ਜਲਦ ਮਹਿੰਗੇ ਹੋ ਸਕਦੇ ਹਨ ਗ਼ਰੀਬਾਂ ਦੇ ਬਦਾਮ,ਇਸ ਕਾਰਨ ਵਧਣਗੇ ਮੂੰਗਫਲੀ ਦੇ ਭਾਅ

ਨਵੀਂ ਦਿੱਲੀ — ਸਰਦੀਆਂ ਦੀ ਆਮਦ ਦੇ ਨਾਲ ਹੀ ਮੂੰਗਫਲੀ ਦੀ ਮੰਗ ਵੀ ਵਧ ਜਾਂਦੀ ਹੈ। ਠੰਡ ਸ਼ੁਰੂ ਹੁੰਦੇ ਹੀ ਥਾਂ-ਥਾਂ ਮੂੰਗਫਲੀ ਵਿਕਣੀ ਸ਼ੁਰੂ ਹੋ ਜਾਂਦੀ ਹੈ। ਪਿਛਲੇ ਲੰਮੇ ਸਮੇਂ ਤੋਂ ਆਮ ਲੋਕਾਂ ਲਈ ਥੋੜ੍ਹੇ ਸਮੇਂ ਲਈ ਭੁੱਖ ਮਿਟਾਉਣ ਦਾ ਇਹ ਸਸਤਾ ਵਿਕਲਪ ਰਿਹਾ ਹੈ। ਹੁਣ ਮੂੰਗਫਲੀ ਦੇ ਥੋਕ ਵਪਾਰ ਦਾ ਰੁਝਾਨ ਦੱਸ ਰਿਹਾ ਹੈ ਕਿ ਇਨ੍ਹਾਂ ਸਰਦੀਆਂ ਵਿਚ ਹੁਣ ਤੱਕ ਦੀ ਸਭ ਤੋਂ ਮਹਿੰਗੀ ਮੂੰਗਫਲੀ ਵੇਚੀ ਜਾ ਸਕਦੀ ਹੈ। ਇਸ ਦਾ ਇਕ ਵੱਡਾ ਕਾਰਨ ਐਮ.ਐਸ.ਪੀ. ਹੈ, ਜਦਕਿ ਦੂਸਰਾ ਕਾਰਨ ਤੇਲ ਲਈ ਮੂੰਗਫਲੀ ਦੀ ਮੰਗ ਹੈ।

ਮੂੰਗਫਲੀ 120 ਰੁਪਏ ਕਿਲੋ ਭਾਅ 

ਆਮ ਦੁਕਾਨਾਂ 'ਤੇ ਭੁੰਨੀ ਹੋਈ ਮੂੰਗਫਲੀ ਵੇਚਣ ਵਾਲੇ ਵਿਕਰੇਤਾ 120 ਰੁਪਏ ਪ੍ਰਤੀ ਕਿਲੋ ਦੇ ਹਿਸਾਬ ਨਾਲ ਇਸ ਦੀ ਵਿਕਰੀ ਕਰ ਰਹੇ ਹਨ। ਇਸ ਤੋਂ ਇਲਾਵਾ ਵਧੀਆ ਕਿਸਮ ਦੀ ਮੋਟੇ ਤੇ ਤਿੰਨ ਦਾਣੇ ਵਾਲੀ ਮੂੰਗਫਲੀ 140 ਰੁਪਏ ਪ੍ਰਤੀ ਕਿੱਲੋ ਤੱਕ ਵਿਕ ਰਹੀ ਹੈ ਜਦਕਿ ਥੋਕ ਰੇਟ ਅਜੇ ਬਾਜ਼ਾਰ 'ਚ ਆਉਣ ਨੂੰ ਸਮਾਂ ਲੱਗੇਗਾ। ਕੱਚੀ ਮੂੰਗਫਲੀ ਥੋਕ ਵਿਚ 65 ਤੋਂ 70 ਰੁਪਏ ਪ੍ਰਤੀ ਕਿੱਲੋ ਵਿਕ ਰਹੀ ਹੈ। ਇਸ ਦੇ ਨਾਲ ਹੀ 100-200 ਕਿਲੋ ਮੂੰਗਫਲੀ ਨੂੰ ਇਕੱਠੀ ਖਰੀਦ ਕੇ ਭੁੰਨ ਕੇ ਪਰਚੂਨ ਵਿਚ 80-100 ਰੁਪਏ ਵਿਚ ਵੇਚਿਆ ਜਾ ਰਿਹਾ ਹੈ। ਇਹ ਉਸ ਸਮੇਂ ਦੀ ਕੀਮਤ ਹੈ ਜਦੋਂ ਬਾਜ਼ਾਰ ਵਿਚ ਮੂੰਗਫਲੀ ਦੀ ਮੰਗ ਅਜੇ ਖੁੱਲ੍ਹ ਕੇ ਨਹੀਂ ਆਈ ਹੈ।

ਇਹ ਵੀ ਪੜ੍ਹੋ- ਹੁਣ ਆਧਾਰ ਕਾਰਡ ਦੇ QR ਕੋਡ ਨਾਲ ਆਫਲਾਈਨ ਹੋਵੇਗੀ ਤੁਹਾਡੀ ਪਛਾਣ, ਜਾਣੋ ਜ਼ਰੂਰੀ ਗੱਲਾਂ

ਐਮ.ਐਸ.ਪੀ. ਅਤੇ ਤੇਲ ਦੀ ਮੰਗ ਨੇ ਵਿਗਾੜਿਆ ਗਣਿਤ

ਸਰੋਂ ਦੇ ਤੇਲ ਵਿਚ ਮਿਲਾਵਟ ਰੁਕ ਗਈ ਹੈ। ਸਰ੍ਹੋਂ ਦਾ ਤੇਲ ਸੋਧੇ ਹੋਏ ਤੇਲ ਨਾਲੋਂ ਮਹਿੰਗਾ ਵਿਕ ਰਿਹਾ ਹੈ। ਜਿਸ ਕਾਰਨ ਬਾਕੀ ਰਿਫਾਇੰਡ ਤੇਲਾਂ ਦੀ ਮੰਗ ਵੀ ਵੱਧ ਗਈ ਹੈ। ਸੋਇਆਬੀਨ ਅਤੇ ਮੂੰਗਫਲੀ ਸਮੇਤ ਕਈ ਤੇਲ ਬੀਜਾਂ ਦੀ ਇਸ ਮੰਗ ਕਾਰਨ ਨਿਰੰਤਰ ਵਾਧਾ ਹੋ ਰਿਹਾ ਹੈ। ਸਰਕਾਰ ਨੇ ਮੂੰਗਫਲੀ ਦਾ ਐਮਐਸਪੀ 5275 ਰੁਪਏ ਪ੍ਰਤੀ ਕੁਇੰਟਲ ਤੈਅ ਕੀਤਾ ਹੈ। ਜਿਸ ਤੋਂ ਬਾਅਦ ਮੰਡੀਆਂ ਵਿਚ ਮੂੰਗਫਲੀ ਦੀ ਕੀਮਤ 5220 ਰੁਪਏ ਹੋ ਗਈ ਹੈ।

ਇਹ ਵੀ ਪੜ੍ਹੋ-  ਰਿਲਾਇੰਸ ਦੀ ਪ੍ਰਚੂਨ ਸ਼ਾਖਾ ਨੇ ਅਰਬਨ ਲੈਡਰ 'ਚ 96% ਹਿੱਸੇਦਾਰੀ ਖਰੀਦੀ, 182 ਕਰੋੜ ਰੁਪਏ 'ਚ ਹੋਈ ਡੀਲ

ਉੱਤਰੀ ਭਾਰਤ ਵਿਚ ਖਾਧੀ ਜਾਂਦੀ ਹੈ ਸੀਕਰ ਦੀ ਮੂੰਗਫਲੀ

ਮਾਹਰਾਂ ਅਨੁਸਾਰ ਸੀਕਰ ਵਿਚ ਪੈਦਾ ਕੀਤੀ ਜ਼ਿਆਦਾਤਰ ਮੂੰਗਫਲੀ ਗੁਜਰਾਤ, ਮਹਾਰਾਸ਼ਟਰ, ਯੂ.ਪੀ., ਐਮ.ਪੀ. ਅਤੇ ਦਿੱਲੀ ਸਮੇਤ ਕਈ ਹੋਰ ਸੂਬਿਆਂ ਵਿਚ ਵਿਕਦੀ ਹੈ। ਫਿਲਹਾਲ ਸੀਕਰ ਵਿਚ ਮੂੰਗਫਲੀ ਦੀ ਕੀਮਤ 5220 ਰੁਪਏ ਪ੍ਰਤੀ ਕੁਇੰਟਲ ਹੈ। ਗੁਜਰਾਤ ਦੇ ਬਾਜ਼ਾਰ ਵਿਚ ਸਭ ਤੋਂ ਤੇਜ਼ ਕੀਮਤ 5675 ਰੁਪਏ ਹੈ ਅਤੇ ਸਭ ਤੋਂ ਘੱਟ ਕੀਮਤ 4710 ਰੁਪਏ ਹੈ। ਤਿੰਨ ਦਾਣੇ ਵਾਲੀ ਮੋਟੀ ਮੂੰਗਫਲੀ ਗੁਜਰਾਤ ਵਿਚ ਹੀ ਹੁੰਦੀ ਹੈ।

ਇਹ ਵੀ ਪੜ੍ਹੋ- ਇਨਫੋਸਿਸ ਨੇ ਅਮਰੀਕਾ ਵਿਚ ਸਥਾਨਕ ਲੋਕਾਂ ਦੀ ਭਰਤੀ ਕਰਕੇ ਵੀਜ਼ਾ 'ਤੇ ਨਿਰਭਰਤਾ ਘਟਾਈ