਟ੍ਰੈਫਿਕ ਐਜੂਕੇਸ਼ਨ (IRTE) ਦੁਆਰਾ ਸਾਂਝੇ ਤੌਰ 'ਤੇ ਆਯੋਜਿਤ ਵਾਹਨ ਅਤੇ ਫਲੀਟ ਸੇਫਟੀ ਪ੍ਰੋਗਰਾਮ ਵਿੱਚ ਬੋਲਦਿਆਂ ਕੇਂਦਰੀ ਮੰਤਰੀ ਨੇ ਕਿਹਾ, "ਜਲਦੀ ਹੀ ਟਰੱਕਾਂ ਅਤੇ ਇਲੈਕਟ੍ਰਿਕ ਰਿਕਸ਼ਿਆਂ ਨੂੰ ਵੀ ਭਾਰਤ NCAP ਦੀ ਤਰਜ਼ 'ਤੇ ਸੇਫਟੀ ਰੇਟਿੰਗ ਦਿੱਤੀ ਜਾਵੇਗੀ। ਇਸ ਲਈ ਇੱਕ ਯੋਜਨਾ ਬਣਾਈ ਜਾ ਰਹੀ ਹੈ। ਇਸਦਾ ਉਦੇਸ਼ ਨਿਰਮਾਤਾਵਾਂ ਨੂੰ ਉਤਪਾਦਨ ਦੀ ਗੁਣਵੱਤਾ ਵਿੱਚ ਸੁਧਾਰ ਕਰਨ ਲਈ ਉਤਸ਼ਾਹਿਤ ਕਰਨਾ ਹੈ, ਤਾਂ ਜੋ ਵਾਹਨ ਹੋਰ ਸੁਰੱਖਿਅਤ ਬਣ ਸਕਣ।"

ਉਨ੍ਹਾਂ ਕਿਹਾ ਕਿ ਇਸੇ ਤਰ੍ਹਾਂ ਸਰਕਾਰ ਪਹਿਲਾਂ ਹੀ ਦੇਸ਼ ਵਿੱਚ ਬੈਟਰੀ ਨਾਲ ਚੱਲਣ ਵਾਲੇ ਈ-ਰਿਕਸ਼ਾ ਲਈ ਮਿਆਰਾਂ ਅਤੇ ਸੇਫਟੀ ਸਟੈਂਡਰਡ ਪ੍ਰਣਾਲੀ 'ਤੇ ਕੰਮ ਕਰ ਰਹੀ ਹੈ। ਕਿਉਂਕਿ ਈ-ਰਿਕਸ਼ਾ ਦੀ ਸੁਰੱਖਿਆ ਨੂੰ ਲੈ ਕੇ ਕਈ ਵਾਰ ਸਵਾਲ ਉਠਾਏ ਗਏ ਹਨ। ਇਸ ਨਾਲ ਈ-ਰਿਕਸ਼ਾ ਦੀ ਸੇਫਟੀ ਅਤੇ ਗੁਣਵੱਤਾ ਵਿੱਚ ਸੁਧਾਰ ਹੋਵੇਗਾ, ਜਿਸ ਨਾਲ ਲੋਕ ਸੁਰੱਖਿਅਤ ਯਾਤਰਾ ਕਰ ਸਕਣ ਅਤੇ ਨਾਲ ਹੀ ਵਧੇਰੇ ਰੁਜ਼ਗਾਰ ਵੀ ਪੈਦਾ ਹੋਵੇਗਾ।"

ਗਡਕਰੀ ਨੇ ਕਿਹਾ, "ਸੜਕ ਮੰਤਰਾਲਾ ਟਰੱਕ ਡਰਾਈਵਰਾਂ ਲਈ ਕੰਮ ਦੇ ਘੰਟੇ ਨਿਰਧਾਰਤ ਕਰਨ ਲਈ ਇੱਕ ਕਾਨੂੰਨ 'ਤੇ ਵੀ ਕੰਮ ਕਰ ਰਿਹਾ ਹੈ। ਵਰਤਮਾਨ ਵਿੱਚ ਉਹ ਦਿਨ ਵਿੱਚ 13-14 ਘੰਟੇ ਗੱਡੀ ਚਲਾਉਂਦੇ ਹਨ। ਕਿਉਂਕਿ ਦੇਸ਼ ਟਰੱਕ ਡਰਾਈਵਰਾਂ ਦੀ ਘਾਟ ਦਾ ਸਾਹਮਣਾ ਕਰ ਰਿਹਾ ਹੈ, ਇਸ ਲਈ ਸਰਕਾਰ ਦੇਸ਼ ਭਰ ਵਿੱਚ 32 ਅਤਿ-ਆਧੁਨਿਕ ਡਰਾਈਵਿੰਗ ਸੰਸਥਾਵਾਂ ਸਥਾਪਤ ਕਰਨ ਦੀ ਵੀ ਯੋਜਨਾ ਬਣਾ ਰਹੀ ਹੈ। ਮੰਤਰਾਲੇ ਨੇ ਪਹਿਲਾਂ ਹੀ ਟਰੱਕਾਂ ਦੇ ਕੈਬਿਨਾਂ ਵਿੱਚ ਏਅਰ ਕੰਡੀਸ਼ਨਿੰਗ (AC) ਅਤੇ ਐਡਵਾਂਸਡ ਡਰਾਈਵਰ ਸਹਾਇਤਾ ਪ੍ਰਣਾਲੀਆਂ (ADAS) ਪ੍ਰਦਾਨ ਕਰਨਾ ਲਾਜ਼ਮੀ ਕਰ ਦਿੱਤਾ ਹੈ।"