ਝੇਂਗ ਕਿਨਵੇਨ ਆਸਟ੍ਰੇਲੀਅਨ ਓਪਨ ਤੋਂ ਹਟੀ

ਵੁਹਾਨ : ਚੀਨ ਦੀ ਸਟਾਰ ਟੈਨਿਸ ਖਿਡਾਰਨ ਅਤੇ ਓਲੰਪਿਕ ਸੋਨ ਤਮਗਾ ਜੇਤੂ ਝੇਂਗ ਕਿਨਵੇਨ ਨੇ ਆਗਾਮੀ ਆਸਟ੍ਰੇਲੀਅਨ ਓਪਨ ਤੋਂ ਹਟਣ ਦਾ ਐਲਾਨ ਕਰਕੇ ਪ੍ਰਸ਼ੰਸਕਾਂ ਨੂੰ ਨਿਰਾਸ਼ ਕਰ ਦਿੱਤਾ ਹੈ। ਸੋਸ਼ਲ ਮੀਡੀਆ 'ਤੇ ਸਾਂਝੇ ਕੀਤੇ ਇੱਕ ਭਾਵੁਕ ਬਿਆਨ ਵਿੱਚ 23 ਸਾਲਾ ਖਿਡਾਰਨ ਨੇ ਦੱਸਿਆ ਕਿ ਇਹ ਫੈਸਲਾ ਉਨ੍ਹਾਂ ਦੀ ਟੀਮ ਦੁਆਰਾ ਮੈਡੀਕਲ ਸਲਾਹ ਅਤੇ ਡੂੰਘੀ ਵਿਚਾਰ-ਚਰਚਾ ਤੋਂ ਬਾਅਦ ਲਿਆ ਗਿਆ ਹੈ। ਝੇਂਗ ਨੇ ਸਪੱਸ਼ਟ ਕੀਤਾ ਕਿ ਭਾਵੇਂ ਉਨ੍ਹਾਂ ਦੀ ਰਿਕਵਰੀ ਚੰਗੀ ਤਰ੍ਹਾਂ ਹੋ ਰਹੀ ਹੈ, ਪਰ ਉਹ ਅਜੇ ਤੱਕ ਉਸ 'ਸਰਵੋਤਮ ਅਤੇ ਮੁਕਾਬਲੇਬਾਜ਼ ਸਥਿਤੀ' ਵਿੱਚ ਨਹੀਂ ਪਹੁੰਚੀ ਹੈ, ਜੋ ਇੱਕ ਗ੍ਰੈਂਡ ਸਲੈਮ ਵਿੱਚ ਖੇਡਣ ਲਈ ਲੋੜੀਂਦੀ ਹੁੰਦੀ ਹੈ।

ਝੇਂਗ ਕਿਨਵੇਨ ਲਈ ਮੈਲਬੌਰਨ ਪਾਰਕ ਹਮੇਸ਼ਾ ਹੀ ਖਾਸ ਰਿਹਾ ਹੈ, ਕਿਉਂਕਿ ਇੱਥੇ ਹੀ ਉਨ੍ਹਾਂ ਨੇ ਆਪਣਾ ਪਹਿਲਾ ਗ੍ਰੈਂਡ ਸਲੈਮ ਮੇਨ ਡਰਾਅ ਮੈਚ ਜਿੱਤਿਆ ਸੀ ਅਤੇ ਸਾਲ 2024 ਵਿੱਚ ਉਹ ਆਸਟ੍ਰੇਲੀਅਨ ਓਪਨ ਦੇ ਫਾਈਨਲ ਤੱਕ ਪਹੁੰਚੀ ਸੀ। ਉਨ੍ਹਾਂ ਨੇ ਕਿਹਾ ਕਿ ਇਸ ਮੌਕੇ ਤੋਂ ਪਿੱਛੇ ਹਟਣਾ ਉਨ੍ਹਾਂ ਲਈ 'ਅਵਿਸ਼ਵਾਸ਼ਯੋਗ ਤੌਰ 'ਤੇ ਮੁਸ਼ਕਿਲ' ਸੀ ਕਿਉਂਕਿ ਉਨ੍ਹਾਂ ਦਾ ਇਸ ਜਗ੍ਹਾ ਨਾਲ ਇੱਕ ਗੂੜ੍ਹਾ ਰਿਸ਼ਤਾ ਹੈ। ਦੱਸਣਯੋਗ ਹੈ ਕਿ ਪਿਛਲੇ ਸਾਲ ਵਿੰਬਲਡਨ ਤੋਂ ਬਾਅਦ ਉਨ੍ਹਾਂ ਦੀ ਕੋਹਨੀ ਦੀ ਸਰਜਰੀ ਹੋਈ ਸੀ, ਜਿਸ ਤੋਂ ਬਾਅਦ ਚਾਈਨਾ ਓਪਨ ਵਿੱਚ ਵਾਪਸੀ ਦੌਰਾਨ ਸੱਟ ਦੁਬਾਰਾ ਉਭਰਨ ਕਾਰਨ ਉਨ੍ਹਾਂ ਨੂੰ ਮੈਚ ਦੇ ਵਿਚਕਾਰ ਹੀ ਹਟਣਾ ਪਿਆ ਸੀ।