ਹੁਣ ਅਮਰੀਕਾ 'ਚ ਵਿਕਣਗੇ 'ਮੇਡ ਇਨ ਇੰਡੀਆ' iPhone, Apple CEO ਦਾ ਵੱਡਾ ਖੁਲਾਸਾ

ਬਿਜ਼ਨਸ ਡੈਸਕ: ਐਪਲ ਹੁਣ ਅਮਰੀਕਾ 'ਚ ਵਿਕਣ ਵਾਲੇ ਲਗਭਗ ਅੱਧੇ ਆਈਫੋਨ ਭਾਰਤ 'ਚ ਬਣਾ ਰਿਹਾ ਹੈ। ਕੰਪਨੀ ਦੇ ਸੀਈਓ ਟਿਮ ਕੁੱਕ ਨੇ ਕਿਹਾ ਕਿ ਚੀਨ ਦੇ ਮੁਕਾਬਲੇ ਭਾਰਤ 'ਚ ਟੈਰਿਫ ਘੱਟ ਹਨ, ਜਿਸ ਨਾਲ ਭਾਰਤ ਅਮਰੀਕੀ ਬਾਜ਼ਾਰ ਲਈ ਇੱਕ ਪ੍ਰਮੁੱਖ ਨਿਰਮਾਣ ਸਥਾਨ ਬਣ ਗਿਆ ਹੈ। ਇੱਕ ਇੰਟਰਵਿਊ ਵਿੱਚ ਕੁੱਕ ਨੇ ਇਹ ਵੀ ਕਿਹਾ ਕਿ ਐਪਲ ਏਅਰਪੌਡਸ ਤੇ ਆਈਪੈਡ ਵਰਗੇ ਹੋਰ ਉਤਪਾਦਾਂ ਲਈ ਵੀਅਤਨਾਮ 'ਤੇ ਨਿਰਭਰ ਕਰਦਾ ਹੈ। ਟਿਮ ਕੁੱਕ ਨੇ ਕਿਹਾ, "ਭਾਰਤ ਹੁਣ ਅਮਰੀਕਾ 'ਚ ਵਿਕਣ ਵਾਲੇ ਆਈਫੋਨ ਲਈ 'ਮੂਲ ਦੇਸ਼' ਬਣ ਰਿਹਾ ਹੈ।" ਇਹ ਕਦਮ ਅਜਿਹੇ ਸਮੇਂ ਵਿੱਚ ਆਇਆ ਹੈ, ਜਦੋਂ ਅਮਰੀਕਾ ਨੇ ਚੀਨ ਤੋਂ ਆਯਾਤ 'ਤੇ ਉੱਚ ਟੈਰਿਫ ਲਗਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਭਾਰਤ ਅਤੇ ਵੀਅਤਨਾਮ ਤੋਂ ਅਮਰੀਕਾ ਨੂੰ ਨਿਰਯਾਤ ਕੀਤੇ ਜਾਣ ਵਾਲੇ ਉਤਪਾਦਾਂ 'ਤੇ ਸਿਰਫ 10% ਟੈਰਿਫ ਲੱਗਦਾ ਹੈ, ਜਦੋਂ ਕਿ ਚੀਨ 'ਤੇ ਦਰ ਜ਼ਿਆਦਾ ਹੈ।

ਐਪਲ ਦੀ ਸਪਲਾਈ ਚੇਨ ਰਣਨੀਤੀ ਅਤੇ ਭਾਰਤ ਨੂੰ ਲਾਭ
ਕੁੱਕ ਨੇ ਕਿਹਾ ਕਿ ਕੰਪਨੀ ਨੇ ਸਪਲਾਈ ਚੇਨ ਨੂੰ ਇਸ ਤਰੀਕੇ ਨਾਲ ਅਨੁਕੂਲ ਬਣਾਇਆ ਹੈ ਕਿ ਟੈਰਿਫ ਦਾ ਪ੍ਰਭਾਵ ਹੁਣ ਸੀਮਤ ਹੈ। ਵਿਸ਼ਲੇਸ਼ਕਾਂ ਦਾ ਕਹਿਣਾ ਹੈ ਕਿ ਐਪਲ ਦੀ ਰਣਨੀਤੀ ਭਾਰਤ ਲਈ ਇੱਕ ਵੱਡਾ ਆਰਥਿਕ ਹੁਲਾਰਾ ਹੋ ਸਕਦੀ ਹੈ। JPMorgan ਦੇ ਅਨੁਸਾਰ ਭਾਰਤ 'ਚ ਆਈਫੋਨ ਬਣਾਉਣਾ ਚੀਨ ਦੇ ਮੁਕਾਬਲੇ ਸਿਰਫ਼ 2% ਮਹਿੰਗਾ ਹੈ ਪਰ ਇਹ ਅਮਰੀਕਾ ਦੇ ਮੁਕਾਬਲੇ 30% ਸਸਤਾ ਹੈ।

ਐਪਲ ਦੇ ਤਿਮਾਹੀ ਨਤੀਜੇ
ਮਾਰਚ ਤਿਮਾਹੀ ਵਿੱਚ ਐਪਲ ਦਾ ਮਾਲੀਆ $95.4 ਬਿਲੀਅਨ ਸੀ, ਜੋ ਪਿਛਲੇ ਸਾਲ ਇਸੇ ਸਮੇਂ ਵਿੱਚ $90.75 ਬਿਲੀਅਨ ਸੀ। ਆਈਫੋਨ ਦੀ ਵਿਕਰੀ ਨੇ ਇਸ ਵਿੱਚ $46.84 ਬਿਲੀਅਨ ਦਾ ਯੋਗਦਾਨ ਪਾਇਆ। ਟਿਮ ਕੁੱਕ ਨੂੰ ਉਮੀਦ ਹੈ ਕਿ ਕੰਪਨੀ ਦਾ ਮਾਲੀਆ ਜੂਨ ਤਿਮਾਹੀ ਵਿੱਚ "ਘੱਟ ਤੋਂ ਮੱਧ ਸਿੰਗਲ ਡਿਜਿਟ" ਵਿਕਾਸ ਦਰ ਨਾਲ ਵਧੇਗਾ ਪਰ ਟੈਰਿਫਾਂ ਬਾਰੇ ਅਨਿਸ਼ਚਿਤਤਾ ਬਣੀ ਹੋਈ ਹੈ।