PNB ਦੇ ਖ਼ਾਤਾਧਾਰਕਾਂ ਲਈ ਖ਼ੁਸ਼ਖ਼ਬਰੀ, ਬੈਂਕ ਨੇ ਵਿਆਜ ਦਰ 0.05 ਫੀਸਦੀ ਘਟਾਈ

ਨਵੀਂ ਦਿੱਲੀ (ਭਾਸ਼ਾ) – ਜਨਤਕ ਖੇਤਰ ਦੇ ਪੰਜਾਬ ਨੈਸ਼ਨਲ ਬੈਂਕ (ਪੀ. ਐੱਨ. ਬੀ.) ਨੇ ਬੁੱਧਵਾਰ ਨੂੰ ਕਰਜ਼ੇ ’ਤੇ ਲੱਗਣ ਵਾਲੇ ਵਿਆਜ ਨੂੰ 0.05 ਫੀਸਦੀ ਘਟਾ ਕੇ 6.50 ਫੀਸਦੀ ਕਰ ਦਿੱਤਾ। ਪੀ. ਐੱਨ. ਬੀ. ਨੇ ਕਿਹਾ ਕਿ ਰੇਪੋ ਨਾਲ ਜੁੜੀ ਵਿਆਜ ਦਰ (ਆਰ. ਐੱਲ. ਐੱਲ. ਆਰ.) ਨੂੰ 8 ਨਵੰਬਰ ਤੋਂ 6.55 ਤੋਂ ਘਟਾ ਕੇ 6.50 ਫੀਸਦੀ ਕਰ ਦਿੱਤਾ ਗਿਆ ਹੈ। ਆਰ. ਐੱਲ. ਐੱਲ. ਆਰ. ਵਿਚ ਕਮੀ ਨਾਲ ਰਿਹਾਇਸ਼ੀ, ਕਾਰ, ਸਿੱਖਿਆ, ਨਿੱਜੀ ਕਰਜ਼ਿਆਂ ਸਮੇਤ ਸਾਰੇ ਕਰਜ਼ੇ ਸਸਤੇ ਹੋ ਜਾਣਗੇ। ਜ਼ਿਕਰਯੋਗ ਹੈ ਕਿ ਬੈਂਕ ਨੇ ਪਿਛਲੀ ਵਾਰ 17 ਸਤੰਬਰ ਨੂੰ ਆਪਣੇ ਰੇਪੋ ਆਧਾਰਿਤ ਵਿਆਜ ਨੂੰ 6.80 ਤੋਂ ਘਟਾ ਕੇ 6.55 ਫੀਸਦੀ ਕਰ ਦਿੱਤਾ ਸੀ।

PNB ਦਾ ਮੁਨਾਫਾ 78 ਫੀਸਦੀ ਵਧਿਆ 

ਹਾਲ ਹੀ ਵਿੱਚ, ਪੀਐਨਬੀ ਨੇ ਚਾਲੂ ਵਿੱਤੀ ਸਾਲ (2021-22) ਦੀ ਦੂਜੀ ਤਿਮਾਹੀ ਲਈ ਵਿੱਤੀ ਨਤੀਜੇ ਘੋਸ਼ਿਤ ਕੀਤੇ ਹਨ। ਚਾਲੂ ਵਿੱਤੀ ਸਾਲ ਦੀ ਜੁਲਾਈ-ਸਤੰਬਰ ਤਿਮਾਹੀ ਲਈ ਬੈਂਕ ਦਾ ਸ਼ੁੱਧ ਲਾਭ 78 ਫੀਸਦੀ ਵਧ ਕੇ 1,105 ਕਰੋੜ ਰੁਪਏ ਹੋ ਗਿਆ ਹੈ। ਬੈਂਕ ਨੇ ਸ਼ੇਅਰ ਬਾਜ਼ਾਰ ਨੂੰ ਭੇਜੀ ਸੂਚਨਾ 'ਚ ਦੱਸਿਆ ਸੀ ਕਿ ਉਸ ਨੇ ਪਿਛਲੇ ਵਿੱਤੀ ਸਾਲ ਦੀ ਇਸੇ ਤਿਮਾਹੀ 'ਚ 620.81 ਕਰੋੜ ਰੁਪਏ ਦਾ ਸ਼ੁੱਧ ਲਾਭ ਕਮਾਇਆ ਸੀ। ਇਸ ਦੇ ਨਾਲ ਹੀ, ਸਤੰਬਰ, 2021 ਨੂੰ ਖਤਮ ਹੋਈ ਤਿਮਾਹੀ ਲਈ ਬੈਂਕ ਦੀ ਕੁੱਲ ਆਮਦਨ ਘਟ ਕੇ 21,262.32 ਕਰੋੜ ਰੁਪਏ ਰਹਿ ਗਈ, ਜੋ ਪਿਛਲੇ ਵਿੱਤੀ ਸਾਲ ਦੀ ਇਸੇ ਤਿਮਾਹੀ ਵਿੱਚ 23,279.79 ਕਰੋੜ ਰੁਪਏ ਸੀ।

ਬੈਂਕ ਦਾ ਸੰਚਾਲਨ ਲਾਭ ਵੀ ਜੁਲਾਈ-ਸਤੰਬਰ 2021 ਦੌਰਾਨ ਘਟ ਕੇ 4,021.12 ਕਰੋੜ ਰੁਪਏ ਰਹਿ ਗਿਆ ਜੋ ਪਿਛਲੇ ਵਿੱਤੀ ਸਾਲ ਦੀ ਸਮਾਨ ਮਿਆਦ ਦੇ 5,674.91 ਕਰੋੜ ਰੁਪਏ ਸੀ। ਰਿਪੋਰਟਿੰਗ ਤਿਮਾਹੀ ਦੇ ਦੌਰਾਨ, ਪੀਐਨਬੀ ਬੈਂਕ ਦਾ ਐਨਪੀਏ ਮਾਮੂਲੀ ਤੌਰ 'ਤੇ ਵਧ ਕੇ 13.63 ਪ੍ਰਤੀਸ਼ਤ ਹੋ ਗਿਆ ਹੈ। ਪਿਛਲੇ ਵਿੱਤੀ ਸਾਲ ਦੀ ਇਸੇ ਤਿਮਾਹੀ 'ਚ ਇਹ 13.43 ਫੀਸਦੀ ਸੀ।