ਕੁਸ਼ਤੀ ਸੰਘ ਦੇ ਫੈਸਲੇ ''ਤੇ ਭੜਕੀ ਵਿਨੇਸ਼ ਫੋਗਾਟ; ਚੋਣ ਨੀਤੀ ਨੂੰ ਦੱਸਿਆ ਨੌਜਵਾਨ ਪਹਿਲਵਾਨਾਂ ਨਾਲ ''ਧੋਖਾ''

ਸਪੋਰਟਸ ਡੈਸਕ : ਭਾਰਤੀ ਮਹਿਲਾ ਪਹਿਲਵਾਨ ਵਿਨੇਸ਼ ਫੋਗਾਟ ਨੇ ਹਰਿਆਣਾ ਕੁਸ਼ਤੀ ਸੰਘ ਵੱਲੋਂ 'ਫੈਡਰੇਸ਼ਨ ਕੱਪ 2026' ਲਈ ਤੈਅ ਕੀਤੇ ਗਏ ਚੋਣ ਮਾਪਦੰਡਾਂ 'ਤੇ ਤਿੱਖੇ ਸਵਾਲ ਚੁੱਕੇ ਹਨ। ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' (X) 'ਤੇ ਇੱਕ ਪੋਸਟ ਰਾਹੀਂ ਵਿਨੇਸ਼ ਨੇ ਇਸ ਚੋਣ ਪ੍ਰਕਿਰਿਆ ਨੂੰ "ਗੈਰ-ਵਾਜਬ" ਅਤੇ ਉਭਰਦੇ ਪਹਿਲਵਾਨਾਂ ਦੇ ਭਵਿੱਖ ਲਈ ਨੁਕਸਾਨਦੇਹ ਦੱਸਿਆ ਹੈ।

ਚੋਣ ਮਾਪਦੰਡਾਂ 'ਤੇ ਇਤਰਾਜ਼ ਅਤੇ ਤਿੱਖੇ ਸਵਾਲ
ਵਿਨੇਸ਼ ਫੋਗਾਟ ਨੇ ਸੰਘ ਦੇ ਉਸ ਫੈਸਲੇ ਦੀ ਆਲੋਚਨਾ ਕੀਤੀ ਹੈ ਜਿਸ ਵਿੱਚ ਟ੍ਰਾਇਲ ਨੂੰ ਸਿਰਫ਼ 2025 ਦੇ ਸੀਨੀਅਰ ਸਟੇਟ ਮੈਡਲ ਜੇਤੂਆਂ ਅਤੇ ਉਨ੍ਹਾਂ ਪਹਿਲਵਾਨਾਂ ਤੱਕ ਸੀਮਤ ਰੱਖਿਆ ਗਿਆ ਹੈ ਜਿਨ੍ਹਾਂ ਨੇ 2025 ਵਿੱਚ ਅੰਤਰਰਾਸ਼ਟਰੀ ਪੱਧਰ 'ਤੇ ਭਾਰਤ ਦੀ ਨੁਮਾਇੰਦਗੀ ਕੀਤੀ ਹੈ। ਉਨ੍ਹਾਂ ਸਵਾਲ ਕੀਤਾ ਕਿ ਕੀ 2024 ਦੇ ਰਾਸ਼ਟਰੀ ਮੈਡਲ ਜੇਤੂ ਹੁਣ ਅਯੋਗ ਹੋ ਗਏ ਹਨ ਅਤੇ ਕੀ ਸਬ-ਜੂਨੀਅਰ ਮੈਡਲਾਂ ਦੀ ਕੋਈ ਕੀਮਤ ਨਹੀਂ ਰਹਿ ਗਈ? ਵਿਨੇਸ਼ ਨੇ ਕਿਹਾ ਕਿ ਇਹ ਫੈਸਲਾ ਉਨ੍ਹਾਂ ਹਜ਼ਾਰਾਂ ਮਿਹਨਤੀ ਐਥਲੀਟਾਂ ਨਾਲ ਧੋਖਾ ਹੈ ਜੋ ਸਾਲਾਂ ਤੋਂ ਟ੍ਰੇਨਿੰਗ ਲੈ ਰਹੇ ਹਨ।

ਖਿਡਾਰੀਆਂ ਦੇ ਸੰਘਰਸ਼ ਦਾ ਮਜ਼ਾਕ 
ਰਾਸ਼ਟਰਮੰਡਲ ਅਤੇ ਏਸ਼ੀਆਈ ਖੇਡਾਂ ਦੀ ਮੈਡਲ ਜੇਤੂ ਵਿਨੇਸ਼ ਨੇ ਚੇਤਾਵਨੀ ਦਿੱਤੀ ਕਿ ਅਜਿਹੀਆਂ ਨੀਤੀਆਂ ਨਾਲ ਏਸ਼ੀਆਈ ਖੇਡਾਂ ਅਤੇ ਵਿਸ਼ਵ ਚੈਂਪੀਅਨਸ਼ਿਪ ਵਰਗੇ ਵੱਡੇ ਟੂਰਨਾਮੈਂਟਾਂ 'ਤੇ ਮਾੜਾ ਅਸਰ ਪਵੇਗਾ। ਉਨ੍ਹਾਂ ਕਿਹਾ ਕਿ ਜ਼ਖ਼ਮੀ ਖਿਡਾਰੀਆਂ ਨੂੰ ਉਨ੍ਹਾਂ ਹਾਲਤਾਂ ਲਈ ਸਜ਼ਾ ਦਿੱਤੀ ਜਾ ਰਹੀ ਹੈ ਜੋ ਉਨ੍ਹਾਂ ਦੇ ਵੱਸ ਵਿੱਚ ਨਹੀਂ ਹਨ। ਵਿਨੇਸ਼ ਨੇ ਇਸ ਸਥਿਤੀ ਨੂੰ "ਖਿਡਾਰੀਆਂ ਦੇ ਜੀਵਨ ਅਤੇ ਸੰਘਰਸ਼ ਦਾ ਖੁੱਲ੍ਹਾ ਮਜ਼ਾਕ" ਕਰਾਰ ਦਿੰਦਿਆਂ ਮੰਗ ਕੀਤੀ ਕਿ ਪ੍ਰਤਿਭਾ ਦੀ ਪਛਾਣ ਕਰਨ ਲਈ 'ਓਪਨ ਟ੍ਰਾਇਲ' ਕਰਵਾਏ ਜਾਣੇ ਚਾਹੀਦੇ ਹਨ। ਉਨ੍ਹਾਂ ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੂੰ ਇਸ ਮਾਮਲੇ ਵਿੱਚ ਦਖਲ ਦੇਣ ਅਤੇ ਪਹਿਲਵਾਨਾਂ ਲਈ ਇਨਸਾਫ਼ ਯਕੀਨੀ ਬਣਾਉਣ ਦੀ ਅਪੀਲ ਕੀਤੀ ਹੈ।