ਭਾਰਤ 'ਚ ਜਲਦ ਸਸਤੀ ਹੋਵੇਗੀ ਵਿਦੇਸ਼ੀ ਸ਼ਰਾਬ, ਇਸ ਦੇਸ਼ ਨਾਲ ਹੋਣ ਜਾ ਰਿਹੈ ਸਮਝੌਤਾ

ਨਵੀਂ ਦਿੱਲੀ - ਵਣਜ ਅਤੇ ਉਦਯੋਗ ਮੰਤਰਾਲੇ ਨੇ ਕਿਹਾ ਕਿ ਭਾਰਤ ਅਤੇ ਯੂਕੇ ਨੇ ਭਾਰਤ-ਯੂਕੇ ਮੁਕਤ ਵਪਾਰ ਸਮਝੌਤੇ (ਐਫਟੀਏ) ਲਈ ਪਹਿਲੇ ਦੌਰ ਦੀ ਗੱਲਬਾਤ ਦੀ ਸਮਾਪਤੀ ਕੀਤੀ ਹੈ। ਵਰਚੁਅਲ ਤਰੀਕੇ ਨਾਲ ਲਗਭਗ ਦੋ ਹਫ਼ਤਿਆਂ ਤੋਂ ਵੱਧ ਸਮੇਂ ਤੱਕ ਚੱਲੀ ਗੱਲਬਾਤ ਦੇ ਪਹਿਲੇ ਦੌਰ ਦੌਰਾਨ, ਦੋਵਾਂ ਧਿਰਾਂ ਨੇ ਮੰਨਿਆ ਕਿ ਕੋਵਿਡ ਦੀ ਵਿਸ਼ਵਵਿਆਪੀ ਮਹਾਂਮਾਰੀ ਦੁਆਰਾ ਪੈਦਾ ਹੋਈਆਂ ਚੁਣੌਤੀਆਂ ਦੇ ਬਾਵਜੂਦ ਇਸ ਨੂੰ ਅੱਗੇ ਵਧਾਇਆ ਜਾ ਸਕਦਾ ਹੈ।

ਗੱਲਬਾਤ ਦੇ ਪਹਿਲੇ ਦੌਰ ਦੌਰਾਨ, ਦੋਵਾਂ ਪਾਸਿਆਂ ਦੇ ਤਕਨੀਕੀ ਮਾਹਰ 32 ਵੱਖ-ਵੱਖ ਸੈਸ਼ਨਾਂ ਵਿੱਚ ਚਰਚਾ ਲਈ ਇਕੱਠੇ ਹੋਏ। ਇਸ ਵਿੱਚ ਵਸਤੂਆਂ ਦਾ ਵਪਾਰ, ਵਿੱਤੀ ਸੇਵਾਵਾਂ ਅਤੇ ਦੂਰਸੰਚਾਰ ਸਮੇਤ ਸੇਵਾਵਾਂ ਵਿੱਚ ਵਪਾਰ, ਨਿਵੇਸ਼, ਬੌਧਿਕ ਸੰਪੱਤੀ, ਕਸਟਮ ਅਤੇ ਵਪਾਰ ਦੀ ਸਹੂਲਤ, ਸੈਨੇਟਰੀ ਅਤੇ ਸਮਾਜਿਕ-ਸਵੱਛਤਾ ਉਪਾਅ, ਵਪਾਰ ਵਿੱਚ ਤਕਨੀਕੀ ਰੁਕਾਵਟਾਂ, ਮੁਕਾਬਲਾ, ਲਿੰਗ, ਸਰਕਾਰੀ ਖਰੀਦ, SMEs, ਸਥਿਰਤਾ, ਪਾਰਦਰਸ਼ਤਾ, ਵਪਾਰ ਅਤੇ ਵਿਕਾਸ, ਭੂਗੋਲਿਕ ਸੰਕੇਤ ਅਤੇ ਡਿਜੀਟਲ ਸਮੇਤ 26 ਨੀਤੀ ਖੇਤਰਾਂ ਨੂੰ ਸ਼ਾਮਲ ਕੀਤਾ ਗਿਆ ਹੈ।

ਇਹ ਵੀ ਪੜ੍ਹੋ : ਭਾਰਤਪੇ ਦੇ ਸੰਸਥਾਪਕ ਅਸ਼ਨੀਰ ਗਰੋਵਰ ਦੀ ਪਤਨੀ ਵੀ ਗਈ ਛੁੱਟੀ 'ਤੇ , ਜਾਣੋ ਵਜ੍ਹਾ

ਗੱਲਬਾਤ ਦੇ ਪਹਿਲੇ ਦੌਰ ਦੌਰਾਨ ਯੂਕੇ ਤੋਂ ਆਯਾਤ ਹੋਣ ਵਾਲੇ ਅਲਕੋਹਲ ਯੁਕਤ ਪੀਣ ਵਾਲੇ ਪਦਾਰਥਾਂ 'ਤੇ ਟੈਰਿਫ ਨੂੰ ਘਟਾਉਣ ਲਈ ਇੱਕ ਸਮਝੌਤਾ ਜਲਦੀ ਹੀ ਆਖ਼ਰੀ ਗੇੜ ਵਿਚ ਪਹੁੰਚ ਸਕਦਾ ਹੈ। ਵਰਤਮਾਨ ਸਮੇਂ ਵਿੱਚ ਬ੍ਰਿਟਿਸ਼ ਵਿਸਕੀ ਅਤੇ ਵਾਈਨ ਸਮੇਤ ਸਾਰੇ ਅਲਕੋਹਲ ਵਾਲੇ ਪੀਣ ਵਾਲੇ ਪਦਾਰਥਾਂ ਦੀ ਦਰਾਮਦ 'ਤੇ 150 ਪ੍ਰਤੀਸ਼ਤ ਡਿਊਟੀ ਲੱਗ ਰਹੀ ਹੈ। ਸੂਤਰਾਂ ਮੁਤਾਬਕ ਸਮਝੌਤੇ ਤਹਿਤ ਬ੍ਰਿਟਿਸ਼ ਤੋਂ ਆਯਾਤ ਹੋਣ ਵਾਲੇ  ਅਲਕੋਹਲ ਯੁਕਤ ਪਦਾਰਥਾਂ 'ਤੇ ਡਿਊਟੀ 150 ਫੀਸਦੀ ਤੋਂ ਘਟਾ ਕੇ 50 ਫੀਸਦੀ ਤੋਂ ਵੀ ਘੱਟ ਕੀਤੀ ਜਾ ਸਕਦੀ ਹੈ। ਇਸ ਦਿਸ਼ਾ 'ਚ ਦੋਹਾਂ ਦੇਸ਼ਾਂ ਵਿਚਾਲੇ ਲਗਭਗ ਸਮਝੌਤਾ ਲਗਭਗ ਆਖ਼ਰੀ ਪੱਧਰ 'ਤੇ ਪਹੁੰਚ ਚੁੱਕਾ ਹੈ। ਸਮਝੌਤੇ ਤਹਿਤ ਬ੍ਰਿਟੇਨ ਵੀ ਕਈ ਭਾਰਤੀ ਵਸਤੂਆਂ 'ਤੇ ਲੱਗਣ ਵਾਲੇ ਟੈਰਿਫ ਦੀ ਦਰ 'ਚ ਕਟੌਤੀ ਕਰੇਗਾ। ਕਨਫੈਡਰੇਸ਼ਨ ਆਫ ਇੰਡੀਅਨ ਅਲਕੋਹਲਿਕ ਬੇਵਰੇਜ ਕੰਪਨੀਜ਼ (ਸੀ.ਆਈ.ਏ.ਬੀ.ਸੀ.) ਨਾਲ ਹੋਈ ਮੀਟਿੰਗ ਤੋਂ ਬਾਅਦ ਕਨਫੈਡਰੇਸ਼ਨ ਨੇ ਮੰਤਰਾਲੇ ਨੂੰ ਕਿਹਾ ਕਿ  ਬ੍ਰਿਟਿਸ਼ ਅਲਕੋਹਲ ਵਾਲੇ ਪੀਣ ਵਾਲੇ ਪਦਾਰਥਾਂ 'ਤੇ ਡਿਊਟੀ ਨੂੰ ਹੌਲੀ-ਹੌਲੀ ਘਟਾਇਆ ਜਾਵੇਗਾ, ਤਾਂ ਜੋ ਭਾਰਤੀ ਅਲਕੋਹਲ ਉਦਯੋਗ 'ਤੇ ਮਾੜਾ ਅਸਰ ਨਾ ਪਵੇ। ਕਨਫੈਡਰੇਸ਼ਨ ਅਨੁਸਾਰ ਭਾਰਤੀ ਸ਼ਰਾਬ ਉਦਯੋਗ ਰਾਜਾਂ ਨੂੰ 2.5 ਲੱਖ ਕਰੋੜ ਰੁਪਏ ਦਾ ਸਾਲਾਨਾ ਮਾਲੀਆ ਪੈਦਾ ਕਰਦਾ ਹੈ, 20 ਲੱਖ ਲੋਕਾਂ ਨੂੰ ਨੌਕਰੀਆਂ ਪ੍ਰਦਾਨ ਕਰਦਾ ਹੈ ਅਤੇ 50 ਲੱਖ ਕਿਸਾਨਾਂ ਨੂੰ ਸਹਾਇਤਾ ਪ੍ਰਦਾਨ ਕਰਦਾ ਹੈ।

ਸਰਕਾਰੀ ਅੰਕੜਿਆਂ ਮੁਤਾਬਕ ਭਾਰਤ ਵਿੱਚ ਦਰਾਮਦ ਹੋਣ ਵਾਲੀ ਵਿਸਕੀ ਦਾ 70 ਫੀਸਦੀ ਹਿੱਸਾ ਯੂ.ਕੇ. ਬ੍ਰਿਟੇਨ ਦੀ ਹੈ। ਭਾਰਤ ਵਿੱਚ ਬਣੀ ਵਿਸਕੀ ਲਈ ਕੱਚੇ ਮਾਲ ਦਾ ਇੱਕ ਵੱਡਾ ਸਰੋਤ ਵੀ ਬ੍ਰਿਟੇਨ ਹੀ ਹੈ। ਹਾਲਾਂਕਿ, ਭਾਰਤ ਦੇ ਅਲਕੋਹਲ ਦੇ ਨਿਰਯਾਤ ਵਿੱਚ ਯੂਕੇ ਦਾ ਹਿੱਸਾ ਸਿਰਫ ਦੋ ਪ੍ਰਤੀਸ਼ਤ ਹੈ। ਵਿੱਤੀ ਸਾਲ 2019-20 ਵਿੱਚ, ਭਾਰਤ ਦਾ ਅਲਕੋਹਲ ਵਾਲੇ ਪੀਣ ਵਾਲੇ ਪਦਾਰਥਾਂ ਦਾ ਨਿਰਯਾਤ 300 ਮਿਲੀਅਨ ਡਾਲਰ ਦੇ ਨੇੜੇ ਸੀ। ਭਾਰਤ ਮੁੱਖ ਤੌਰ 'ਤੇ ਯੂਏਈ, ਨੀਦਰਲੈਂਡ ਅਤੇ ਸਿੰਗਾਪੁਰ ਨੂੰ ਅਲਕੋਹਲ ਵਾਲੇ ਪੀਣ ਵਾਲੇ ਪਦਾਰਥਾਂ ਦਾ ਨਿਰਯਾਤ ਕਰਦਾ ਹੈ।

ਇਹ ਵੀ ਪੜ੍ਹੋ : ਏਅਰ ਇੰਡੀਆ ਦੇ ਟੇਕਓਵਰ ਤੋਂ ਬਾਅਦ ਸ਼ੁਰੂ ਹੋਇਆ ਮੇਕਓਵਰ, ਪਰ ਬਦਲਾਅ ਦਾ ਹੋ ਰਿਹੈ ਵਿਰੋਧ

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।