Coke-Pepsi ਨੂੰ ਟੱਕਰ ਦੇਣ ਲਈ 50 ਸਾਲ ਪੁਰਾਣੇ Brand ਦੀ ਵਾਪਸੀ! ਰਿਲਾਇੰਸ ਨੇ ਕੀਤਾ Relaunch

ਨਵੀਂ ਦਿੱਲੀ (ਭਾਸ਼ਾ): ਰਿਲਾਇੰਸ ਕੰਜ਼ਿਊਮਰ ਪ੍ਰੋਡਕਟਸ ਲਿਮਿਟਡ (RSPL) ਨੇ ਵੀਰਵਾਰ ਨੂੰ ਦੇਸ਼ ਦੇ 50 ਸਾਲ ਪੁਰਾਣੇ ਵੱਕਾੀ ਬ੍ਰਾਂਡ ਕੈਂਪਾ ਕੋਲਾ ਨੂੰ ਮੁੜ ਪੇਸ਼ ਕਰਨ ਦਾ ਐਲਾਨ ਕੀਤਾ। RSPL ਅਰਬਪਤੀ ਕਾਰੋਬਾਰੀ ਮੁਕੇਸ਼ ਅੰਬਾਨੀ ਦੀ ਅਗਵਾਈ ਵਾਲੀ ਰਿਲਾਇੰਸ ਇੰਡਸਟ੍ਰੀਜ਼ ਲਿਮਿਟਿਡ ਦੀ ਸਹਾਇਕ ਕੰਪਨੀ ਹੈ ਅਤੇ ਰੋਜ਼ਾਨਾ ਵਰਤੋਂ ਵਾਲੀਆਂ ਚੀਜ਼ਾਂ ਬਣਾਉਂਦੀ ਹੈ। 

ਇਹ ਖ਼ਬਰ ਵੀ ਪੜ੍ਹੋ - ਪੰਜਾਬ 'ਚ ਸਰਹੱਦ 'ਤੇ BSF ਦੀ ਵੱਡੀ ਕਾਰਵਾਈ, ਬੰਗਲਾਦੇਸ਼ੀ ਤੇ ਪਾਕਿਸਤਾਨੀ ਨਾਗਰਿਕਾਂ ਨੂੰ ਕੀਤਾ ਕਾਬੂ

ਜ਼ਿਕਰਯੋਗ ਹੈ ਕਿ ਇਸ ਸਾਲ ਜਨਵਰੀ ਵਿਚ RSPL ਨੇ ਗੁਜਰਾਤ ਸਥਿਤ ਕਾਰਬੋਨੇਟਿਡ ਕੋਲਡ ਡ੍ਰਿੰਕ ਤੇ ਜੂਸ ਬਣਾਉਣ ਵਾਲੀ ਕੰਪਨੀ ਸੋਸਯੋ ਹਜ਼ੂਰੀ ਬੈਵਰੇਜਿਜ਼ ਪ੍ਰਾਇਵੇਟ ਲਿਮਿਟਡ ਵਿਚ 50 ਫ਼ੀਸਦੀ ਹਿੱਸੇਦਾਰੀ ਲਈ ਸੀ। ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ ਪਿਓਰ ਡ੍ਰਿੰਕਸ ਗਰੁੱਪ ਤੋਂ ਕਥਿਤ ਤੌਰ 'ਤੇ 22 ਕਰੋੜ ਰੁਪਏ ਵਿਚ ਕੈਂਪਾ ਬ੍ਰਾਂਡ ਅਕੁਆਇਰ ਕੀਤਾ ਸੀ। ਹੁਣ, ਆਰ.ਸੀ.ਪੀ.ਐੱਲ. ਨੇ ਕੈਂਪਾ ਬ੍ਰਾਂਡ ਨੂੰ ਮੁੜ ਪੇਸ਼ ਕੀਤਾ ਹੈ। ਬਾਜ਼ਾਰ ਜਾਣਕਾਰਾਂ ਮੁਤਾਬਕ ਘਰੇਲੂ ਬ੍ਰਾਂਡ ਕੈਂਪਾ ਸਿੱਧੇ ਤੌਰ 'ਤੇ ਦੁਨੀਆ ਦੀਆਂ ਦੋ ਸੱਭ ਤੋਂ ਵੱਡੀਆਂ ਕੰਪਨੀਆਂ ਪੈਪਿਸਕੋ ਅਤੇ ਕੋਕਾ ਕੋਲਾ ਨੂੰ ਟੱਕਰ ਦੇਵੇਗਾ। ਦੱਸ ਦੇਈਏ ਕਿ ਕੈਂਪਾ ਕੋਲਾ 1970-80 ਦੇ ਦਹਾਕੇ ਵਿਚ ਸਭ ਤੋਂ ਵੱਧ ਲੋਕਾਂ ਦਾ ਪਸੰਦੀਦਾ ਕੋਲਡ ਡਰਿੰਕ ਬਰਾਂਡ ਸੀ, ਪਰ ਕੋਕਾ-ਕੋਲਾ ਤੇ ਪੈਪਸਿਕੋ ਦੇ ਆਉਣ ਤੋਂ ਬਾਅਦ ਇਹ ਪਿਛੜਦਾ ਗਿਆ। 

ਇਹ ਖ਼ਬਰ ਵੀ ਪੜ੍ਹੋ - ਕੇਂਦਰੀ ਮੰਤਰੀ ਰਾਮੇਸ਼ਵਰ ਤੇਲੀ ਸ੍ਰੀ ਦਰਬਾਰ ਸਾਹਿਬ ਨਤਮਸਤਕ; ਪੈਟਰੋਲ-ਗੈਸ ਦੀਆਂ ਕੀਮਤਾਂ 'ਚ ਵਾਧੇ ਦੀ ਦੱਸੀ ਵਜ੍ਹਾ

ਦਿ ਗ੍ਰੇਟ ਇੰਡੀਅਨ ਟੇਸਟ ਦੇ ਮਿਲਣਗੇ 3 ਫਲੇਵਰ

ਕੰਪਨੀ ਨੇ ਇਕ ਬਿਆਨ ਵਿਚ ਕਿਹਾ, "ਸ਼ੁਰੂਆਤੀ ਦੌਰ ਵਿਚ ਕੋਲਡ ਡ੍ਰਿੰਕ ਸ਼੍ਰੇਣੀ ਵਿਚ 3 ਨਵੇਂ ਫਲੇਵਰ - ਕੈਂਪਾ ਕੋਲਾ, ਕੈਂਪਾ ਲੈਮਨ ਤੇ ਕੈਂਪਾ ਆਰੇਂਜ ਨੂੰ ਸ਼ਾਮਲ ਕੀਤਾ ਜਾਵੇਗਾ।"  ਪਹਿਲਾਂ ਇਹ ਆਂਧਰ ਪ੍ਰਦੇਸ਼ ਤੇ ਤੇਲੰਗਾਨਾ ਵਿਚ ਉਪਲਬਧ ਹੋਵੇਗੀ, ਬਾਅਦ ਵਿਚ ਇਸ ਨੂੰ ਲੜੀਵਾਰ ਤਰੀਕੇ ਨਾਲ ਪੂਰੇ ਦੇਸ਼ ਵਿਚ ਪੇਸ਼ ਕੀਤਾ ਜਾਵੇਗਾ। ਇਸ ਨੂੰ 'ਦਿ ਗ੍ਰੇਟ ਇੰਡੀਅਨ ਟੇਸਟ' ਦਾ ਨਾਂ ਦਿੱਤਾ ਗਿਆ ਹੈ। ਆਰ.ਸੀ.ਪੀ.ਐੱਲ. ਦੇ ਬੁਲਾਰੇ ਨੇ ਕੈਂਪਾ ਦੀ ਪੇਸ਼ਕਸ਼ ਮੌਕੇ ਕਿਹਾ, "ਅਸੀਂ ਆਸ ਕਰਦੇ ਹਾਂ ਕਿ ਨਵੀਂ ਪੀੜ੍ਹੀ ਦੇ ਉਪਭੋਗਤਾ ਕੈਂਪਾ ਦੇ ਇਸ ਨਵੇਂ ਰੂਪ ਨੂੰ ਅਪਨਾਉਣਗੇ ਤੇ ਨੌਜਵਾਨਾਂ ਨੂੰ ਨਵਾਂ ਸਵਾਦ ਪਸੰਦ ਆਵੇਗਾ। ਉਨ੍ਹਾਂ ਕਿਹਾ ਕਿ ਤੇਜ਼ੀ ਨਾਲ ਵਿਕਸਿਤ ਹੋ ਰਹੇ ਭਾਰਤੀ ਬਾਜ਼ਾਰ ਵਿਚ ਖਪਤ ਵੱਧ ਹੋਣ ਕਾਰਨ ਕੈਂਪਾ ਕੋਲ ਬਹੁਤ ਮੌਕੇ ਹਨ।

ਨੋਟ - ਇਸ ਖ਼ਬਰ ਬਾਰੇ ਕੁਮੈਂਟ ਬਾਕਸ ਵਿਚ ਦਿਓ ਆਪਣੀ ਰਾਏ।