ਹੁਣ IRCTC ਨਹੀਂ ਵੇਚੇਗੀ ਗਾਹਕਾਂ ਦਾ ਡਾਟਾ, ਟੈਂਡਰ ਹੋਇਆ ਵਾਪਸ

ਨਵੀਂ ਦਿੱਲੀ - ਰੇਲਵੇ ਦੀ ਕੇਟਰਿੰਗ ਅਤੇ ਟਿਕਟਿੰਗ ਸ਼ਾਖਾ IRCTC ਨੇ ਆਪਣੇ ਯਾਤਰੀਆਂ ਅਤੇ ਮਾਲ ਭਾੜੇ ਦੇ ਗਾਹਕਾਂ ਦੇ ਡੇਟਾ ਦੇ ਮੁਦਰੀਕਰਨ ਲਈ ਸਲਾਹਕਾਰਾਂ ਦੀ ਨਿਯੁਕਤੀ ਲਈ ਇੱਕ ਵਿਵਾਦਪੂਰਨ ਟੈਂਡਰ ਵਾਪਸ ਲੈ ਲਿਆ ਹੈ। ਅਧਿਕਾਰੀਆਂ ਨੇ ਸ਼ੁੱਕਰਵਾਰ ਨੂੰ ਕਿਹਾ ਕਿ ਗੋਪਨੀਯਤਾ ਨੂੰ ਲੈ ਕੇ ਚਿੰਤਾਵਾਂ ਤੋਂ ਬਾਅਦ ਇਹ ਫੈਸਲਾ ਵਾਪਸ ਲਿਆ ਗਿਆ ਹੈ। IRCTC ਨੇ ਸ਼ੁੱਕਰਵਾਰ ਨੂੰ ਸੂਚਨਾ ਤਕਨਾਲੋਜੀ ਬਾਰੇ ਸੰਸਦੀ ਸਥਾਈ ਕਮੇਟੀ ਨੂੰ ਸੂਚਿਤ ਕੀਤਾ ਕਿ ਟੈਂਡਰ ਵਾਪਸ ਲੈ ਲਿਆ ਗਿਆ ਹੈ। ਕਾਂਗਰਸ ਨੇਤਾ ਸ਼ਸ਼ੀ ਥਰੂਰ ਇਸ ਕਮੇਟੀ ਦੇ ਚੇਅਰਮੈਨ ਹਨ।

ਭਾਰਤੀ ਰੇਲਵੇ ਕੈਟਰਿੰਗ ਐਂਡ ਟੂਰਿਜ਼ਮ ਕਾਰਪੋਰੇਸ਼ਨ (ਆਈਆਰਸੀਟੀਸੀ) ਦੇ ਅਧਿਕਾਰੀਆਂ ਨੂੰ ਡਿਜੀਟਲ ਡੇਟਾ ਦੇ ਮੁਦਰੀਕਰਨ ਲਈ ਸਲਾਹਕਾਰ ਦੀ ਨਿਯੁਕਤੀ ਲਈ ਟੈਂਡਰ ਦੇ ਮੁੱਦੇ 'ਤੇ ਸੰਸਦੀ ਕਮੇਟੀ ਦੁਆਰਾ ਤਲਬ ਕੀਤਾ ਗਿਆ ਸੀ। ਆਈਆਰਸੀਟੀਸੀ ਦੀ ਮੈਨੇਜਿੰਗ ਡਾਇਰੈਕਟਰ ਅਤੇ ਚੇਅਰਪਰਸਨ ਰਜਨੀ ਹਸੀਜਾ ਸਮੇਤ ਹੋਰ ਅਧਿਕਾਰੀ ਕਮੇਟੀ ਦੇ ਸਾਹਮਣੇ ਪੇਸ਼ ਹੋਏ। ਆਈਆਰਸੀਟੀਸੀ ਦੇ ਇੱਕ ਅਧਿਕਾਰੀ ਨੇ ਕਮੇਟੀ ਨੂੰ ਦੱਸਿਆ, "ਆਈਆਰਸੀਟੀਸੀ ਨੇ ਡੇਟਾ ਪ੍ਰੋਟੈਕਸ਼ਨ ਬਿੱਲ ਨੂੰ ਮਨਜ਼ੂਰੀ ਨਾ ਮਿਲਣ ਕਾਰਨ ਟੈਂਡਰ ਵਾਪਸ ਲੈ ਲਿਆ ਹੈ।"

ਕਮੇਟੀ ਦੀ ਸੁਣਵਾਈ ਤੋਂ ਪਹਿਲਾਂ ਸ਼ੁੱਕਰਵਾਰ ਨੂੰ ਆਈਆਰਸੀਟੀਸੀ ਦੀ ਸਾਲਾਨਾ ਆਮ ਮੀਟਿੰਗ ਵਿੱਚ ਟੈਂਡਰ ਵਾਪਸ ਲੈਣ ਦਾ ਫੈਸਲਾ ਲਿਆ ਗਿਆ। IRCTC ਦੇ 100 ਮਿਲੀਅਨ ਤੋਂ ਵੱਧ ਉਪਭੋਗਤਾ ਹਨ, ਜਿਨ੍ਹਾਂ ਵਿੱਚੋਂ 75 ਮਿਲੀਅਨ ਸਰਗਰਮ ਉਪਭੋਗਤਾ ਹਨ। IRCTC ਨੇ 1,000 ਕਰੋੜ ਰੁਪਏ ਤੱਕ ਦਾ ਮਾਲੀਆ ਪੈਦਾ ਕਰਨ ਲਈ ਯਾਤਰੀ ਅਤੇ ਮਾਲ ਭਾੜੇ ਦੇ ਖਪਤਕਾਰਾਂ ਦੇ ਡੇਟਾ ਦੇ ਮੁਦਰੀਕਰਨ ਲਈ ਇੱਕ ਸਲਾਹਕਾਰ ਨਿਯੁਕਤ ਕਰਨ ਲਈ ਇੱਕ ਟੈਂਡਰ ਜਾਰੀ ਕੀਤਾ ਸੀ। ਆਈਆਰਸੀਟੀਸੀ ਦੇ ਟੈਂਡਰ ਦਸਤਾਵੇਜ਼ ਦੇ ਅਨੁਸਾਰ, ਅਧਿਐਨ ਕੀਤੇ ਜਾਣ ਵਾਲੇ ਡੇਟਾ ਵਿੱਚ ਵੱਖ-ਵੱਖ ਜਨਤਕ ਐਪਲੀਕੇਸ਼ਨਾਂ ਦੁਆਰਾ ਦਾਖਲ ਕੀਤੀ ਗਈ ਜਾਣਕਾਰੀ ਸ਼ਾਮਲ ਹੈ। ਜਾਣਕਾਰੀ ਵਿੱਚ ਨਾਮ, ਉਮਰ, ਮੋਬਾਈਲ ਨੰਬਰ, ਪਤਾ, ਈਮੇਲ ਆਈਡੀ, ਯਾਤਰਾ ਦੀ ਸ਼੍ਰੇਣੀ, ਭੁਗਤਾਨ ਦਾ ਢੰਗ, ਲੌਗਇਨ, ਪਾਸਵਰਡ ਆਦਿ ਦੇ ਵੇਰਵੇ ਸ਼ਾਮਲ ਸਨ।

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ  ਸਾਂਝੇ ਕਰੋ।